གསུང་མགུར 139 - New Tibetan Bible བོད་འགྱུར་གསར་མ།གསུང་མགུར་བརྒྱ་དང་སོ་དགུ༌པ། དཀོན་མཆོག་ཡ་ཝཱེའི་ཀུན་མཁྱེན་དང་གཟིགས་སྐྱོང་། 1 ༼དབུ་མཛད་ལ་སྤྲད་པའི་དཱ་བིད་ཀྱི་མགུར༌མ།༽ ཡ་ཝཱེ་ཁྱེད་ཀྱིས་ང་ལ་བརྟགས་ཤིང༌མཁྱེན།། 2 ང་རང་ལངས་དུས་འདུག་དུས་ཁྱེད་ཀྱིས༌མཁྱེན། །ང་ཡི་བསམ་ཚུལ་ཁྱེད་ཀྱིས་རྒྱང་ནས༌མཁྱེན།། 3 ལམ་དུ་འགྲོ་བ་དང་ནི་མར་ཉལ༌བ། །ཁྱེད་ཀྱིས་དེ་ཀུན་ཞིབ་ཏུ་གཟིགས་པ༌དང༌། །ང་ཡིས་ཅི་བྱས་ཚང་མ་ཁྱེད་ཀྱིས༌མཁྱེན།། 4 ཀྱེ་ཀྱེ་ཡ་ཝཱེ་ང་ཡི་ལྕེའི་སྟེང༌དུ། །ཁྱེད་ཀྱིས་མི་མཁྱེན་ཚིག་རྡོག་གཅིག་ཀྱང༌མེད།། 5 ཁྱེད་ཀྱིས་ང་རང་མདུན་རྒྱབ་གཉིས་ནས༌བསྐོར། །ཁྱེད་ཀྱི་ཕྱག་ནི་བདག་གི་སྟེང་དུ༌ཡོད།། 6 འདི་འདྲའི་ཤེས་རིག་ང་ཡིས་དཔག་ཐབས༌བྲལ། །བླ་ན་མཐོ་བས་ངས་དེར་སྙོབ་པར༌དཀའ།། 7 ཁྱེད་ཀྱི་ཐུགས་ཉིད་ལས་བདག་གང་དུ༌འགྲོ། །ཁྱེད་ཀྱི་དྲུང་ནས་ང་རང་གང་དུ༌འབྲོ།། 8 ནམ་མཁར་འཛེགས་ན་ཁྱེད་ཉིད་དེར་བཞུགས༌ཤིང༌། །གལ་ཏེ་གཤིན་པོའི་ཡུལ་དུ་མལ་བཅོས༌ཀྱང༌། །ཁྱེད་ཉིད་དེ་ག་རུ་ཡང་བཞུགས་པ༌ལགས།། 9 ཐོ་རངས་བདག་གིས་གཤོག་ཟུང་བརྐྱངས་ནས༌ནི། །རྒྱ་མཚོའི་ཕ་མཐར་འཕུར་ཏེ་བསྡད་ན༌ཡང༌།། 10 དེར་ཡང་ཁྱེད་ཀྱི་ཕྱག་གིས་ལམ་སྣ༌འདྲེན། །ཁྱེད་ཕྱག་གཡས་པས་ང་རང་སྐྱོར་བྱེད༌དོ།། 11 མུན་པས་ང་རང་ཡོངས་སུ་སྦ་བར༌ཤོག །ཕྱོགས་བཞིའི་འོད་ཀྱང་མཚན་མོར་འགྱུར་སྨྲ༌ཡང༌།། 12 ཁྱེད་ལ་མུན་པ་མུན་པར་མི་སྣང༌ཞིང༌། །མཚན་མོས་ཉིན་མོ་ནང་བཞིན་འོད་སྣང༌སྤྲོ། །ཁྱེད་དྲུང་འོད་དང་མུན་པ་ཁྱད་མེད༌ཡིན།། 13 བདག་གི་སེམས་ཁོང་ཁྱེད་ཀྱིས་མཛད་པ༌དང༌། །མ་ཡི་མངལ་ནང་ཁྱེད་ཀྱིས་ང་རང༌སྦྲེལ།། 14 ངོ་མཚར་འཇིགས་རུང་ལམ་ནས་ང་མཛད༌པས། །བདག་གིས་ཁྱེད་ལ་གཏང་རག་འབུལ་བར༌བྱ། །ཁྱེད་ཀྱི་མཛད་པ་ཤིན་ཏུ་ངོ་མཚར༌ཆེ། །ང་ཡི་སེམས་ཀྱིས་དེ་རྣམས་ལེགས་པར༌ཤེས།། 15 ང་རང་ལྐོག་གྱུར་གནས་སུ་བཟོས་པ༌དང༌། །ས་ཡི་གཏིང་ནས་མཉམ་དུ་སྦྲེལ་བའི༌ཚེ། །ང་ཡི་གཟུགས་རིས་ཁྱེད་ལ་སྦས་མ༌ཡིན།། 16 ང་རང་གཟུགས་སུ་མ་གྲུབ་སྔོན་རོལ༌དུ། །ཁྱེད་ཀྱི་སྤྱན་གྱིས་སྔར་ནས་གཟིགས་པ༌དང༌། །ཁྱེད་ཀྱིས་ཐུགས་ཐག་བཅད་པའི་ཚེ་ཚད༌ལས། །བདག་གིས་ད་དུང་ཉིན་གཅིག་མ་རོལ༌གོང༌། །ཐམས་ཅད་ཁྱེད་ཀྱི་ཕྱག་དཔེའི་ནང་དུ༌བཀོད།། 17 ཀྱེ་ཀྱེ་དཀོན་མཆོག་ཁྱེད་ཀྱི་བཞེད་དགོངས༌རྣམས། །བདག་གི་ཕྱིར་དུ་ཅི་འདྲའི་རིན་ཐང༌ཆེ། །དེ་རྣམས་བསྡོམས་གྲངས་གང་འདྲ་འབོར་ཆེ༌ཨང༌།། 18 རྩིས་གྲངས་བླངས་ན་བྱེ་མ་ལས་ཀྱང༌མང༌། །གཉིད་ལས་སད་དུས་ད་དུང་ཁྱེད་མཉམ༌གནས།། 19 ཀྱེ་ཀྱེ་དཀོན་མཆོག་མི་ངན་གསོད་གྱུར༌ཅིག །ལག་དམར་ཁྱོད་རྣམས་ང་དང་འབྲལ་བར༌གྱིས།། 20 དེ་ཚོས་ཁྱེད་ལ་རྒོལ་བའི་ཚིག་ངན༌ལབ། །ཁྱེད་ཀྱི་དགྲ་བོས་ཁྱེད་མཚན་དོན་མེད༌བརྗོད།། 21 ཡ་ཝཱེ་ཁྱེད་ལ་སྡང་བའི་མི་རྣམས༌ལ། །ང་རང་ཡང་ནི་སྡང་བར་མི་འགྱུར༌རམ། །ཀྱེ་མ་ཁྱེད་ལ་རྒོལ་བའི་མི་རྣམས༌ལ། །ང་རང་ཞེན་ཁ་ལོག་པ་མ་ཡིན༌ནམ།། 22 ང་རང་དེ་ཚོར་ཞེ་འཁོན་སྙིང་ནས༌སྐྱེ། །བདག་གིས་དེ་རྣམས་དགྲ་རུ་རྩི་བྱེད༌དོ།། 23 ཀྱེ་ཀྱེ་དཀོན་མཆོག་ང་ལ་བརྟགས་ནས༌ནི། །ང་ཡི་སེམས་པ་མཁྱེན་པར་མཛོད་ཅིག༌ཀྱེ། །ང་ལ་དཔྱད་ནས་བསམ་ཚུལ་མཁྱེན་པར༌མཛོད།། 24 ངའི་ནང་སྤྱོད་ངན་ཡོད་མེད་གཟིགས་ནས༌ནི། །གཏན་གྱི་ལམ་ནང་ང་རང་འཁྲིད་པར༌མཛོད།། |
(cc) 2016-2023 པར་དབང་དམ་པའི་གསུང་རབ་བོད་འགྱུར་གསར་མའི་རྩོམ་སྒྲིག་སྡེ་ཚན་ལ་དབང་བ་ཡིན།
(cc) 2016-2023 New Tibetan Bible translation committee.
The Holy Bible in Modern Literary Tibetan, New Tibetan Bible translation.
This translation is made available under the terms of the Creative Commons Attribution-NonCommercial-NoDerivatives 4.0 International license.
* Attribution: When using the New Tibetan Bible text, you must credit the New Tibetan Bible (new-tibetan-bible.com) as the source.
* NonCommercial: You may not sell the New Tibetan Bible text or use it for commercial purposes.
* NoDerivatives: You may share the New Tibetan Bible text, but you may not change it.