ལེགས་བཤད 4 - New Tibetan Bible བོད་འགྱུར་གསར་མ།ལེའུ་བཞི༌པ། ཤེས་རབ་ཀྱི་ཕན༌ཡོན། 1 ཀྱེ་ཀྱེ་བུ་རྣམས་ཕ་ཡི་བསླབ་བྱར༌ཉོན། །གོ་བ་རྟོགས་པར་གཟབ་གཟབ་བྱས་ནས༌བརྩོན།། 2 བདག་གིས་ཁྱོད་ཚོར་སློབ་སྟོན་བཟང་པོ༌བྱེད། །དེའི་ཕྱིར་ང་ཡི་བསླབ་བྱ་འདོར་མི༌བྱ།། 3 ང་ནི་རང་གི་ཕ་ཡི་དྲུང་དུ་བུ་ཆུང༌དང༌། །མ་ཡི་མདུན་དུ་གཅེས་ཕྲུག་གཅིག་པུ་ཡིན་དུས༌སུ།། 4 ཕ་ཡིས་ང་ལ་བསླབ་བྱ་འདི་སྐད༌གནང༌། །ཁྱོད་ཀྱིས་སེམས་ནས་ང་ཡི་ཚིག་རྣམས༌རྩིས། །ང་ཡི་བཀའ་རྒྱ་སྲུངས་དང་གསོན་པར༌འགྱུར།། 5 ཤེས་རབ་དང་ནི་གོ་རྟོགས་ལེན་པ༌དང༌། །ང་ཡི་ཚིག་རྣམས་བརྗེད་པར་མི་བྱ༌ཞིང༌། །དེ་ལས་ལམ་ཡན་དུ་ཡང་འཁོར་མི༌བྱ།། 6 ཤེས་རབ་མ་སྤང་ཁོ་མོས་ཁྱོད་ལ༌གཟིགས། །ཁོ་མོར་གཅེས་ན་ཁོ་མོས་ཁྱོད་རང༌བསྲུང༌།། 7 ཤེས་རབ་གཙོ་བོ་ཡིན་པས་ཤེས་རབ༌ལོངས། །རང་ལ་ཡོད་པ་ཀུན་གྱིས་གོ་རྟོགས༌འཚོལ།། 8 ཤེས་རབ་མཐོན་པོར་བསྒྲེངས་ན་ནི། །ཁོ་མོས༌ཁྱོད་རང་མཐོ་སར་འཇོག །ཁྱོད་ཀྱིས་ཤེས་རབ་པང་དུ་ལོངས། །ཁོ་མོས་ཁྱོད་ལ་བཀུར་སྟི་སྦྱིན།། 9 ཁོ་མོས་ཁྱོད་ཀྱི་མགོ་ལ་ནི། །ཐུགས་རྗེའི་གཙུག་རྒྱན༌བསྐོན་བྱེད་ཅིང་། །ཟིལ་གྱི་ཅོད་པན་ཁྱོད་ལ་གནང་།། 10 བདག་གི་བུ་ཡིས་ངའི་གཏམ་ལ། །མཉན་ནས་དང་དུ་ལོངས་ཤིག༌དང༌། །ཁྱོད་ནི་ཚེ་ཐག་རིང་པོར་གནས།། 11 ང་ཡིས་ཁྱོད་རང་ཤེས་རབ་ལམ་དུ༌དྲངས། །དྲང་པོའི་ལམ་དུ་སྐྱོད་པར་ལམ་སྟོན༌བྱས།། 12 ཁྱོད་རང་ལམ་ལ་བགྲོད་དུས༌སུ། །རྐང་པ་བཀག་རྒྱར་མི་ཐོགས༌ཤིང༌། །རྒྱུག་དུས་ས་ལ་འགྱེལ་མི༌འགྱུར།། 13 གདམས་ངག་དམ་པོར་བསྲུངས་ནས་ལྷོད་མི༌རུང༌། །ཁོ་མོ་ཚེ་སྲོག་ཡིན་པས་ནན་གྱིས༌སྲུངས།། 14 ངན་རུལ་ཅན་གྱི་ལམ་དུ་མི་ཞུགས༌ཤིང༌། །ངན་པའི་ལམ་དུ་འགྲོ་བར་མི་བྱ༌འོ།། 15 དེ་ལ་གཡོལ་ཞིང་དེའི་ནང་མ་འགྲོ༌ཞིག །ཁ་ཕྱིར་འཁོར་ནས་དེ་ལས་ཕར་སོང༌ཞིག། 16 ཅིའི་ཕྱིར་ཞེ་ན་དེ་རྣམས༌ཀྱིས། །ལས་ངན་མ་བྱས་གཉིད་མི༌ཐུབ། །སུ་ཞིག་བསྒྱེལ་བར་མ་བྱས༌ན། །དེ་རྣམས་གཉིད་ཀྱང་མི་ཁུག༌གོ། 17 དེ་ཚོའི་བཟའ་རྒྱུ་ངན་པའི་བག་ལེབ༌ཡིན། །དེ་ཚོའི་བཏུང་བ་གདུག་རྩུབ་རྒུན་ཆང༌ཡིན།། 18 དྲང་པོའི་བགྲོད་ལམ་སྐྱ་མདའ་ཤར་བ༌འདྲ། །ཉིན་གུང་བར་དུ་ཇེ་གསལ་འགྲོ་བ༌ཡིན།། 19 ངན་པའི་ལམ་ནི་སྨག་རུམ་དང་མཚུངས༌ཤིང༌། །རང་ཉིད་འགྱེལ་བའི་རྒྱུ་ཡང་རྟོགས་པ༌མིན།། 20 བདག་གི་བུ་ཡིས་བདག་གི་ཚིག་ལ༌སོམས། །ང་ཡི་གཏམ་ལ་རྣ་བ་གཏད་ནས༌ཉོན།། 21 དེ་རྣམས་རང་གི་མིག་དང་འབྲལ་མ༌འཇུག །གཟབ་ནན་བགྱིས་ནས་རང་གི་སེམས་ལ༌ཟུངས།། 22 འདི་དག་ཐོབ་པར་ཚེ་སྲོག་ཐོབ་པ༌དང༌། །ཁོ་ཚོའི་ལུས་ཁམས་བདེ་བར་འགྱུར་ཕྱིར༌རོ།། 23 བསྲུང་བྱ་ཀུན་ལས་རང་སེམས་ལྷག་པར་སྲུངས། །རྒྱུ་མཚན་དེ་ནི་སྲོག༌གི་འབྱུང་གནས་ཡིན།། 24 ལོག་པར་སྨྲ་བའི་ཁ་ནི་འདོར་བ༌དང༌། །སླུ་བྲིད་གཏམ་གྱི་མཆུ་སྒྲོས་རིང་དུ༌སྤོངས།། 25 ཁྱོད་ཀྱི་མིག་གིས་མདུན་ལ༌ལྟོས། །མིག་གིས་དྲང་མོར་བལྟ་བར༌གྱིས།། 26 རང་གི་རྐང་པའི་གོམ་སྟབས༌ལ། །གཟབ་གཟབ་གྱིས་དང་རང་གི༌ལམ། །ཐམས་ཅད་བརྟན་པོར་འགྱུར་བ༌འོ།། 27 གཡས་སམ་གཡོན་དུ་མི་གཡོ༌བར། །རང་གི་རྐང་པ་ངན་ལས༌སྲུངས།། |
(cc) 2016-2023 པར་དབང་དམ་པའི་གསུང་རབ་བོད་འགྱུར་གསར་མའི་རྩོམ་སྒྲིག་སྡེ་ཚན་ལ་དབང་བ་ཡིན།
(cc) 2016-2023 New Tibetan Bible translation committee.
The Holy Bible in Modern Literary Tibetan, New Tibetan Bible translation.
This translation is made available under the terms of the Creative Commons Attribution-NonCommercial-NoDerivatives 4.0 International license.
* Attribution: When using the New Tibetan Bible text, you must credit the New Tibetan Bible (new-tibetan-bible.com) as the source.
* NonCommercial: You may not sell the New Tibetan Bible text or use it for commercial purposes.
* NoDerivatives: You may share the New Tibetan Bible text, but you may not change it.