ལེགས་བཤད 27 - New Tibetan Bible བོད་འགྱུར་གསར་མ།ལེའུ་ཉེར་བདུན༌པ། 1 ཉིན་གཅིག་ཅི་འབྱུང་ཁྱོད་ཀྱིས་མི་ཤེས༌པས། །སང་ཉིན་དོན་ལ་ཁ་ཕོ་མ་བྱེད༌ཅིག། 2 གཞན་ལ་བསྟོད་དུ་འཇུག་པ༌ལས། །རང་ཁས་རང་ལ་བསྟོད་མི༌རུང༌། །གཞན་གྱིས་བསྟོད་བསྔགས་བྱེད་པ༌ལས། །རང་གི་མཆུ་ཡིས་བསྟོད་མི༌འོས།། 3 རྡོ་བ་ལྕི་ཞིང་བྱེ་མ་ཡང་ལྗིད༌དེ། །བླུན་པོའི་ཁོང་ཁྲོ་དེ་ལས་ཀྱང་ལྕི༌འོ།། 4 ཁོང་ཁྲོ་གདུག་རྩུབ་ཆེ་བ༌དང༌། །ཁྲོ་གཏུམ་ཆུ་ལོག་ཡིན་ན༌ཡང༌། །ཕྲག་དོག་མདུན་དུ་སུ་ཞིག༌ཚུགས།། 5 དྲང་མོར་བཀའ་བཀྱོན་མཛད་པ༌ནི། །ལྐོག་ནས་བརྩེ་བ་བྱེད་པས༌ལྷག། 6 མཛའ་བོས་ཕྱུང་བའི་རྨ་ཁ་སླུ་མེད༌ཡིན། །དགྲ་བོས་ཁྱོད་ལ་ཡང་ཡང་ཁ་སྐྱེལ༌ལོ།། 7 རྒྱགས་པའི་ཁ་ནི་སྦྲང་རྩི་ལ་ཡང༌སྡང༌། །ལྟོགས་ན་ཁ་ཏིག་ཀྱང་ནི་མངར་མོ༌ཡིན།། 8 ཁྱིམ་དང་བྲལ་བ་ཕྱོགས་བཞིར༌འཁྱམ། །ཚང་ལས་འཁྱར་བའི་བྱ་དང༌འདྲ།། 9 བྱུགས་རྫས་དང་ནི་བསུང་རྫས༌ཀྱིས། །མི་སེམས་སྤྲོ་བར་བྱེད་པ༌དང༌། །མཛའ་བོའི་ཁ་ཏ་མངར་བ༌ཡིན།། 10 རང་གི་གྲོགས་དང་ཕ་ཡི༌གྲོགས། །ཁྱོད་ཀྱིས་གང་ཡང་འདོར་མི༌བྱ། །ཆག་སྒོར་འཕྲད་པའི་ཉིན་མོ༌ལ། །སྤུན་ཟླའི་ཁྱིམ་ལ་མ་འགྲོ༌ཞིག །རྒྱང་ཐག་རིང་བའི་སྤུན་ཟླ༌ལས། །ཉེ་བར་ཡོད་པའི་ཁྱིམ་མཚེས༌ལེགས།། 11 ངའི་བུ་ཁྱོད་ནི་ཤེས་རབ་ལྡན་གྱུར༌ནས། །ང་ཡི་སེམས་པ་སྤྲོ་བར་གྱིས་ཤིག༌དང༌། །ང་རང་སྨད་མཁན་ལ་ནི་ལན་གདབ་བོ།། 12 གྲུང་པོས་བར་ཆད་མཐོང་ནས་ཡིབ་པར༌བྱེད། །བླུན་པོ་མུ་མཐུད་སྐྱོད་ཅིང་སྡུག་བསྔལ༌མྱོང༌།། 13 སུ་ཞིག་རྒྱུས་མེད་འགན་ལེན་བྱེད་ན༌ནི། །དེ་ཡི་ཕྱི་གོས་ལེན་པར་གྱིས་ཤིག༌དང༌། །དེ་ཡིས་བྱི་མོའི་འགན་ལེན་བྱེད་ན༌ནི། །དེ་ནི་འགན་ལེན་པ་རུ་འགྱུར་དགོས༌སོ།། 14 སྔ་མོ་ལངས་ནས་ཁྱིམ་མཚེས༌ལ། །སྐད་གསང་མཐོན་པོས་ཤིས་བརྗོད༌པ། །དེ་ནི་སྨོན་ལོག་ཏུ་འགྱུར༌རོ།། 15 བུད་མེད་འཁོན་འཛིང་ཅན་དེ༌ནི། །དྲག་ཆར་ཉིན་མོའི་ཐིགས་པར༌མཚུངས།། 16 འགོག་པར་བསམས་པས་རླུང་ནི་འགོག་པ༌དང༌། །ལག་པ་གཡས་པས་སྣུམ་ནི་འཛིན་དང༌མཚུངས།། 17 ལྕགས་ནི་ལྕགས་ཀྱིས་རྣོན་པོར་བརྡར་བ༌ལྟར། །མཛའ་གྲོགས་ཕན་ཚུན་བརྡར་ན་རིག་པ༌རྣོ།། 18 སེ་ཡབ་ཤིང་ལ་བདག་སྐྱོང་བྱེད་མཁན༌གྱིས། །དེ་ཡི་འབྲས་བུ་སྤྱོད་པར་གདོན་མི༌ཟ། །བདག་པོར་ཞབས་ཕྱི་སྒྲུབ་པར་བཀུར་སྟི༌འབྱུང༌།། 19 ཆུ་ནང་ཇི་ལྟར་ངོ་གདོང་འཆར་བ༌བཞིན། །མི་ཡི་བསམ་པས་མི་དེ་མཚོན་པ༌ཡིན།། 20 གཤིན་ཡུལ་དམྱལ་ཁམས་ཚིམ་པ་མེད་པ༌ལྟར། །མི་ཡི་མིག་ཀྱང་དེ་དང་དེ་བཞིན༌ཡིན།། 21 གསེར་དངུལ་བཙོ་ཕྱིར་མེ་ཐབ་ལུགས་ཀོང༌ཡོད། །གཞན་གྱི་བསྟོད་པས་མི་ལ་བརྟག་པ༌ཡིན།། 22 ཁྱོད་ཀྱིས་འབྲུ་དང་མཉམ་དུ་བླུན་པོ༌ནི། །གཏུན་ཁུང་ནང་དུ་བརྡུངས་པ་ཡིན་ན༌ཡང༌། །དེ་ཡི་བླུན་རྨོངས་ཁོ་དང་འབྲལ་མི༌འགྱུར།། 23 ཁྱོད་ཀྱིས་ལུག་ཁྱུའི་གནས་ཚུལ་རྟོགས་དགོས༌ལ། །རང་གི་བ་ཁྱུར་བདག་སྐྱོང་ལེགས་པོ༌བྱོས།། 24 གང་ལ་ཞེ་ན་རྒྱུ་ནོར་ཡུན་མི༌གཏན། །མི་རབས་མི་རབས་ཅོད་པན་ཡང་མི༌ལུས།། 25 རྩྭ་སྐྱ་འབྲེག་ཅིང་རྩྭ་སྔོན་སྐྱེ་བ༌ཡིན། །རི་བོའི་རྩྭ་ཡང་ཕུང་པོར་བསྡུ་བ༌འོ།། 26 ལུ་གུ་ཁྱོད་ཀྱི་གྱོན་གོས༌ཡིན། །ར་ནི་ཞིང་གི་རིན་པ༌ཡིན།། 27 ཁྱོད་དང་ཁྱིམ་མི་གང་པོ་དང༌། །བྲན་མོ་རྣམས་ཀྱི་འཚོ་བའི༌ཕྱིར། །ར་མའི་འོ་མས་འདང་བར༌འགྱུར།། |
(cc) 2016-2023 པར་དབང་དམ་པའི་གསུང་རབ་བོད་འགྱུར་གསར་མའི་རྩོམ་སྒྲིག་སྡེ་ཚན་ལ་དབང་བ་ཡིན།
(cc) 2016-2023 New Tibetan Bible translation committee.
The Holy Bible in Modern Literary Tibetan, New Tibetan Bible translation.
This translation is made available under the terms of the Creative Commons Attribution-NonCommercial-NoDerivatives 4.0 International license.
* Attribution: When using the New Tibetan Bible text, you must credit the New Tibetan Bible (new-tibetan-bible.com) as the source.
* NonCommercial: You may not sell the New Tibetan Bible text or use it for commercial purposes.
* NoDerivatives: You may share the New Tibetan Bible text, but you may not change it.