ལེགས་བཤད 23 - New Tibetan Bible བོད་འགྱུར་གསར་མ།ལེའུ་ཉེར་གསུམ༌པ། 1 འགོ་དཔོན་མཉམ་དུ་ཟས་ཟ༌དུས། །ཁྱོད་ཀྱི་མདུན་དུ་ཅི་ཡོད༌ལྟོས།། 2 ཁྱོད་ནི་གྲོད་པོ་ཆེ་ཡིན༌ན། །རང་གི་སྐེ་ལ་གྲི་ཞོག༌ཅིག། 3 དེ་ནི་གཡོ་སྒྱུའི་ཟས་ཡིན༌པས། །ཞིམ་པོ་དེ་ལ་ཞེ་མ༌ཆགས།། 4 ཕྱུག་པོར་འགྱུར་དུ་འབད་མ༌བྱེད། །ཤེས་རྒྱས་བསམ་ཚུལ་དེ་དོར༌ཅིག། 5 མིག་གིས་ནོར་ལ་བལྟས་ཙམ༌གྱིས། །དེ་ནི་མེད་པར་འགྱུར་བ༌སྟེ། །ནོར་དེས་གཤོག་རྩལ་བརྐྱངས་ནས༌ནི། །བྱ་གླག་བཞིན་དུ་གནམ་ལ༌འཕུར།། 6 སེར་སྣ་ཅན་གྱི་ཟས་མ༌ཟ། །དེའི་ཟས་ཞིམ་པོར་ཞེ་མ༌ཆགས།། 7 སེམས་སུ་ཅི་ལྟར་རྩིས་རྒྱག༌ན། །ཁོ་ནི་མི་ཡང་དེ་འདྲ༌ཡིན། །གསོལ་གསོལ་བཞེས་བཞེས་ཟེར་ན༌ཡང༌། །དེ་ཡི་སེམས་སུ་ཁྱོད་ནི༌མེད།། 8 ཁྱོད་ཀྱིས་ཅུང་ཙམ་ཟོས་པ༌སྐྱུག །བསྟོད་རའི་སྙན་ཚིག་སྟོར་པ༌ཡིན།། 9 གླེན་པའི་རྣ་བར་གཏམ་མ༌སྨྲ། །ཅི་ལ་ཞེ་ན་དེ་ཡིས༌ནི། །ཁྱོད་ཀྱི་ཤེས་རབ་ཚིག་ལ༌སྨད།། 10 གནའ་བོའི་མཐའ་མཚམས་མ་སྤོར༌ཅིག །དྭ་ཕྲུག་ས་ཞིང་འཕྲོག་མི༌རུང༌།། 11 དེ་དག་སྐྱབས་མགོན་ནུས་མཐུ༌ཆེ། །ཁོང་གིས་དེ་དག་ཆེད་དུ༌ནི། །དག་འབུད་མཛད་ངེས་ཡིན་པས༌སོ།། 12 ཞལ་གདམས་ལ་ནི་སེམས་འབུངས༌ཤིག །ཤེས་ཡོན་གཏམ་ལ་རྣ་བ༌གཏོད།། 13 ཕྲུ་གུར་འཇུན་དུས་ཕྱིར་མ་འཐེན། །ཁྱོད་ཀྱིས་དབྱུག་པས་དེར་བརྡུངས་ཀྱང་། །ཁོ་རང་འཆི་བར་འགྱུར་མི་སྲིད།། 14 ཅི་སྟེ་དབྱུག་པས་དེར་བརྡེགས༌ན། །དེའི་སྲོག་གཤིན་པོའི་ཡུལ་ལས༌སྒྲོལ།། 15 ངའི་བུ་ཁྱོད་ཀྱི་སེམས་ལ༌ནི། །ཤེས་རབ་ལྡན་ན་བདག་སེམས༌སྤྲོ།། 16 ཁྱོད་ཀྱི་མཆུ་ཡིས་བདེན་ལབ༌དུས། །ང་ཡི་ནང་སེམས་དགའ་མགུ༌རང༌།། 17 ཁྱོད་ཀྱི་སེམས་སུ་སྡིག་ཅན༌ལ། །ཕྲག་དོག་མ་བསྐྱེད་དུས་རྟག༌ཏུ། །ཡ་ཝཱེར་གུས་ཤིང་འཇིགས་པར༌གྱིས།། 18 དོན་ཀུན་མཇུག་འབྲས་ཡོད་ངེས༌པས། །ཁྱོད་ཀྱི་རེ་ཐག་ཆད་མི༌འགྱུར།། 19 ངའི་བུ་ཁྱོད་ཀྱིས་ཚུར་ཉོན༌ཅིག །ཤེས་རབ་དང་བཅས་རང་གི༌སེམས། །ལམ་ཁ་དེ་ལ་འཁྲིད་པར༌གྱིས།། 20 ཆང་འཐུང་རྣམས་དང་མ་འགྲོགས༌ཤིག །ཁ་ཟས་བག་མེད་སྤྱོད་པ༌ཡི། །མི་ཡང་གྲོགས་སུ་མ་འགུག༌ཅིག། 21 གང་ལ་ཞེ་ན་ཆང་འཐུང༌དང༌། །གྲོད་པོ་ཆེ་རྣམས་དབུལ་བར༌འགྱུར། །གཏི་མུག་ཅན་ནི་གོས་ཧྲུལ༌གྱོན།། 22 ཁྱོད་ཀྱིས་སྲོག་སྦྱིན་ཕ་ལ༌ཉོན། །མ་ནི་བགྲེས་པས་ཁྱད་མ༌གསོད།། 23 བདེན་པ་རག་ཅིང་འདོར༌མི་བྱ། ། ཤེས་རབ་དང་ནི་གདམས་ངག༌དང༌། །བློ་གྲོས་སོགས་ནི་འཐོབ་པར༌གྱིས།། 24 དྲང་པོའི་ཕ་ནི་རབ་ཏུ༌དགྱེས། །ཤེས་ལྡན་བསྐྱེད་པ་ཡི་རང༌འགྱུར།། 25 ཕ་མའི་སེམས་པ་དགའ་རུ༌ཆུག །ཁྱོད་རང་བཙའ་མཁན་སྤྲོ་བར༌གྱིས།། 26 ངའི་བུ་ཁྱོད་སེམས་ང་ལ༌ཐོངས། །མིག་གིས་བདག་གི་ལམ་ལ༌ལྟོས།། 27 སྨད་འཚོང་མ་ནི་དོང་རིང༌སྟེ། །བྱི་མོ་ཁྲོན་པ་གུ་དོག༌ཡིན།། 28 མོ་ནི་ཇག་པ་བཞིན་དུ༌འཇབ། །མིའི་ནང་རྒྱབ་གཏོད་མང་དུ༌སྤེལ།། 29 ཆག་སྒོ་སྡུག་བསྔལ་སུ་ལ༌ཡོད། །འཁྲུག་རྩོད་སྡུག་ཡུས་སུ་ལ༌ཡོད། །དོན་མེད་རྨས་པ་སུ་ཞིག༌ཡོད། །མིག་རྩ་དམར་པོ་ཅན་ནི༌སུ།། 30 རྟག་ཏུ་རྒུན་ཆང་འཐུང་བ༌དང༌། །རྒུན་ཆང་སྤེལ་མའི་རོ་བཅུད༌ལ། །མྱང་དུ་འགྲོ་མཁན་དེ་ཡིན༌ནོ།། 31 རྒུན་ཆང་དམར་པོ་ཕོར་བར་འོད་འཚེར༌བ། །འཇམ་པོར་ཁོག་ལ་འབབ་པ་དེར་མ༌བལྟ།། 32 མཇུག་མཐར་དེ་ཡིས་སྦྲུལ་ལྟར༌རྨུག །དུག་སྦྲུལ་ལྟར་དུ་མདུང་གིས༌གཙག། 33 མིག་གིས་ཆོ་འཕྲུལ་ལྟས་རྣམས༌མཐོང༌། །སེམས་ནས་གོ་ལོག་གཏམ་རྣམས༌སྨྲ།། 34 རྒྱ་མཚོའི་དཀྱིལ་དུ་ཉལ་བ༌འམ། །གྲུ་ཡི་རྩེ་མོར་ཉལ་བ༌འདྲ།། 35 དེ་ནས་ཁྱོད་ཀྱིས་དེ་དག༌གིས། །ང་ལ་བརྡུངས་ཀྱང་ཟུག་མ༌བྱུང༌། །ང་ལ་བརྡེགས་ཀྱང་ཚོར་བ༌མེད། །བདག་ནི་ནམ་ཞིག་སད་ཡོང༌ངམ། །ད་དུང་རྒུན་ཆང་འཚོལ་དུ༌འགྲོ། །ཞེས་སུ་སྨྲ་བར་འགྱུར་བ༌འོ།། |
(cc) 2016-2023 པར་དབང་དམ་པའི་གསུང་རབ་བོད་འགྱུར་གསར་མའི་རྩོམ་སྒྲིག་སྡེ་ཚན་ལ་དབང་བ་ཡིན།
(cc) 2016-2023 New Tibetan Bible translation committee.
The Holy Bible in Modern Literary Tibetan, New Tibetan Bible translation.
This translation is made available under the terms of the Creative Commons Attribution-NonCommercial-NoDerivatives 4.0 International license.
* Attribution: When using the New Tibetan Bible text, you must credit the New Tibetan Bible (new-tibetan-bible.com) as the source.
* NonCommercial: You may not sell the New Tibetan Bible text or use it for commercial purposes.
* NoDerivatives: You may share the New Tibetan Bible text, but you may not change it.