ལེགས་བཤད 20 - New Tibetan Bible བོད་འགྱུར་གསར་མ།ལེའུ་ཉི་ཤུ༌པ། 1 རྒུན་ཆང་གིས་ནི་འཕྱ་སྨོད་སློང་བ༌དང༌། །གར་ཆང་འུར་སྒྲ་སློང་བའི་རྒྱུ་ཡིན༌ལ། །ཆང་གིས་ཉེས་སྐྱོན་བཟོ་བར་ཤེས་རབ༌དབེན།། 2 རྒྱལ་པོའི་ཐུགས་ཁྲོ་སེང་གེའི་ང་རོ༌བཞིན། །དེ་ལ་ཁོང་ཁྲོ་སློང་བས་རང་སྲོག༌འདོར།། 3 རྩོད་གཞིར་གཡོལ་བ་མི་ཡི་གཟི་དཔལ༌ཡིན། །བླུན་པོ་ཡིན་ཚད་འཁོན་འཛིང་ལ་དགའ༌འོ།། 4 ལེ་ལོ་ཅན་གྱིས་དུས་ལྟར་ཞིང་མི༌རྨོ། །སྟོན་དུས་འཚོལ་བར་བྱེད་ཀྱང་འཐོབ་བྱ༌མེད།། 5 སེམས་ཀྱི་ཐབས་ཇུས་གཏིང་ཟབ་ཆུ་དང༌འདྲ། །བློ་ལྡན་ཁོ་ནས་དེ་ཕྱིར་འདོན་པ༌ཡིན།། 6 མང་པོས་རང་ཉིད་བློ་སེམས་དཀར་ཞེས༌སྒྲོག །བློ་གཏད་རུང་བར་སུ་ཞིག་འཕྲད་ནུས༌སམ།། 7 སྤྱོད་པ་སྐྱོན་བྲལ་སྐྱེས་བུ་དམ་པ༌ཡི། །བུ་རབས་ཚ་རྒྱུད་བྱིན་རླབས་ཆེ་བ༌འོ།། 8 ཉེས་ཆད་གཅོད་པའི་རྒྱལ་ཁྲི་ལ་བཞུགས༌པའི། །རྒྱལ་པོའི་སྤྱན་གྱིས་ངན་པ་ཐམས་ཅད༌གཤེར།། 9 བདག་གིས་རང་གི་སེམས་པ་གཙང་མར༌བྱས། །དྭངས་གཙང་སྡིག་བྲལ་ཡིན་ཞེས་སུས་བརྗོད༌ནུས།། 10 རྒྱ་སྲང་དང་ནི་འཇལ་བྱེད་ཐ་དད༌པ། །གཉིས་ཀར་ཡ་ཝཱེ་ཁོང་ཉིད་ཞེ་ལོག༌གོ། 11 བྱིས་པའི་སྤྱོད་ལུགས་གཙང་ཞིང་དྲང་མིན༌ནི། །དེ་ཡི་བྱ་སྤྱོད་ཀྱིས་ནི་གསལ་པོར༌མངོན།། 12 ཐོས་བྱེད་རྣ་བ་མཐོང་བྱེད༌མིག །གཉིས་པོ་ཡ་ཝཱེས་བཀོད་ལགས༌སོ།། 13 གཏི་མུག་གཉིད་ལ་མ་ཆགས་ཕོངས་པའི༌རྒྱུ། །མིག་ནི་ཕྱེས་ན་ད་གཟོད་འགྲང་བར༌འགྱུར།། 14 ཚོང་ཟོག་ཉོ་དུས་ཡང་ཡང་མི་ལེགས༌ཟེར། །དེ་ནས་ཐོན་རྗེས་རང་ལ་བསྟོད་ར་བྱེད།། 15 གསེར་དང་པདྨ་ར་ག་མོད༌ན་ཡང་། །ཤེས་ཡོན་གཏམས་པའི་མཆུ་སྒྲོས་ནོར་ལས༌ལྷག། 16 སུ་ཞིག་རྒྱུས་མེད་འགན་ལེན་བྱེད་ན༌ནི། །དེ་ཡི་ཕྱི་གོས་ལེན་པར་གྱིས་ཤིག༌དང༌། །དེ་ཡིས་ཕྱི་མིའི་འགན་ལེན་བྱེད་ན༌ནི། །དེ་ནི་འགན་ལེན་པ་རུ་འགྱུར་དགོས༌སོ།། 17 གཡོ་སྒྱུས་རག་པའི་ཁ་ཟས་མི་ལ༌ཞིམ། །འོན་ཀྱང་ཕྱིས་སུ་ཁ་ནང་ཟེགས་མས༌གང༌།། 18 ཇུས་འགོད་བགྱིས་ན་ཇུས་གཞི་ཚུགས་པ༌དང༌། །གཡུལ་འགྱེད་པ་ཡང་ཇུས་བཟང་ལ་བརྟེན༌དགོས།། 19 གང་སར་ངག་ཀྱལ་སྨྲ་བས་གསང་གཏམ༌འཆོར། །ཆོ་མེད་སྨྲ་བའི་མི་ལ་འགྲོགས་མི༌རུང༌།། 20 ཕ་མར་དམོད་མཁན་དེ་ཡི་སྒྲོན་མེ༌ནི། །སྨག་རུམ་སྟུག་པོའི་ནང་དུ་ཞི་བར༌འགྱུར།། 21 ཐོག་མར་མྱུར་དུ་རྙེད་པའི་ནོར་སྐལ༌ནི། །མཇུག་མཐར་བྱིན་རླབས་སུ་ནི་གྱུར་པ༌མེད།། 22 བདག་གིས་ངན་ལན་འཇལ་ལོ་ཞེས་མ༌ཟེར། །ཡ་ཝཱེར་སྒུགས་དང་ཁོང་གིས་ཁྱོད་རང༌སྐྱོབ།། 23 ཐ་དད་རྒྱ་མར་ཡ་ཝཱེ་ཞེན་པ༌ལོག །གཡོ་ཟོལ་ཅན་གྱི་སྲང་ཡང་མི་ལེགས༌སོ།། 24 མི་ཡི་བགྲོད་ལམ་ཡ་ཝཱེས་གཏན་ལ༌འབེབ། །མི་ཡིས་རང་གི་བགྲོད་ལམ་ཇི་ལྟར༌རྟོགས།། 25 སུ་ཡིས་འཚབ་འཚུབ་ངང་ནས་དཀོན་མཆོག༌ཕྱིར། །འདི་ནི་དམ་པ་ཡིན་ཞེས་དམ་བཅས༌རྗེས། །བསམ་གཞིགས་གཏོང་བས་རང་ཉིད་རྙི་རུ༌ཚུད།། 26 རྒྱལ་པོ་མཁས་པས་ངན་པ་རྣམས་གཏོར༌ཞིང༌། །དེ་དག་འཁོར་ལོས་བཅག་བཅག་བྱེད་པ༌ཡིན།། 27 མི་ཡི་སེམས་ནི་ཡ་ཝཱེའི་སྒྲོན་མེ༌ཡིན། །ཕུགས་ཀྱི་བློ་སེམས་གསལ་པོར་འོད་དུ༌དགྱེ།། 28 བྱམས་བརྩེ་དྲང་བདེན་རྒྱལ་པོའི་སྲུང་སྐྱོབ༌ཡིན། །བྱམས་བརྩེས་ཁོང་གི་རྒྱལ་ཁྲི་བརྟན་པར༌མཛད།། 29 སྟོབས་ནི་སྟག་ཤར་གཞོན་པའི་དཔལ་ཡིན༌ལ། །དབུ་སྐྲ་དཀར་པོ་བགྲེས་པོའི་རྒྱན་ཆ༌ཡིན།། 30 ལྕག་ཚན་བསྣུན་པའི་རྨ་ཁས་ངན་པ༌སེལ། །རྡུང་རྡེག་གིས་ནི་ནང་སེམས་གཙང་མར༌མཛད།། |
(cc) 2016-2023 པར་དབང་དམ་པའི་གསུང་རབ་བོད་འགྱུར་གསར་མའི་རྩོམ་སྒྲིག་སྡེ་ཚན་ལ་དབང་བ་ཡིན།
(cc) 2016-2023 New Tibetan Bible translation committee.
The Holy Bible in Modern Literary Tibetan, New Tibetan Bible translation.
This translation is made available under the terms of the Creative Commons Attribution-NonCommercial-NoDerivatives 4.0 International license.
* Attribution: When using the New Tibetan Bible text, you must credit the New Tibetan Bible (new-tibetan-bible.com) as the source.
* NonCommercial: You may not sell the New Tibetan Bible text or use it for commercial purposes.
* NoDerivatives: You may share the New Tibetan Bible text, but you may not change it.