ལེགས་བཤད 19 - New Tibetan Bible བོད་འགྱུར་གསར་མ།ལེའུ་བཅུ་དགུ༌པ། 1 ཁ་རུ་གཡོ་འཕྲུལ་གང་བའི་གླེན་པ༌ལས། །སྤྱོད་པ་སྐྱོན་དང་བྲལ་བའི་དབུལ་པོ༌ལེགས།། 2 མི་ལ་ཤེས་ཡོན་མེད་ན་ཐན་ཡིན༌ཞིང༌། །གོམ་འགྲོས་མྱུར་བ་ལམ་ནོར་འགྲོ་ཉེན༌ཆེ།། 3 མི་ཡི་རྨོངས་པས་རང་གི་བགྲོད་ལམ༌བརླག །དེ་ཡི་སེམས་ནི་ཡ་ཝཱེར་ཁྲོ་བ༌ཡིན།། 4 ནོར་གྱིས་མཛའ་བོ་མང་དུ་སྤེལ་བ༌དང༌། །དབུལ་པོ་མཛའ་གྲོགས་གཅིག་རང་ཡོད་པས༌འདོར།། 5 རྫུན་གྱི་དཔང་པོར་ཉེས་ཆད་འཕོག་པར༌འགྱུར། །རྫུན་གཏམ་སྨྲ་བ་ཐར་བར་མི་འགྱུར༌རོ།། 6 བཀུར་སྟི་ཅན་ལ་མང་པོས་ངོ་སོ༌བྱེད། །གཏོང་ཕོད་ཆེ་ན་མི་ཀུན་གྲོགས་སུ༌འགྱུར།། 7 དབུལ་པོ་ལ་ནི་སྤུན་ཡང༌སྡང༌། །མཛའ་གྲོགས་དེ་དང་རིང་དུ༌གྱེས། །ཞུ་བ་ནན་གྱིས་ཕུལ་ན༌ཡང༌། །དེ་རྣམས་ཁ་ཡ་བྱེད་པ༌མིན།། 8 ཤེས་རབ་ཐོབ་པས་རང་སྲོག་གཅེས་སུ༌འཛིན། །གོ་རྟོགས་སྲུང་བར་ཕན་པ་འཐོབ་པར༌འགྱུར།། 9 རྫུན་གྱི་དཔང་པོར་ཉེས་ཆད་འཕོག་པར༌འགྱུར། །རྫུན་གཏམ་སྨྲ་བ་མཐའ་མཇུག་མེད་པར༌འགྱུར།། 10 གླེན་པ་རྒྱས་སྤྲོས་ལ་ནི་མི་འཚམ༌ན། །གཡོག་པོས་རྒྱལ་བུར་དབང་བྱེད་ལྟ་ཅི༌སྨོས།། 11 ཤེས་རབ་ཀྱིས་ནི་མི་ལ་བཟོད་སྒོམ༌གནང༌། །གཞན་སྐྱོན་གུ་ཡངས་གཏོང་བ་རང་གི༌དཔལ།། 12 རྒྱལ་པོའི་ཐུགས་ཁྲོ་སེང་གེའི་ང་རོ༌བཞིན། །ཁོང་གི་ཐུགས་རྗེ་རྩྭ་མགོའི་ཟིལ་བ༌འདྲ།། 13 བུ་བླུན་ཕ་ཡི་ཆག་སྒོ་ཡིན་པ༌དང༌། །ཆུང་མ་འཁོན་ཞུགས་ཆར་ཐིགས་འཐིག་པ༌འདྲ།། 14 ཁྱིམ་དང་རྒྱུ་ནོར་ཕ་བཞག་ནོར་སྐལ༌ཡིན། །ཆུང་མ་མཛངས་མ་ཡ་ཝཱེས་གནང་བ༌འོ།། 15 སྒྱིད་ལུག་གིས་ནི་གཏི་མུག་གནས་སུ༌བསྐྱལ། །ལེ་ལོ་ཅན་གྱིས་བཀྲེས་ལྟོགས་མྱོང་བར༌འགྱུར།། 16 བཀའ་རྒྱ་སྲུང་བས་རང་སྲོག་སྲུང་བྱེད༌ཅིང༌། །སྤྱོད་ལམ་སྣང་མེད་བསྐྱུར་བ་འཆི་བར༌འགྱུར།། 17 དབུལ་པོ་དྲིན་གྱིས་སྐྱོང་བ༌ནི། །ཡ་ཝཱེར་བུ་ལོན་གཏོང་བ༌ཡིན། །དེ་ཡིས་ཅི་བྱས་ཡ་ཝཱེས༌ཚབ།། 18 རེ་བ་ཡོད་དུས་བུ་ལ་གཅུན་དགོས༌ཤིང༌། །བསམ་བཞིན་བུ་དེ་འཆི་བར་མི་བྱ༌འོ།། 19 ནམ་རྒྱུན་རབ་ཏུ་ཁྲོ་བའི་མི་ལ་ཆད་པ༌འཕོག །དེ་ལ་རོགས་རམ་བྱས་ཚེ་ཡང་ཡང་བྱེད་དགོས༌འགྱུར།། 20 ཁྱོད་ནི་ཕུགས་སུ་མཁས་པར་འགྱུར་ཕྱིར༌དུ། །ཁ་ཏར་མཉན་ནས་འཆུན་འདོམས་དང་ལེན༌གྱིས།། 21 མི་ཡི་སེམས་སུ་ཐབས་ཇུས་མང༌ན་ཡང་། །ཡ་ཝཱེའི་དགོངས་དོན་འབའ་ཞིག་བརྟན་པོར༌ཚུགས།། 22 མི་ཡི་འདུན་པ་བློ་སེམས་དཀར་བ༌ཡིན། །རྫུན་གཏམ་ལབ་པའི་མི་ལས་དབུལ་པོ༌ལེགས།། 23 ཡ་ཝཱེར་གུས་ཤིང་འཇིགས་པར་ཚེ་སྲོག༌འཐོབ། །བདེ་ཞིང་ཚིམ་པར་གནས་ཤིང་བར་ཆད༌མེད།། 24 ལེ་ལོས་སྡེར་མའི་ནང་དུ་ལག་བརྐྱངས༌ནས། །ཁ་ཟས་རང་གི་ཁ་ལ་སྐྱེལ་མི༌འདོད།། 25 འཕྱ་སྨོད་མཁན་ལ་བརྡུང་ན༌ནི། །བླུན་རྨོངས་ཡིན་ཡང་གྲུང་པོར༌འགྱུར། །བློ་རིག་ཅན་ལ་བཀྱོན་པ༌ན། །དེ་ཡིས་ཤེས་བྱ་རྟོགས་འགྱུར༌རོ།། 26 ཕ་ལ་མནར་ཞིང་མ་ཡང་སྐྲོད་པ༌ནི། །ཞབས་འདྲེན་དང་ནི་ངོ་ཚའི་བུ་ཡིན༌ནོ།། 27 ངའི་བུས་ཁ་ཏར་ཉན་པ་མཚམས་བཞག༌ན། །ཤེས་ཡོན་ལྡན་པའི་ཚིག་དང་འབྲལ་བ༌འོ།། 28 ཁྲམ་པས་དཔང་པོ་བྱས་ན་དྲང་གཞག༌སྨད། །ངན་པའི་ཁ་ཡིས་སྡིག་ཉེས་ཁྱུར་མིད༌བྱེད།། 29 འཕྱ་སྨོད་མཁན་ལ་ཁྲིམས་ཆད་ཡོད་པ༌དང༌། །གླེན་པའི་རྒྱབ་ལ་རྡེག་ཕྱིར་རྟ་ལྕག༌ཡོད།། |
(cc) 2016-2023 པར་དབང་དམ་པའི་གསུང་རབ་བོད་འགྱུར་གསར་མའི་རྩོམ་སྒྲིག་སྡེ་ཚན་ལ་དབང་བ་ཡིན།
(cc) 2016-2023 New Tibetan Bible translation committee.
The Holy Bible in Modern Literary Tibetan, New Tibetan Bible translation.
This translation is made available under the terms of the Creative Commons Attribution-NonCommercial-NoDerivatives 4.0 International license.
* Attribution: When using the New Tibetan Bible text, you must credit the New Tibetan Bible (new-tibetan-bible.com) as the source.
* NonCommercial: You may not sell the New Tibetan Bible text or use it for commercial purposes.
* NoDerivatives: You may share the New Tibetan Bible text, but you may not change it.