ལེགས་བཤད 11 - New Tibetan Bible བོད་འགྱུར་གསར་མ།

ལེའུ་བཅུ་གཅིག༌པ།

¹ འཁྱོག་པའི་སྲང་ལ་ཡ་ཝཱེ་ཞེན་ལོག༌ཅིང༌། །རྒྱ་རྡོ་དྲང་པོར་ཁོང་ཉིད་ཐུགས་དགྱེས༌སོ།།

² ང་རྒྱལ་སླེབ་དུས་ངོ་ཚ་མཉམ་དུ༌འོང༌། །ཁེངས་སྐྱུང་མི་ལ་ཤེས་རབ་ལྡན་པ༌ཡིན།།

³ དྲང་པོའི་དྲང་བ་ཉིད་ཀྱིས་རང་ལ་ལམ་སྟོན༌ཞིང༌། །ལོག་སྤྱོད་ཅན་གྱི་གཡོ་སྒྱུས་རང་ཉིད་བརླག་པར༌བྱེད།།

⁴ དཀོན་མཆོག་ཐུགས་ཁྲོའི་ཉིན་མོར་ནོར་གྱིས་ཕན་མི༌ཐོགས། །དྲང་བདེན་ཁོ་ནས་འཆི་བ་ཉིད་ལས་སྐྱོབ་པར༌བྱ།།

⁵ སྐྱོན་དང་བྲལ་བའི་མི་ཡི་དྲང་བདེན་གྱིས། །རང་གི་བགྲོད་ལམ་བདེ་ཞིང་དྲང་བར་བྱེད། །མི་ངན་རང་གི་ངན་པས་བསྒྱེལ་བ༌ཡིན།།

⁶ དྲང་པོའི་དྲང་བདེན་གྱིས་ནི་རང་ཉིད༌སྐྱོབ། །གདུག་སྤྱོད་ཅན་རྣམས་འདོད་པ་ངན་པས༌ཟིན།།

⁷ ངན་པ་འཆི་བའི་དུས་སུ་རེ་བ༌ཡལ། །ནུས་པ་ཅན་གྱི་འདུན་པའང་མེད་པར༌འགྱུར།།

⁸ དྲང་པོ་བསྐྱབས་ནས་སྡུག་བསྔལ་ལས་ཐར༌ཞིང༌། །ངན་པ་དེ་ཡི་ཚབ་ཏུ་ལྟུང་བར༌འགྱུར།།

⁹ དད་མེད་རྣམས་ཀྱིས་སྨྲ་སྒོས་ཁྱིམ་མཚེས༌བརླག །དྲང་པོ་ཤེས་ཡོན་དབང་གིས་དེ་ལས༌ཐར།།

¹⁰ དྲང་པོ་འཕེལ་དུས་གྲོང་ཁྱེར་ཡོངས་སུ༌སྤྲོ། །ངན་པ་འཆི་དུས་ཀུན་གྱིས་དགའ་འབོད༌བྱེད།།

¹¹ དྲང་པོའི་བྱིན་རླབས་ཀྱིས་ནི་གྲོང་ཁྱེར༌འདེགས། །ངན་པའི་སྨྲ་སྒོས་གྲོང་ཁྱེར་བརླག་པ༌ཡིན།།

¹² གོ་བ་མེད་པས་ཁྱིམ་མཚེས་ལ་སྨད༌ཅིང༌། །བློ་རིག་ཅན་གྱིས་ཅི་ཡང་སྨྲ་བ༌མིན།།

¹³ ངག་ཀྱལ་ཅན་གྱིས་གསང་གཏམ་ཕྱི་ལ༌འཆོར། །གཞུང་རྒྱུད་དྲང་པོས་དོན་རྣམས་གསང་བར༌བྱེད།།

¹⁴ ལམ་སྟོན་མེད་པའི་མི་རིགས་ལྟུང་བར༌འགྱུར། །གྲོས་མི་མང་ན་རྒྱལ་ཁ་ལོན་ངེས༌ཡིན།།

¹⁵ རྒྱུས་མེད་འགན་ལེན་བྱེད་པར་གོད་ཆེ༌ཡང༌། །ཁག་འཁུར་ལེན་པར་སྡང་མཁན་བདེ་འཇགས༌ཡིན།།

¹⁶ བུད་མེད་བྱམས་སེམས་ཅན་ལ་གུས་པ༌འཐོབ། །སྐྱེས་པ་གདུག་རྩུབ་ཅན་གྱིས་རྒྱུ་ནོར༌རྙེད།།

¹⁷ སྙིང་རྗེ་ཅན་གྱིས་རང་ལ་ཕན་འདོགས༌ཤིང༌། །གདུག་སྤྱོད་ཅན་གྱིས་རང་ལ་འཚེ་བ༌ཡིན།།

¹⁸ ངན་པས་རག་པའི་གླ་ཆ་རྫུན་མ༌ཡིན། །དྲང་བདེན་བྱེད་པར་ཏན་ཏན་རྔན་པ་འཐོབ།།

¹⁹ ཡུན་རིང་དྲང་བདེན་སྐྱོང་བར་ཚེ་སྲོག༌འཐོབ། །ངན་པ་སྙེག་མཁན་འཆི་བའི་གནས་སུ༌ལྷུང༌།།

²⁰ གཡོ་སྒྱུའི་སེམས་ལ་ཡ་ཝཱེ་ཞེན་ལོག༌ཅིང༌། །སྤྱོད་པ་ཕུལ་བྱུང་ཅན་ལ་ཁོང་ནི༌དགྱེས།།

²¹ ངན་པར་ཉེས་ཆད་འཕོག་པ་གདོན་མི༌ཟ། །འོན་ཀྱང་དྲང་པོའི་བུ་རྒྱུད་ཐར་ངེས༌ཡིན།།

²² བུད་མེད་བྱད་བཟང་ཚུལ་དང་མི་མཐུན༌ན། །ཕག་གི་སྣ་བར་གསེར་གྱི་སྣ་གཅུ༌བཞིན།།

²³ དྲང་པོའི་རེ་འདོད་ཐམས་ཅད་ཡིད་དུ༌འོང༌། །ངན་པའི་རེ་བས་ཁོང་ཁྲོ་སློང་བ༌འོ།།

²⁴ གཏོང་ཕོད་ཅན་ལ་རྒྱུ་ནོར་འཕེལ་བ༌དང༌། །སེར་སྣ་ཚད་མེད་བྱེད་མཁན་དབུལ་བར༌འགྱུར།།

²⁵ གཏོང་ཕོད་ཆེ་བའི་མི་ལ་འབྱོར་བ༌རྒྱས། །གཞན་ལ་ཕན་པར་བྱས་ན་རང་ལ༌ཕན།།

²⁶ འབྲུ་རིགས་མཛོད་ལ་གསོག་པར་མི་ཡིས༌དམོད། །འབྲུ་རིགས་འཚོང་མཁན་མགོ་ལ་བྱིན་རླབས༌འཐོབ།།

²⁷ འབད་པས་བཟང་པོ་བསྙེག་པར་བཟང་འཐོབ༌ཅིང༌། །ངན་པ་སྙེག་མཁན་ལ་ནི་ངན་པ༌འཁོར།།

²⁸ རང་གི་ནོར་ལ་བརྟེན་མཁན་ཉམས་པར༌འགྱུར། །དྲང་པོ་ལོ་འདབ་སྔོན་པོ་བཞིན་དུ༌རྒྱས།།

²⁹ རང་ཁྱིམ་སྡུག་ལ་སྦྱོར་བར་རླུང་ཙམ༌འཐོབ། །བླུན་པོ་མཁས་པའི་གཡོག་པོར་འགྱུར་བ༌འོ།།

³⁰ དྲང་པོའི་འབྲས་བུ་སྲོག་གི་ལྗོན་ཤིང༌ཡིན། །ཤེས་རབ་ཅན་གྱིས་མི་སེམས་འགུག་པར༌ནུས།།

³¹ དྲང་པོར་འཇིག་རྟེན་འདི་རུ་ལན་འཕོག༌ན། །ངན་པ་དང་ནི་སྡིག་ཅན་ལྟ་ཅི༌སྨོས།།