ཡེ་ཤ་ཡཱ 15 - New Tibetan Bible བོད་འགྱུར་གསར་མ།ལེའུ་བཅོ་ལྔ་པ། མོ་ཨབ་ཕམ་པར་མཛད་པའི་ལུང་བསྟན། 1 དེ་ཡང་མོ་ཨབ་སྐོར་གྱི་བཀའ་ལུང་ནི། མོ་ཨབ་ཀྱི་ཨར་ནི་ཞག་མ་གཅིག་གི་རིང་ལ་བརྙས་བཅོས་ཐེབས་ནས་མེད་པར་གྱུར་ཅིང་། ཡང་ཞག་མ་གཅིག་གི་རིང་ལ་མོ་ཨབ་ཀྱི་ཀིར་ལའང་བརྙས་བཅོས་ཐེབས་ཏེ་མེད་པར་གྱུར་ཏོ། ། 2 ཁོ་རྣམས་ཁང་པའི་ནང་དུ་འགྲོ་བ་དང་། དི་བོན་གྱི་མཐོ་སར་ཕྱིན་ཏེ་ངུ་འབོད་བྱེད་ལ། མོ་ཨབ་པ་རྣམས་ཀྱིས་ནེ་བོ་དང་མེ་དེ་བཱའི་ཕྱིར་དུ་སྨྲེ་སྔགས་འདོན་ཞིང་། སྐྱེ་བོ་ཀུན་གྱིས་སྐྲ་དང་སྨྲ་ར་བཞར། 3 དེ་དག་གིས་སྲང་ལམ་དུ་རྩིད་རས་གྱོན་ནས་ཁང་ཐོག་དང་ཐང་ཆེན་དུ་མི་རེ་རེས་མིག་ཆུ་བཏོན་ནས་ངུ་འབོད་བྱེད། 4 ཧེ་སི་པོན་དང་ཨེལ་ཨ་ལེ་གཉིས་པོའི་ངུ་འབོད་ཀྱི་སྒྲ་ནི་ཡ་ཧ་ཙཱ་ནས་ཀྱང་ཐོས་པར་གྱུར་པས། མོ་ཨབ་ཀྱི་དམག་མི་རྣམས་ཀྱིས་སྐད་ཆེན་པོས་ངུ་འབོད་བྱེད་ཅིང་སྙིང་རྩ་འདར། 5 མོ་ཨབ་ཀྱི་ཆེད་དུ་བདག་གི་སེམས་ངུས་སོང་། དེའི་བྲོས་བྱོལ་པ་རྣམས་ཚོ་ཨར་དང་ཨེག་ལད་ཤེ་ལི་ཤི་ཡཱ་རུ་སླེབས་ཤིང་། ལུ་ཧིད་ཀྱི་རི་ལ་འགོས་པ་དང་། ཧོ་རོ་ན་ཨིམ་གྱི་ལམ་དུ་མེད་པར་འགྱུར་བའི་ངུ་སྐད་འདོན་ནོ། ། 6 ནིམ་རིམ་གྱི་ཆུ་རྣམས་ཆད་ཅིང་། རྩྭ་སྔོན་རྣམས་སྐམ། རྩྭ་གསར་པ་རྣམས་རྙིད་པར་གྱུར་ནས་ལྗང་མདོག་གཅིག་ཀྱང་མ་ལུས། 7 དེ་བས་ཁོ་ཚོས་རང་ཉིད་ལ་ཐོབ་པ་དང་བསགས་པའི་རྒྱུ་ནོར་རྣམས་ཨ་རཱ་ཡིམ་གྲོག་རོང་ལ་ཁྱེར་ཏོ། ། 8 དེ་དག་གི་ངུ་འབོད་མོ་ཨབ་ཀྱི་ཡུལ་ཀུན་ཏུ་ཁྱབ་ཅིང་། ངུ་སྐད་ནི་ཨེག་ལ་ཡིམ་དུ་སླེབས་པ་དང་། པེར་ཨེ་ལིམ་གྱི་བར་དུ་གྲགས་སོ། ། 9 དི་བོན་གྱི་ཆུ་རྣམས་ཁྲག་གིས་བཀང་སྟེ། བདག་གིས་དེ་ལས་མང་བའི་གནོད་འཚེ་དེ་རྣམས་ལ་ཐེབས་སུ་འཇུག་ཅིང་། བྲོས་བྱོལ་པ་དང་ཤུལ་ལུས་མོ་ཨབ་པའི་ཐོག་ཏུ་སེང་གེ་ཞིག་གཏོང་བར་བྱའོ། ། |
(cc) 2016-2023 པར་དབང་དམ་པའི་གསུང་རབ་བོད་འགྱུར་གསར་མའི་རྩོམ་སྒྲིག་སྡེ་ཚན་ལ་དབང་བ་ཡིན།
(cc) 2016-2023 New Tibetan Bible translation committee.
The Holy Bible in Modern Literary Tibetan, New Tibetan Bible translation.
This translation is made available under the terms of the Creative Commons Attribution-NonCommercial-NoDerivatives 4.0 International license.
* Attribution: When using the New Tibetan Bible text, you must credit the New Tibetan Bible (new-tibetan-bible.com) as the source.
* NonCommercial: You may not sell the New Tibetan Bible text or use it for commercial purposes.
* NoDerivatives: You may share the New Tibetan Bible text, but you may not change it.