སྟོན་པ། 11 - New Tibetan Bible བོད་འགྱུར་གསར་མ།

ལེའུ་བཅུ་གཅིག་པ། ཤེས་རབ་ཅན་གྱི་བྱ་གཞག

¹ རང་གི་འབྲུ་རིགས་ཆུ་ཁར་གཏོར་ཞིག་དང་། ། ཡུན་རིང་འདས་རྗེས་སླར་ཡང་རྙེད་པར་འགྱུར། །

² ས་སྟེང་ཆག་སྒོ་ཅི་འབྱུང་མི་ཤེས་པས། ། བདུན་གྱིས་མ་ཚད་བརྒྱད་ལ་སྐལ་བྱིན་ཅིག །

³ ཇི་སྟེ་སྤྲིན་པ་ཆུ་ཡིས་གང་གྱུར་ན། ། དེ་ལས་ས་ལ་ཆར་བ་གཤོ་བར་འགྱུར། ། ཤིང་སྡོང་ལྷོ་བྱང་གང་དུ་འགྱེལ་ན་ཡང་། ། གང་ནས་འགྱེལ་ན་དེ་རུ་ལུས་པ་ཡིན། །

⁴ རླུང་ལ་ལྟ་མཁན་དེས་ནི་སོན་མི་འདེབས། ། སྤྲིན་ལ་ལྟ་མཁན་གྱིས་ཀྱང་ཞིང་མི་རྔ། །

⁵ ཁྱོད་ཀྱིས་རླུང་རྒྱུ་བའི་ལམ་དང་མངལ་གྱི་ནང་དུ་རུས་པ་ཇི་ལྟར་སྐྱེ་བ་མི་ཤེས་པ་བཞིན། ཐམས་ཅད་མཛད་པའི་དཀོན་མཆོག་གི་འཕྲིན་ལས་ནི་ཁྱོད་ཀྱིས་དེ་ལས་ཀྱང་མི་ཤེས་སོ། །

⁶ ཞོགས་པར་རང་གི་ས་བོན་གཏོར་ལ། དགོང་མོ་ཡང་ལག་པ་དལ་བར་མ་བྱེད། ཅིའི་ཕྱིར་ཞེ་ན། ཞོགས་པར་གཏོར་བའམ་ཡང་ན་དགོང་མོ་བཏབ་པ་གཉིས་ལས་གང་ཞིག་ལེགས་པོ་འབྱུང་བའམ། ཡང་ན་དེ་གཉིས་ཀ་ཁྱད་མེད་པར་ལེགས་པོ་འབྱུང་བ་ཁྱོད་ཀྱིས་མི་ཤེས་པས་སོ། །

⁷ འོད་ནི་བཟང་པོ་ཡིན་ཏེ། མིག་གིས་ཉི་འོད་མཐོང་བ་ནི་སྐྱིད་ཡིན།

⁸ ཇི་སྟེ་མི་ཞིག་ལོ་མང་པོར་གསོན་ན་དེ་ཐམས་ཅད་ཀྱི་ནང་དུ་དགའ་བར་འོས་མོད། འོན་ཀྱང་མུན་པའི་ཉིན་མོ་རྣམས་ཀྱང་དྲན་པར་གྱིས། ཅིའི་ཕྱིར་ཞེ་ན། དེ་འདྲའི་ཉིན་མོ་མང་ཙམ་ཡོད་པར་འགྱུར་ཏེ། འབྱུང་འགྱུར་ཐམས་ཅད་སྟོང་པ་ཡིན་ནོ། །

ན་གཞོན་ལ་གཞག་པའི་བསླབ་བྱ།

⁹ ཀྱེ་ན་གཞོན་ཚོ། རང་ཉིད་ན་གཞོན་ཡིན་དུས་དགའ་མགུར་སྤྱོད་དང་། རང་གི་ལོ་ན་གཞོན་པའི་ཉིན་མོ་རྣམས་ལ་སེམས་སྐྱིད་པར་བྱོས། ཡང་རང་གི་སེམས་ནས་གང་ཞིག་བསྒྲུབ་འདོད་པ་དང་། མིག་གིས་ཅི་ལ་བལྟ་འདོད་པ་བཞིན་བྱོས་དང་། ཡིན་ནའང་དོན་དེ་ཐམས་ཅད་ཀྱི་ཕྱིར་དུ་དཀོན་མཆོག་གིས་ཁྱོད་ལ་འདྲི་གཅོད་བྱེད་ངེས་པ་ཤེས་དགོས།

¹⁰ རང་སེམས་ཀྱི་སྡུག་བསྔལ་དོར་ནས་རང་གི་ལུས་ནས་དཀའ་ངལ་བསལ་བར་གྱིས། ཅིའི་ཕྱིར་ཞེ་ན། གཞོན་དུས་དང་དར་དུས་གང་ཡིན་ཡང་སྟོང་པ་ཡིན་ནོ། །