ཀོ་རིན་ཐུ་པ། ༡ 15 - New Tibetan Bible བོད་འགྱུར་གསར་མ།

ལེའུ་བཅོ་ལྔ༌པ། ཡེ་ཤུ་མཱ་ཤི་ཀའི་སླར་གསོན༌སྐོར།

¹ སྤུན་ཟླ༌རྣམས། ད་ལྟ་བདག་གིས་སྔོན་ཆད་ཁྱོད་རྣམས་ལ་བསྒྲགས་མྱོང་བའི་འཕྲིན་བཟང་ཁྱོད་རྣམས་ཀྱིས་རྟོགས་དགོས་པ་དེ་སྨྲ་བར༌བྱ་སྟེ། འཕྲིན་བཟང་དེ་ནི་ཁྱོད་ཅག་གིས་དང་དུ་བླངས་ཤིང་དེ་ལ་བརྟེན་ནས་དད་པ་བརྟན་པོར་གནས༌པ་ཡིན་ནོ།།

² བདག་གིས་བསྒྲགས་པའི་འཕྲིན་བཟང་དེ་ཉིད་ཁྱོད་རྣམས་ཀྱིས་རྒྱུན་འཁྱོངས་བྱས༌ན། འཕྲིན་བཟང་དེ་ལ་བརྟེན་ནས་ཁྱོད་ཅག་ལ་ཐར་པ་འཐོབ་ངེས༌ཤིང༌། དེ་ལྟར་མ་ཡིན༌ན། ཁྱོད་ཅག་གིས་དད་པ་བྱས་པར་སྙིང་པོ་མེད༌དོ།།

³ དེ་ཡང་སྔོན་ཆད་བདག་གིས་འཕྲིན་བཟང་གལ་ཆེན་དེ་ཉིད་དང་དུ་བླངས་ཤིང་ཁྱོད་རྣམས་ལའང་བསྒྲགས་མྱོང༌སྟེ། གསུང་རབ་ལས་གསུངས་པ༌བཞིན། སྐྱབས་མགོན་མཱ་ཤི་ཀ་ནི་བདག་ཅག་གི་སྡིག་པའི་ཕྱིར་སྐུ་གྲོངས༌ཤིང༌།

⁴ སྐུ་གདུང་དུར་དུ་བཅུག་པ་ཡིན། ཡང་གསུང་རབ་ལས་གསུངས་པ༌བཞིན། ཉིན་གསུམ་པར་ཁོང་ཉིད་སླར་གསོན་དུ་མཛད་པར་མ༌ཟད།

⁵ ཀེ་ཕཱ་ལ་མངོན་པར་མཛད་པ༌དང༌། དེ་ནས་སྐུ་ཚབ་པ་བཅུ་གཉིས་ལ་མངོན་པར་མཛད་དོ།།

⁶ དེའི༌རྗེས་སུ། དུས་གཅིག་ཏུ་སྤུན་ཟླ་ལྔ་བརྒྱ་ལྷག་ལ་མངོན་པར་མཛད༌ཅིང༌། རྗེས་འབྲང་པ་དེ་དག་ལས་འགའ་ཞིག་ཚེ་ལས་འདས༌ཀྱང༌། མང་ཤོས་ནི་ད་ལྟའི་བར་དུ་བཞུགས༌པ་ཡིན།

⁷ དེའི་རྗེས༌སུ། ཡ་ཀོབ་ལ་མངོན་པར་མཛད་པ༌དང༌། དེ་ནས་སྐུ་ཚབ་པ་ཐམས་ཅད་ལའང་མངོན་པར་མཛད་ཅིང་།

⁸ མཇུག་མཐར་བདག་ནི་སྐྱེ་རན་ལ་མ་ཐོན་པར་སྐྱེས་པའི་ཕྲུ་གུ་དང་མཚུངས་པར་བདག་ལའང་མངོན་པར་མཛད་དོ།།

⁹ བདག་གིས་སྔོན་ཆད་དཀོན་མཆོག་གི་ཆོས་ཚོགས་ལ་གཉའ་གནོན་བྱས་མྱོང༌བས། བདག་ནི་སྐུ་ཚབ་པ་ཐམས་ཅད་ལས་ཆེས་ཆུང་བ་ཡིན༌ལ། སྐུ་ཚབ་པ་ཞེས་པའི་མིང་ཡང་ཐོགས་མི་འོས་སོ།།

¹⁰ འོན༌ཀྱང༌། ད་ལྟ་བདག་མི་ཅི་ལྟ་བུ་ཞིག་ཏུ་གྱུར་པ་ནི་དཀོན་མཆོག་གི་ཐུགས་རྗེའི་དབང་གིས་ཡིན༌ལ། ཁོང་གིས་བདག་ལ་གནང་བའི་ཐུགས་རྗེ་ནི་སྙིང་པོ་མེད་པ་ཞིག་མིན༌ཏེ། བདག་གིས་སྐུ་ཚབ་པ་གཞན་དག་ལས་ཀྱང་ངལ་དུབ་མང་པོ་མྱངས། དོན་དམ་དུ་ང་རང་མིན༌ཏེ། དཀོན་མཆོག་གི་ཐུགས་རྗེ་བདག་དང་ལྷན་དུ་གནས་པ་ལགས།

¹¹ བདག་དང་སྐུ་ཚབ་པ་གཞན་སུ་ཞིག་ཡིན༌ཡང༌། ངེད་ཅག་གིས་དེ་ལྟར་ཆོས་བསྒྲགས་ཤིང་ཁྱོད་རྣམས་ཀྱིས་ཀྱང་དེ་ལྟར་དད་པ་བྱས༌སོ།།

གཤིན་པོ་རྣམས་སླར་གསོན་པའི༌དོན།

¹² དེ་ཡང་སྐྱབས་མགོན་མཱ་ཤི་ཀ་ནི་སྐུ་གྲོངས་པ་ནས་སླར་གསོན་པ་ཡིན་ཞེས་སྒྲོག་བཞིན་ཡོད༌ན། ཁྱོད་ཅག་གི་ཁྲོད་དུ་མི་ཁ་ཤས་ཀྱིས་གཤིན་པོ་རྣམས་སླར་གསོན་པར་འགྱུར་བའི་དོན་དེ་མེད་ཟེར་བ༌ཅི།

¹³ གལ༌ཏེ། གཤིན་པོ་རྣམས་སླར་གསོན་པར་མི་འགྱུར༌ན། སྐྱབས་མགོན་མཱ་ཤི་ཀའང་སླར་གསོན་པ་མིན།

¹⁴ སྐྱབས་མགོན་མཱ་ཤི་ཀ་སླར་གསོན་པ་མིན༌ན། ངེད་ཅག་གིས་ཆོས་སྒྲོག་པར་སྙིང་པོ་མེད༌ཅིང༌། ཁྱོད་ཅག་གིས་དད་པ་བྱས་པ་ལའང་སྙིང་པོ་མེད་དོ།།

¹⁵ ད་དུང་གཤིན་པོ་རྣམས་སླར་གསོན་པར་མི་འགྱུར་ཞེས་པ་དེ་བདེན་པ་ཡིན་ན། དཀོན་མཆོག་གིས་ཀྱང་སྐྱབས་མགོན་མཱ་ཤི་ཀ་སླར་གསོན་པར་མཛད་པ་མིན༌ལ། དཀོན་མཆོག་གིས་སྐྱབས་མགོན་མཱ་ཤི་ཀ་སླར་གསོན་པར་མཛད་པ་ལ་ངེད་ཅག་གིས་བདེན་དཔང་བྱས༌པས། ངེད་ཅག་ནི་དཀོན་མཆོག་ལ་རྫུན་གྱི་དཔང་པོ་བྱེད་མཁན་ཡིན་པ་གསལ་པོར་མངོན།

¹⁶ རྒྱུ་མཚན་ནི་གཤིན་པོ་རྣམས་སླར་གསོན་པ་མིན༌ན། སྐྱབས་མགོན་མཱ་ཤི་ཀའང་སླར་གསོན་པ་མ་ཡིན་པའི་ཕྱིར༌རོ།།

¹⁷ གལ༌ཏེ། སྐྱབས་མགོན་མཱ་ཤི་ཀ་སླར་གསོན་པ་མིན༌ན། ཁྱོད་ཅག་གིས་དད་པ་བྱས་པར་སྙིང་པོ་མེད༌ཅིང༌། ཁྱོད་རྣམས་ནི་ད་དུང་སྡིག་པའི་ནང་དུ་ཡོད༌དེ།

¹⁸ སྐྱབས་མགོན་མཱ་ཤི་ཀའི་དད་ལྡན་འདས་པོ་རྣམས་འཇིག༌པ་ཡིན་ནོ།།

¹⁹ གལ༌ཏེ། བདག་ཅག་གིས་ཚེ་འདི་ཁོ་ནའི་ཆེད་དུ་སྐྱབས་མགོན་མཱ་ཤི་ཀར་སྐྱབས་སུ་བཅོལ་བ་ཡིན༌ན། མི་ཐམས་ཅད་ལས་ཀྱང་བདག་ཅག་སྙིང་རེ༌རྗེའོ།།

²⁰ འོན༌ཀྱང༌། སྐྱབས་མགོན་མཱ་ཤི་ཀ་སྐུ་གྲོངས་པ་ནས་སླར་གསོན༌ཏེ། དད་ལྡན་འདས་པོ་རྣམས་ཀྱི་འབྲས་བུ་ཐོག་མར་གྱུར་པ་ཡིན་ནོ།།

²¹ དེ་ཡང་མི་གཅིག་གི་རྐྱེན་ལས་འཆི་བ་བྱུང་བ༌བཞིན། མི་གཅིག་གི་རྐྱེན་ལས་གཤིན་པོ་རྣམས་སླར་གསོན་པའི་དོན་དེའང་བྱུང་སྟེ།

²² ཨ་དམ་བརྒྱུད་ནས་མི་ཐམས་ཅད་ཤི་བ༌ལྟར། སྐྱབས་མགོན་མཱ་ཤི་ཀ་བརྒྱུད་ནས་མི་ཐམས་ཅད་སླར་གསོན་པར་འགྱུར་ངེས༌ཡིན།

²³ འོན༌ཀྱང༌། མི་ཐམས་ཅད་ནི་རིམ་པ་ལྟར་སླར་གསོན་ངེས༌ཏེ། འབྲས་བུ་ཐོག་མར་གྱུར་པ་ནི་སྐྱབས་མགོན་མཱ་ཤི་ཀ་ལགས༌ཤིང༌། ཕྱིས་སུ་ཁོང་ཉིད་ཕེབས་ཡོང་བའི་དུས་སུ། ཁོང་ལ་གཏོགས་པ་རྣམས་སླར་གསོན་པར་འགྱུར་ངེས༌ཡིན།

²⁴ དེའི་རྗེས༌སུ། སྐྱབས་མགོན་མཱ་ཤི་ཀས་སྲིད་འཛིན་མཁན༌དང༌། དབང་འཛིན༌མཁན། ནུས་མཐུ་ཅན་ཐམས་ཅད་ཕམ་པར་མཛད༌དེ། རྒྱལ་སྲིད་དེ་ཉིད་ཡབ་དཀོན་མཆོག་ལ་འབུལ་བའི་སྐབས་སུ་མཐའ་མའི་དུས་ལ་སླེབས་པ་ཡིན།

²⁵ ཅིའི་ཕྱིར་ཞེ་ན། དཀོན་མཆོག་གིས་དགྲ་བོ་ཐམས་ཅད་སྐྱབས་མགོན་མཱ་ཤི་ཀའི་ཞབས་འོག་ཏུ་གནོན་པའི་བར༌དུ། ཁོང་ཉིད་རྒྱལ་པོར་བཞུགས་པའི་ཕྱིར༌རོ།།

²⁶ ཆེས་མཐའ་མར་མེད་པར་མཛད་པའི་དགྲ་བོ་ནི་འཆི་བ་ཡིན།

²⁷ དེ་ལ་གསུང་རབ་ཀྱི་མདོ་ལས་ཇི་སྐད༌དུ། དཀོན་མཆོག་གིས་འཇིག་རྟེན་གྱི་དངོས་པོ་ཐམས་ཅད་ཁོང་གི་ཞབས་འོག་ཏུ་གནོན་པར་མཛད་ཅེས་གསུངས་པས། དངོས་པོ་ཐམས་ཅད་ཁོང་གི་ཞབས་འོག་ཏུ་གནོན་པར་མཛད་མཁན་དཀོན་མཆོག་ནི་དེའི་ནང་དུ་མི་འདུས་སོ།།

²⁸ འཇིག་རྟེན་གྱི་དངོས་པོ་ཐམས་ཅད་ནི་སྐྱབས་མགོན་མཱ་ཤི་ཀའི་དབང་དུ་གཏོགས༌ཤིང༌། དེའི་དུས༌སུ། དཀོན་མཆོག་གི་སྲས་རང་ཉིད་ཀྱང་དངོས་པོ་ཐམས་ཅད་དབང་དུ་སྡུད་མཁན་དཀོན་མཆོག་གི་དབང་དུ་གཏོགས་པར་འགྱུར༌ཏེ། དཀོན་མཆོག་ནི་དངོས་པོ་ཐམས་ཅད་ལས་བླ་ན་མཐོ་ཞིང༌། དངོས་པོ་ཐམས་ཅད་ཀྱི་བདག་པོར་འགྱུར་བའི་ཕྱིར༌རོ།།

²⁹ དེ་ལྟར་མ་ཡིན༌ན། འདས་པོ་རྣམས་ལ་ཁྲུས་གསོལ་བྱེད་མཁན་དག་གིས་མ་འོངས་པར་ཅི་བྱེད༌དམ། འདས་པོ་རྣམས་དངོས་གནས་སླར་མ་གསོན༌ན། ཅིའི་ཕྱིར་དེ་རྣམས་ལ་ཁྲུས་གསོལ་བྱེད༌དམ།

³⁰ ཅིའི་ཕྱིར་ངེད་ཅག་གིས་རྒྱུན་དུ་ཉེན་ཁར་ཁ་གཏོད༌དམ།

³¹ སྤུན་ཟླ༌རྣམས། ངས་བདག་ཅག་གི་གཙོ་བོ་མཱ་ཤི་ཀ་ཡེ་ཤུར་བརྟེན༌ནས། ཁྱོད་ཅག་གི་སྐོར་ལ་བསྔགས་བརྗོད་བྱས་པས། བདག་ནི་ཉིན་རེ་བཞིན་འཆི་བའི་ཉེན་ཁར་ཕྲད་ཡོད་ཅེས་བདེན་དཔང་བྱེད་པའོ།།

³² བདག་ནི་མི་ཕལ་བ་བཞིན་དུ་ཨེ་ཕེ་སི་ནས་གཅན་གཟན་དང་འཐབ༌ན། བདག་ལ་ཕན་ཐོགས་ཅི་ཡོད༌དམ། འདས་པོ་རྣམས་སླར་གསོན་པ་མིན༌ན། དེ་ལ་ཇི་སྐད་དུ། སང་ཉིན་བདག་ཅག་འཆི་ངེས༌པས།། བཟའ་བཏུང་ལ་ནི་ཅི་དགར༌རོལ།། ཞེས་པ་བཞིན་དུ་བྱ་འོས༌སོ།།

³³ ཁྱོད་ཅག་གིས་རང་ཉིད་བསླུ་བར་མི༌བྱའོ།། གྲོགས་ངན་པར་འགྲོགས་ན་སྤྱོད་བཟང་བརླག་པར་འགྱུར།

³⁴ ཁྱོད་རྣམས་ལས་མི་ཁ་ཤས་ཀྱིས་དཀོན་མཆོག་ངོ་མི་ཤེས་པས་གོ་རྟོགས་སད་ཅིང་སྡིག་པ་མི་བྱེད་པར་ལས་བཟང་པོ་བྱ་འོས་པ་ཡིན། ཁྱོད་ཅག་ངོ་གནོང་བའི་ཕྱིར་བདག་གིས་དེ་ལྟར་སྨྲས༌པའོ།།

སླར་གསོན་པའི་ལུས་པོའི༌སྐོར།

³⁵ འདས་པོ་རྣམས་ཅི་ལྟར་སླར་གསོན་པར་འགྱུར༌རམ། དེ་དག་གིས་ལུས་པོ་ཅི་ལྟ་བུ་ཞིག་ཁྱེར་ཡོང་ངམ་ཞེས་འདྲི་མཁན་ཡོད་སྲིད་ཅིང་།

³⁶ ཀྱེ། བླུན་པོ༌ཁྱོད། ཁྱོད་ཀྱིས་བཏབ་པའི་ས་བོན་ནི་འཆི་བར་མ་གྱུར་ན་སྐྱེ་བར་མི་འགྱུར་རོ།།

³⁷ ཁྱོད་ཀྱིས་བཏབ་པ་ནི་མ་འོངས་པར་སྐྱེ་བར་འགྱུར་བའི་གཟུགས་དེ་མིན༌ལ། གྲོའམ་འབྲུ་རིགས་གཞན་ལ་སོགས་པའི་འབྲུ་རྡོག་ཙམ་ཡིན།

³⁸ འོན༌ཀྱང༌། དཀོན་མཆོག་གིས་རང་ཉིད་ཀྱི་ཐུགས་དགོངས་བཞིན་ས་བོན་དེ་ལ་གཟུགས་དབྱིབས་གནང་བ༌དང༌། འབྲུ་རྡོག་རེ་རེར་རང་རང་གི་གཟུགས་དབྱིབས་ཡོད་པར་མཛད་དོ།།

³⁹ ལུས་ཕུང་ཐམས་ཅད་མི་འདྲ༌སྟེ། མི༌དང༌། ཕྱུགས་ཟོག འདབ༌ཆགས། ཉ་བཅས་ནི་རྣམ་པ་མི་འདྲ་བ་རེ་རེ་ཡིན།

⁴⁰ ནམ་མཁའི་གཟུགས་དབྱིབས་ཡོད་པ༌དང༌། ས་གཞིའི་གཟུགས་དབྱིབས་ཀྱང་ཡོད། འོན༌ཀྱང༌། ནམ་མཁའི་གཟུགས་དབྱིབས་ཀྱི་གཟི་འོད་ནི་སྣ་གཅིག་ཡིན་ལ། ས་གཞིའི་གཟུགས་དབྱིབས་ཀྱི་གཟི་འོད་ཀྱང་སྣ་གཅིག་ཡིན།

⁴¹ ཉི་མ་ལ་ཉི་མའི་གཟི་འོད་ཡོད་པ༌དང༌། ཟླ་བ་ལ་ཟླ་བའི་གཟི་འོད་ཡོད༌ལ། སྐར་མ་ལ་སྐར་མའི་གཟི་འོད་ཡོད༌དེ། སྐར་མ་སོ་སོའི་གཟི་འོད་ལའང་ཁྱད་པར་ཡོད༌དོ།།

⁴² གཤིན་པོ་རྣམས་སླར་གསོན་པར་འགྱུར་བའང་དེ་བཞིན༌ཏེ། ས་འོག་ཏུ་བཅུག་པ་ནི་ངེས་པར་འཇིག་སྲིད༌ཅིང༌། སླར་གསོན་པའི་ལུས་པོ་ལ་འཇིག་པ་མེད་དོ།།

⁴³ ས་འོག་ཏུ་བཅུག་པ་ནི་ངོ་གནོང་བ་ཡིན༌ཞིང༌། སླར་གསོན་པའི་ལུས་པོར་གཟི་བརྗིད་ལྡན་ལ། ས་འོག་ཏུ་བཅུག་པ་ཉམ་ཐག༌ཅིང༌། སླར་གསོན་པའི་ལུས་པོར་སྟོབས་དང་ལྡན་ནོ།།

⁴⁴ ས་འོག་ཏུ་བཅུག་པ་ནི་ཤ་ཁྲག་གི་ཕུང་བོ་ཡིན༌ཞིང༌། སླར་གསོན་པའི་ལུས་པོ་ནི་སེམས་ཉིད་ཀྱི་ལུས་པོ་ཡིན། ཤ་ཁྲག་གི་ལུས་པོ་ཡོད་ན། སེམས་ཉིད་ཀྱི་ལུས་པོའང་ཡོད་ངེས་པ་ཡིན་ནོ།།

⁴⁵ དེའི༌ཕྱིར། གསུང་རབ་ཀྱི་མདོ་ལས་ཇི་སྐད༌དུ། མིའི་ཐོག་མ་ཨ་དམ་ནི་སྲོག་དང་ལྡན་པའི་མི་ཞིག་ཏུ་གྱུར་པ་ཡིན་ཞེས་བཀོད་ཡོད། ཨ་དམ་ཕྱི་མ་སྟེ་སྐྱབས་མགོན་ཡེ་ཤུ་ནི་མི་རྣམས་གསོན་པར་མཛད་པའི་ཐུགས་ཉིད་ཅིག་ཏུ་གྱུར༌པ་ཡིན།

⁴⁶ འོན༌ཀྱང༌། སེམས་ཉིད་ཡིན་པ་དེ་ནི་སྔ་མ་མིན༌ཏེ། ཤ་ཁྲག་ཡིན་པ་དེ་ནི་སྔ་མ་ཡིན༌ཞིང༌། ཕྱིས་སུ་སེམས་ཉིད་ཡིན་པ་དེ་ཉིད་བྱུང༌བ་ཡིན།

⁴⁷ མིའི་ཐོག་མ་དེ་ནི་ས་ལས་བཟོས་ཤིང་ས་ལ་གཏོགས༌པ་དང་། མི་ཕྱི་མ་དེ་ནི་ནམ་མཁའི་ཞིང་ཁམས་ནས་བྱོན༌པ་ཡིན།

⁴⁸ ས་ལ་གཏོགས་པ་དེ་ནི་ཅི་འདྲ་ཡིན༌ན། ས་ལ་གཏོགས་པའི་མི་ཐམས་ཅད་ཀྱང་དེ་ལྟར་ཡིན༌ལ། ནམ་མཁའི་ཞིང་ཁམས་ལ་གཏོགས་པ་ནི་ཅི་འདྲ་ཡིན༌ན། ནམ་མཁའི་ཞིང་ཁམས་ལ་གཏོགས་པའི་མི་ཐམས་ཅད་ཀྱང་དེ་ལྟར་ཡིན།

⁴⁹ བདག་ཅག་ས་ལ་གཏོགས་པའི་གཟུགས་དབྱིབས་དང་ལྡན༌པས། མ་འོངས་པར་ནམ་མཁའི་ཞིང་ཁམས་ལ་གཏོགས་པའི་གཟུགས་དབྱིབས་ཀྱང་ངེས་པར་ཡོད་སྲིད༌དོ།།

⁵⁰ སྤུན་ཟླ༌རྣམས། བདག་གིས་ཁྱོད་རྣམས་ལ་སྨྲ་བར་བྱ༌སྟེ། ཤ་ཁྲག་གི་ཕུང་བོར་དཀོན་མཆོག་གི་རྒྱལ་སྲིད་འཐོབ་མི་སྲིད༌ལ། ངེས་པར་འཇིག་སྲིད་པ་ལ་འཇིག་པ་མེད་པ་དེའང་འཐོབ་མི་སྲིད།

⁵¹ ལྟོས༌དང༌། ད་ལྟ་བདག་གིས་ཁྱོད་རྣམས་ལ་གསང་བའི་དོན་ཞིག་སྨྲ་བར༌བྱ། བདག་ཅག་ཐམས་ཅད་འཆི་བར་འགྱུར་བ་མིན༌ཏེ།

⁵² མཇུག་མཐའི་དུང་སྒྲ་གྲགས་པའི་དུས༌སུ། སྐད་ཅིག་མའམ་མིག་རྡེབ་དབང་ཙམ་ལ་བདག་ཅག་ཐམས་ཅད་ཀྱི་ལུས་པོ་འགྱུར་ངེས༌སོ།། དུང་སྒྲ་དེ་གྲགས་པ་དང་། འདས་པོ་རྣམས་སླར་གསོན་པར་མཛད་ཅིང་ནམ་ཡང་འཇིག་པར་མི་འགྱུར༌ཏེ། བདག་ཅག་གི་ལུས་པོའང་འགྱུར་ངེས་ཡིན།

⁵³ འཇིག་པར་འགྱུར་བའི་ལུས་པོ་འདི་ཡིས་ནམ་ཡང་འཇིག་པ་མེད་པ་གྱོན་དགོས་ཤིང༌། འཆི་བར་འགྱུར་བའི་ལུས་པོ་འདི་ཡིས་ནམ་ཡང་འཆི་བ་མེད་པ་གྱོན་དགོས་སོ།།

⁵⁴ ཡང་འཇིག་པར་འགྱུར་བའི་ལུས་པོ་འདི་ཡིས་ནམ་ཡང་འཇིག་པ་མེད་པ་གྱོན་པ་དང་། འཆི་བར་འགྱུར་བའི་ལུས་པོ་འདི་ཡིས་ནམ་ཡང་འཆི་བ་མེད་པ་གྱོན་པའི་ཚེ། གསུང་རབ་ཀྱི་མདོ་ལས་ཇི་སྐད༌དུ། རྒྱལ་ཁས་འཆི་བ་ལ་ནི་ཁྱུར་མིད༌བཏང༌།། ཞེས་གསུངས་པ་ལྟར་འགྲུབ་པར་འགྱུར༌རོ།།

⁵⁵ ཡང་ཇི་སྐད༌དུ། ཀྱེ་མ་འཆི་བ་ཁྱོད་ལ་རྒྱལ་ཁ་ཡོད་སྲིད་དམ།། ཀྱི་ཧུད་འཆི་བ་ཁྱོད་ལ་དུག་མདུང་ཡོད་སྲིད་དམ།། ཞེས་གསུངས་སོ།།

⁵⁶ འཆི་བའི་དུག་མདུང་ནི་སྡིག་པ་ཡིན༌ལ། སྡིག་པའི་དབང་ཤུགས་ནི་བཀའ་ཁྲིམས་ཡིན།

⁵⁷ འོན༌ཀྱང༌། དཀོན་མཆོག་གིས་བདག་ཅག་གི་གཙོ་བོ་ཡེ་ཤུ་མཱ་ཤི་ཀ་བརྒྱུད༌ནས། བདག་ཅག་རྒྱལ་བར་མཛད་པས་ཁོང་ལ་ཐུགས་རྗེ་ཆེ༌ཞུའོ།།

⁵⁸ དེའི༌ཕྱིར། བདག་གི་སྙིང་ཉེ་བའི་སྤུན་ཟླ༌རྣམས། ཁྱོད་རྣམས་ངེས་པར་འགྱུར་མེད་བརྟན་པོར་སྡོད་པར༌གྱིས། གཙོ་བོའི་ནང་དུ་སྒྲུབ་པའི་ངལ་བའི་ལས་ནི་དོན་མེད་དུ་མི་འགྱུར་བ་ཤེས་པ་བཞིན། ཁྱོད་ཅག་གིས་གཙོ་བོའི་ལས་དོན་འབད་པས་སྒྲུབས་ཤིག །