Numeri 6 - BIBELE

Melao ya Moitlami. Tšhegofatšo ya Arone

¹ Morena o boletše le Moshe a re:

² Bolela le Baisiraele o re: Ge monna goba mosadi a itlama a re ke ena keno ya Moitlami gore a ikgafele Morena,

³ a ikone sebela le bjalwa, a se ke a nwa sedila sa morara goba mogope wa morara; a se ke a ja dienywa tša morara le ge e le lengagale la wona.

⁴ Lebakeng ka moka la boitlami bja gagwe a se ke a ja se se dirilwego ka seenywa sa morara, le ge e le matata a wona, le ge e le mahlogedi a wona.

⁵ Mehla ka moka ya keno ya boitlami bja gagwe legare le se ke la fihla hlogong ya gagwe; a be mokgethiwa go be go fele matšatši ao a ikgethetšego Morena ka ona, mme a lese moriri wa hlogo ya gagwe o gole.

⁶ Mehla ka moka ye a ikgethetšego Morena ka yona a se ke a batamela setoto sa mohu.

⁷ A se ke a itšhilafatša ka tatagwe, le ge e le ka mmagwe, le ge e le ka ngwanabo, le ge e le ka kgaetšedi ya gagwe, ge ba ka hwa, ka gobane boitlami bja Modimo wa gagwe bo mo hlogong ya gagwe.

⁸ Mehla ka moka ya boitlami bja gagwe o kgethetšwe Morena.

⁹ Ge mo hleng ga gagwe go ka hwa motho ka sewelo ka bjako, a tšhoga hlogo ya boitlami bja gagwe e tšhilafetše, gona a kotwe hlogo ka tšatši la thakgafatšo ya gagwe, a kotwe ka tšatši la go šupa.

¹⁰ Ka tšatši la seswai a tliše mekurwanyane e mebedi, le ge e le maebana a mabedi go moperisita mojakong wa Ngwako wa Kgwerano.

¹¹ Ka le lengwe la ona moperisita a dire selefa, ka le lengwe a dire sehlabelo, a mo direle poelanyo ka gobane a sentše ka setoto seo, e be go kgetha hlogo ya gagwe mohla woo.

¹² E be go ikgethela Morena matšatši a boitlami bja gagwe; a tliše kwanyana ya ngwaga o tee, e be selefa; matšatši ala a fetilego a se ke a balwa, ka gobane boitlami bja gagwe bo tšhilafetše.

¹³ Molao wa moitlami šo: Mohla go phethegago boitlami bja gagwe moitlami a tlišwe mojako wa Ngwako wa Kgwerano.

¹⁴ A tlišetše Morena sebego sa gagwe sa kwanyana e tona ya ngwaga o tee ye e se nago bosodi gore e be sehlabelo, le kwanyana ya tshadi ya ngwaga o tee ye e se nago bosodi gore e be seloba; le kgapana e se nago bosodi gore e be seleboga;

¹⁵ le seroto sa magobe a sa omelwago, e lego dinkgwa tša bupi bjo bo dubilwego ka makhura, le dimatla tše di se nago komelo tše di tšhetšwego makhura, le sebego sa dijo le sa dino.

¹⁶ Moperisita a di batametše go Morena, mme a mo direle seloba seo le sehlabelo seo.

¹⁷ Ka kgapana yela a direle Morena seleboga, le ka sebego sela sa magobe a se nago komelo; moperisita a tsebo fihliša le sebego sela sa dijo le sa dino.

¹⁸ Bjale moitlami a kotwe hlogo mojakong wa Ngwako wa Kgwerano, a tšee moriri wa boitlami bja gagwe a o lahlele mollong o bešago seleboga.

¹⁹ Moperisita a kgone go tšea letsogo le le apeilwego la kgapana, a ntšhe le senkgwa se se sa omelwago mo serotong, le sematla se se sa omelwago, a di bee diatleng tša moitlami ge go šetše go kotilwe moriri wa boitlami bja gagwe;

²⁰ Gomme moperisita a di ekare pele ga Morena, ka ge e le tše di kgethetšwego moperisita le leumo la seakaro, le serope sa motšhelo. Ge a dirile bjalo gona moitlami a ka nwa morara.

²¹ Ke wona molao wa moitlami e a baletšego Morena sebego sa gagwe ka baka la boitlama bja gagwe, ka ntle ga tše dingwe tše a kgonago go di ntšha tšona tše ke tše a swanetšego go di dira ka molao wa boitlami bja gagwe.

²² Morena o boletše le Moshe a re:

²³ Botša Arone le barwa ba gagwe o re: Ge le šegofatša Baisiraele, le re:

²⁴ Morena a go šegofatše, a go boloke;

²⁵ Morena a go phadimišetše sefahlogo sa gagwe, a go gaugele;

²⁶ Morena a go emišetše sefahlogo sa gagwe, mme a go fe khutšo.

²⁷ Ba realo ba bee leina la ka godimo ga Baisiraele; mme e a tlogo ba šegofatša ke nna.