Numeri 5 - BIBELE

Mešašeng go ntšhwa ba ditšhila. Go lefa molato. Go lwa lehufa

¹ Morena o boletše le Moshe a re:

² Botša Baisiraele o re: Ba ntšhe ba lephera ka moka mo mešašeng, le bohle ba ba edišago, le bohle ba ba tšhilafetšego ka setoto.

³ E ka ba monna, e ka ba mosadi, le ba ntšhe. Le ba ntšhetše ka ntle ga mešaša gore ba se ke ba tšhilafatša mešaša ya bona, ye nna ke dulago le bona mo go yona.

⁴ Gomme Baisiraele ba dira bjalo, ba ba ntšhetša ka ntle ga mešaša. Baisiraele ba dirile ka mo Morena a boditšego Moshe ka gona.

⁵ Morena o boletše le Moshe a re:

⁶ Botša Baisiraele o re: Ge monna goba mosadi a dirile sebe se sengwe se batho ba se dirago, ge a rumotše Morena ka sona, motho e mobjalo o na le molato.

⁷ Ba tle ba bobole dibe tše ba di dirilego; gomme motho a lefe molato ka mo go tletšego, gomme a ekeletše ka sa bohlano sa wona, mme a neele mong wa molato woo.

⁸ Ge monna eo a se na wa gabo e a kago lefelwa molato woo, gona molato woo o lefelwe Morena, o neelwe moperisita gotee le kgapa ya poelanyo ya go mo direla poelanyo.

⁹ Le tše kgethwa tše mang le mang a di tlišetšago moperisita ke tša gagwe.

¹⁰ Ke gore tše kgethwa ka moka ke tša gagwe, ka moka tše di neelwago moperisita.

¹¹ Morena o boletše le Moshe a re:

¹² Botša Baisiraele o re: Ge mosadi wa monna e mongwe a ka aroga a mo šitelwa,

¹³ mme monna e mongwe a tsena dikobong tša gagwe; fela, a se tsebje ka ge go se hlatse ye e mmonego, mme a sa swarwa,

¹⁴ e re ge monna a tsenwa ke moya wa lehufa, a hufega ka baka la mosadi wa gagwe a ne molato,

¹⁵ gona monna eo a tliše mosadi wa gagwe go moperisita; go tlišwe le sebego sa mosadi eo, e lego ntlatlana ya bupi. A se ke a bo tšhela makhura, a se ke a nunetša diorelo, ka gobane ke sebego sa lehufa, ke sebego sa seeletši sa go utolla molato.

¹⁶ Moperisita a batametše mosadi eo, a mo emiše pele ga Morena.

¹⁷ Moperisita a tsebo tšea meetse a makgethwa ka sebjana sa letsopa; a tšee lerole la lebato la Ntlongkgethwa, a le nunetše meetseng ao.

¹⁸ Bjale mosadi, a eme moo pele ga Morena, moperisita a mo apole hlogo, moperisita a bee sebego seo sa kutollo, sebego sa lehufa mo diatleng tša mosadi, yena a sware meetse ao a mahlolabohloko ka seatla.

¹⁹ Bjale moperisita a mo eniše a re: Ge go se monna o šele a kilego a robala le wena, mme wa se ke wa aroga wa itšhilafatša ka ge o ne monna wa gago, gona meetse a a mahlolabohloko a ka se ke a go hlokofatša.

²⁰ Fela, ge o forile monna wa gago, mme dikobong tša gago go tsene monna o šele e sego monna wa gago,

²¹ (gona moo moperisita a mo eniše ka keno yeo ya go rogwa, mme a botše mosadi eo a re:) gona Morena o tlo go dira serogiwa sa keno mo setšhabeng sa geno ka go momaraganya letheka la gago le go kokomoša mpa ya gago.

²² Meetse a a mahlolabohloko a tlo tsena maleng a gago, a tlo kokomoša mpa ya gago, mme a momaraganya letheka la gago. A realo mme mosadi a re: A go be bjalo! A go be bjalo!

²³ Bjale moperisita a ngwale keno yeo letlakaleng, mme a le hlatswe ka meetse ao a bohloko,

²⁴ a tsebo noša mosadi meetse ao a mahlolabohloko; meetse ao a bohloko a mo tsene.

²⁵ Moperisita bjale a tšee sebego sa lehufa mo seatleng sa mosadi, a se ekare pele ga Morena, a se bee aletareng.

²⁶ Mo sebegong moperisita a tabole ka seatla, mme a fiše tša kgopotšo mo aletareng, a kgone go noša mosadi meetse ao.

²⁷ E tlo re ge a mo nošitše meetse ao a na le molato, a šitetšwe monna wa gagwe, gona meetse ao a mahlolabohloko a tlo mo tsena a mo hlokofatša; mpa ya gagwe e tlo kokomoga, mme letheka la gagwe le tlo momaragana. Gomme mosadi eo o tlo ba serogiwa mo setšhabeng sa gabo.

²⁸ Fela, ge mosadi eo a se ne ditšhila, a se ne molato, gona o tlo tšwa a iketlile, o tlo riboga.

²⁹ Ke wona molao wa lehufa, ge mosadi wa monna a arogile, a tšhilafetše.

³⁰ Le ge e le ge monna a tsenwe ke moya wa lehufa, a hufega ka baka la mosadi wa gagwe, a emiše mosadi wa gagwe pele ga Morena, gomme moperisita a mo dire ka molao woo ka moka.

³¹ Monna yena a ka se ke a ba le molato bokgopong bjoo; e a tlogo ithwalela bokgopo bja gagwe ke mosadi.