Numeri 24 - BIBELE

Diema tša Bileama. Naledi ya Jakobo

¹ Bileama ge a bona gobane Morena o rata ge Baisiraele ba šegofatšwa, a se ke a hlwa a dira tša maphalo bjalo ka peleng; a fo lebiša sefahlogo sa gagwe lešokeng;

² a lebelela, a bona Baisiraele ba dutše mešašeng ka meloko ya bona, mme a tlelwa ke moya wa Modimo;

³ a hlaba seema sa gagwe a re: Go bolela Bileama morwa wa Beoro. Go bolela monna wa go budulolwa mahlo.

⁴ Go bolela mokwi wa polelo tša Modimo, mmoni wa dipono tša Ramaatla, mmudulolwamahlo ge a lotšha.

⁵ E botse bjang mekutwana ya gago, hee Jakobo! Meago ya gago, Isiraele, ga se ka botse!

⁶ Ke mehlaka e eya, ke mašemo dinokeng, ke dihlare tša go šengwa ke Morena, merokwana hleng ga meetse.

⁷ Meeta ya bona e falala meetse; Ba lemile mo meetse a atago. Kgoši ya bona e feta Agaga; Mmušo wa bona o akaretše.

⁸ Modimo o ba ntšhitše Egipita; dinaka tša bona di etša tša nare. Ba tlo di fetša, dilete tša go lwa le bona; ba tlo di roba marapo; ba tlo di betša ka mesebe.

⁹ Ba patlame, ba bothile wa ditau, wa tau tša tshadi, -- di tsošwa ke mang? -- Wa go go atla o tlo atlwa; wa go go roga o tlo rogwa.

¹⁰ Ya ba gona Balaka a tukilego bogale; a phaphatha diatla, a bolela le Bileama, a re: Se ke go bileditšego sona ke go roga manaba a ka; gomme šedi, ke gararo bjale o ba šegofatša.

¹¹ Bjale napa o boele ga geno. Ke be ke re ke tlo go leboga ka tše kgolo; fela, šedi, Morena o go hlokišitše seleboga.

¹² Bileama a fetola a re: A ga nka ka botša batseta ba gago ba o ba romilego ba tla go nna, ka re:

¹³ Le ge Balaka a ka mpha silifera le gauta e kago tlatša ngwako wa gagwe, taelo ya Morena nka se ke ka kgona go e feta ka thoko ke dira tše botse goba tše mpe ka boithatelo bja pelo ya ka. Ga nka ka re: Ke tlo bolela se Morena a mpotšago sona?

¹⁴ Bjale gomme ke boela go ba gešo; tlaa ge, ke go utollele se setšhaba se se tlogo dira setšhaba sa gago mehleng e tlago.

¹⁵ A hlaba seema sa gagwe a re: Go bolela Bileama morwa wa Beoro. Go bolela monna mmudulolwamahlo.

¹⁶ Go bolela mokwi wa polelo tša Modimo, moitse wa mahlale a Modimodimo, mmoni wa dipono tša Ramaatla, mmudulolwamahlo ge a lotšha.

¹⁷ Ke a mmona; fela, ga se bjale. Ke a mmoga; fela gakgauswi. Naledi e tšwa go Jakobo; molamo wa bogoši o tsoga go Isiraele. O tlo pšhatla thoko tša Moaba; o tlo fetša bana ba meferefere bohle.

¹⁸ La Edomo e tlo ba la gagwe; la Seire le tlo dulwa ke manaba a lona; mme Isiraele o tlo tsoša maatla.

¹⁹ Go Jakobo go tlo hlaga wa go tlo buša, a fetša batšhabi metseng.

²⁰ A leba thoko ya Baamaleke, a hlaba seema sa gagwe a re: Amaleke ke wa pele wa ditšhaba. Tše di tlogo mo tlela ke tšhenyego.

²¹ A leba thoko ya Bakeni, a hlaba seema sa gagwe a re: Moago wa gago le ge o tiile, le ge o agile sehlaga lentsweng,

²² le ge go le bjalo, Kaine, sa gago ke go fišwa. E tlo ba neng ge o tlo thubja ke Asuri?

²³ A buša a hlaba seema sa gagwe a re: Joo, go tlo phela mang mohla Morena a dirago tšeo!

²⁴ Thoko ya Bakhithima go hlaga ditshediši; di hlohla Baasuri; di hlohla Bahebere. Fela, le bona, boyo ke tshenyego.

²⁵ Gomme Bileama a tsoga a wela tsela, a boela gae. Balaka le yena a tloga ka tsela ya gagwe.