Numeri 23 - BIBELE

Diema tša Bileama

¹ Bileama a botša Balaka a re: Felo fa, nkagele dialetare tše di šupago, o ntlhaolele dipoo tše di šupago, le dikgapana tše di šupago.

² Balaka a dira bjalo ka ge Bileama a boletše. Gomme Balaka le Bileama ba hlaba poo le kgapana mo aletareng e engwe le e engwe.

³ Bileama a botša Balaka a re: Sala o eme fa sehlabelong sa gago; nna ke sa ya kwa pejana; mohlomongwe ke tlo hlakana le Morena. Gomme taba ye a tlogo nkutollela yona, ke tlo go anexela yona. A realo a ya serwaolong.

⁴ Bileama a gahlana le Morena; a bolela a re: Ke lokišitše dialetare tše di šupago, ka hlaba poo le kgapana mo aletareng e nngwe le e nngwe.

⁵ Gomme Morena a bea Lentšu mo molomong wa Bileama, a re: Boela go Balaka o bolele lona leo.

⁶ Bileama ge a boa a hwetša Balaka a eme mo sehlabelong sa gagwe, a na le matona ka moka a Moaba.

⁷ A hlaba seema a re: Kwa Siria ke bitšwa ke Balaka kgoši ya Moaba. Ke le kua thabeng tša bohlabela ke thwe: Tla o nthogele Jakobo! Tla o nkgalemele Isiraele!

⁸ Nka roga bjang moserogwe wa Modimo? ka kgalema byang mosekgalengwe wa Modimo?

⁹ Ke mmone ke le godimo lentsweng; ka se bogela ke le kwa madutameng. Sese setšhaba sedulasennoši, sesoladitšhaba tše dingwe.

¹⁰ Marole a Jakobo a balwa ke mang? Mmadi ke mang wa mehlape ya Isiraele? A nke moya waka o hwe la baloki; tša go tlo ntlela di etše tša bona.

¹¹ Balaka a bolela le Bileama a re: O ntira taba mang? Ke go bileditše go roga manaba a ka. Bjale šedi; o bile o ba šegofaditše.

¹² Bileama a fetola a re: Nna ke itota gore ke bolele tše Morena a di beago molomong waka.

¹³ Balaka a re: Tlaa hle, re ye felo mo gongwe, mo o tlogo se bona o le ntshe; wa tlo bona dinakana tša sona fela, e sego ka moka ga sona; mme o nthogele setšhaba se o le fao.

¹⁴ A mo iša mo sehlabeng sa bahlapetši thabeng ya Pisiga, a aga aletare tše di šupago, a tliša sehlabelo sa poo le kgapana mo aletareng e nngwe le e nngwe.

¹⁵ Bileama a bolela le Balaka a re: Šala o eme fa sehlabelong sa gago; nna ke sa yo hlakanetša fala.

¹⁶ Bileama a hlakana le Morena; Morena a mmea Lentšu molomong, a re: Boela go Balaka o mmotše lona leo.

¹⁷ A tla a hwetša Balaka a sa eme sehlabelong sa gagwe, a na le matona a Moaba. Balaka a re: Morena o itšeng?

¹⁸ Bileama a hlaba seema a re: Balaka tsoga o theetše. O ntshekegele tsebe wena morwa wa Tsiporo.

¹⁹ Modimo ga se motho a kago aketša, ga se ngwana motho e a kago thiša. Naa a ka bolela, a napa a lesa go dira? Naa a ka fo rera, a lesa go di phetha?

²⁰ Sedi! Nna ke laetšwe go atla; ge yena a atla, nna nka se hlanoše.

²¹ Go Jakobo ga go hwetšwe bobe; ga go bonwe mahlomola go Isiraele. Morena Modimo wa bona o nabo, ba mo gobela megobo ya kgoši.

²² Modimo o ba ntšhitše Egipita; dinaka tša bona di etša tša nare.

²³ Jakobo ga kgonege ka boloi; Isiraele ga dirwe selo ka bonoge. Go ba Jakobo le Isiraele go thwe: Tše kaakaa di dirwa ke Modimo.

²⁴ Sese, setšhaba se tsoga wa tau ya thsadi; se tlo nanoga bjalo ka tau. E ka se ke ya boba e sešo ya ja nama, e sešo ya nwa madi a ba hlabilwego.

²⁵ Balaka a bolela le Bileama a re: Ge o sa kgone go ba roga, gona o ke o lese le go ba šegofatša.

²⁶ Bileama a fetola a re: A ga nka ka go botša ka re: Ke tlo dira se Morena a mpotšago sona?

²⁷ Balaka a re: Tlaa ge, ke go iše felo mo gongwe; mohlomong re le kua Modimo a ka dumela ge o nthogela setšhaba seo.

²⁸ Balaka a mo iša thabeng ya Peoro ye e lebago thoko ya lehanateng.

²⁹ Bileama a botša Balaka a re: Nkagele aletare tše di šupago gona fa, o ntlišetše dipoo tše di šupago gona fa, le dikgapana tše di šupago.

³⁰ Balaka a dira tše Bileama a mmoditšego tšona, a hlaba poo le kgapana aletareng e nngwe le e nngwe.