Numeri 20 - BIBELE

Meetse a tšwago leswikeng. Bonaba bja Baedomo. Lehu la Miryama le Arone

¹ Baisiraele, phuthego ka moka ya bona, ba fihlile lešokeng la Sini ka kgwedi ya pele. Setšhaba sa dula Kadese; gomme Miryama a hwela gona moo, a bolokwa gona.

² Ya re ge phuthego e hloka meetse, ya bokanela Moshe le Arone;

³ Ya omanya Moshe ya re: Joo, re ka be re ikhwetše mola bana baborena ba ehwa pele ga Morena!

⁴ Ke ka baka la eng ge le tlišitše phuthego ya Morena fa lešokeng le, gore re hwele gona, rena le dikgomo tša rena!

⁵ Le be le reng ge le re ntšha kua Egipita, la re tliša felo mo go šoro? Naga ye ga e na malemo, ga e na mego, ga e na merara; le meetse a go nwa ga a gona.

⁶ Moshe le Arone ba tloga mo pele ga phuthego, ba ya mojakong wa Ngwako wa Kgwerano, ba lotšha ba inametše fase; gomme letago la Morena la bonala pele ga bona.

⁷ Morena a bolela le Moshe a re:

⁸ Swara molamo, o kgobokanye phuthego o na le Arone mogolwago gomme le bolele le leswika ba lebeletše; ke mo le tlogo le nea meetse a lona; mme o tlo ba ntšhetša meetse mo leswikeng, wa noša phuthego le dikgomo tša bona.

⁹ Moshe a tšea molamo fala pele ga Morena, a dira ka mo Morena a mo laetšego ka gona.

¹⁰ Moshe le Arone ba kgobokanya phuthego gona fao pele ga leswika. Gomme Moshe a bolela le bona a re: Kwang lena dinganga tenang! Afa re ka le ntšhetša meetse mo leswikeng le?

¹¹ A realo a emiša letsogo, a tia leswika gabedi ka lepara la gagwe; gwa tšwa meetse a mantši, phuthego ya nwa, le dikgomo tša bona.

¹² Ya ba gona Morena a boletšego le Moshe le Arone a re: Lena, phuthego ye le ka se ke la e fihliša mo nageng ye ke tlogo e fa yona, ka baka la ge le sa ka la mpota, le sa ka la ntira e mokgethwa pele ga Baisiraele.

¹³ Ke ona meetse a Meriba, mo Baisiraele ba nganganego le Morena; gomme yena a ba e mokgethwa mo go bona.

¹⁴ Mehla yeo ba le gona moo Kadese Moshe o romile batseta go kgoši ya Edomo, a re: Isiraele ngwaneno o re: Ditshwenyego ka moka tše di re wetšego, le šetše le di kwele.

¹⁵ Botatawešo ba kile ba fologela Egipita; ra fetša nywaga e mentši re dutše Egipita. Baegipita ba re dira gampe, rena le botatawešo.

¹⁶ Rena ra hlabela Morena mokgoši; a kwa dillo tša rena; a roma Morongwa, a re ntšha Egipita. Bjale re mo Kadese motseng o lego pheletšong ya mellwane ya gago.

¹⁷ Bjale a ke o re dumelele go phatša naga ya gago. Re ka se ke ra gata mašemo le dirapa tša merara; re ka se ke ra nwa meetse a didiba; re tla fo sepela ka tsela ya mošate; re ka se ke ra arogela thoko ya le letona goba ya le letshadi, ra ba ra tšwa nageng ya gago.

¹⁸ Baedomo ba fetola ba re: Le se ke la ba la phatša naga ya rena, re sa tlo gahlana le lena ka marumo.

¹⁹ Baisiraele ba re: Re tla fo sepela ka tsela ye e phatlaletšego. Gomme ge re ka nwa meetse a lena, re tlo a reka. Ga re na taba le lena, ge e se go fo iphetela ka maoto.

²⁰ Baedomo ba re: Le se ke la e phatša. Ya ba ba šetše ba etšwa e le madira a mantši, ba swere marumo.

²¹ Ke wona mokgwa wo Baedomo ba gannego ka wona go dumella Baisiraele go phatša naga ya bona. Gomme Baisiraele ba ba šikologa.

²² Baisiraele ba khudugile Kadese, phuthego ka moka ya tla thabeng ya Horo.

²³ Gona moo thabeng ya Horo mo mellwaneng ya la Edomo Morena o boletše le Moshe le Arone a re:

²⁴ Arone o tlo gorošetšwa go ba gabo. Kua nageng ye ke e filego Baisiraele a ka se ke a tsena, ka gobane le nyaditše lentšu la ka kua meetseng a Meriba.

²⁵ Bjale tloga le Arone le Eleasara morwa wa gagwe, o ba rotošetše thabeng ya Horo.

²⁶ Gomme Arone o mo apole diaparo tša gagwe, o di apeše Eleasara morwa wa gagwe. Arone yena o tlo gorošwa; o tlo hwela ntshe.

²⁷ Gomme Moshe a dira ka mo Morena a mo laetšego ka gona; ba rotogela thabeng ya Horo phuthego ka moka e ba lebeletše.

²⁸ Moshe a apola Arone diaparo tša gagwe, a di apeša Eleasara morwa wa gagwe. Gomme Arone a hwela gona moo godimo ga thaba. Thabeng gwa fologa Moshe le Eleasara.

²⁹ Phuthego ka moka ge e bona gobane Arone o sepetše, ba setšhaba sa Isiraele ba fetša matšatši a masome a mararo ba mo llela.