Numeri 10 - BIBELE

Dinaka tša go bitša phuthego. Go hlahlamologa ga setšhaba ge se tloga thabeng ya Sinai

¹ Morena o boletše a re:

² Itirele dinaka tše pedi tša silifera; o di dire ka silifera e batotšwego; e be tša go kgoba phuthego, le go khuduša mešaša.

³ Ge ba letša tšona e be go re phuthego ka moka e phuthegele go wena mojako wa Ngwako wa Kgwerano.

⁴ Ge go letšwa e tee ya tšona, e be go re matona, balaodi ba madira a Isiraele ba phuthegele go wena.

⁵ Ge di letswa ka maatla e be go re go hlahlamologe ba mešaša ya thoko ya bohlabela.

⁶ Ge di letšwa la bobedi ka maatla e be go re go hlahlamologe ba mešaša ya thoko ya borwa; go letšwa ka maatla ge e le go re ba hlahlamologe.

⁷ Ge e le gore go kgobelwe pitšo, gona di se letšwa ka maatla.

⁸ Baletši ba dinaka tšeo e be baperisita barwa ba Arone. E be mokgwa wa lena ka mehla go iša ditlogolong.

⁹ E tlo re ge le tšwa dira kua nageng ya lena, le elwa le manaba a a le šwahletšego, le letša dinaka ka maatla, le tlo ba le gopolwa pele ga Morena Modimo wa lena, mme la namolelwa diatleng tša manaba a lena.

¹⁰ Le ka matšatši a ge le thabile, le ka menyanya ya lena, le ka la go balama ga kgwedi, le letše dinaka tšeo ge go tlišwa dihlabelo tša lena le didimo tša lena, gore e be go le tlišetša go gopolwa pele ga Modimo wa lena, nna Morena Modimo wa lena.

¹¹ Ka la masome a mabedi la kgwedi ya bobedi ya ngwaga wa bobedi leru le hlatlogile la tloga mo Ntlong ya Molao.

¹² Baisiraele ba khuduga mo lešokeng la Sinai, makoko a bona a lokologana; gomme leru la ya la ema lešokeng la Parana.

¹³ Ya ba la mathomo ge ba khuduga ka go laelwa ke Morena ka Moshe.

¹⁴ Ba sefoka sa mešaša ya Bajuda ba tsoga ba ba eta pele ka makoko a bona, Nahesone morwa wa Aminadaba a na le madira a gagwe.

¹⁵ Nathaniele morwa wa Tsuari a na le madira a ba leloko la Isashara.

¹⁶ Eliaba morwa wa Helone a na le madira a leloko la Sebulone.

¹⁷ Le Ntlokgethwa ya hlahlamolwa, Bagerisone le ba Merari ba tsoga ba e rwele.

¹⁸ Gwa kgona go tsoga ba sefoka sa mešaša ya Barubeni ka makoko a bona; Elitsuri morwa wa Sedeuri a na le madira a gagwe;

¹⁹ Selumiele morwa wa Tsurišadai a na le madira ba leloko la Simeone;

²⁰ Elisafa morwa wa Dehuele a na le madira a leloko la Gada.

²¹ Ya ba gona go tsogilego Bakahathe ba rwele tše kgethwa; ge bona ba fihla ba hweditše Ntlokgethwa e šetše e hlomilwe.

²² Gwa latela ba sefoka sa mešaša ya Baefuraimi ka makoko a bona, Elisama morwa wa Amihudu a na le madira a gagwe;

²³ Gamamiele morwa wa Pedatsuri a na le madira a leloko la Manase;

²⁴ Abidani morwa wa Gideoni a na le madira a leloko la Benyamini.

²⁵ Gwa latela ba sefoko sa mešaša ya Badani, ya ba ba go khunyeletša ba mešaša ka moka ka makoko a bona, Ahiesere morwa wa Ahitsuri a na le madira a gagwe,

²⁶ Pagiele morwa wa Okorane a na le madira a leloko la Asere,

²⁷ Ahira morwa wa Enani a na le madira a leloko la Nafutali.

²⁸ Ke gona go lokologana ga Baisiraele ka makoko a bona ge ba khuduga.

²⁹ Gomme Moshe a bolela le Hobaba morwa wa Reguele Momidiani mogwegadi wa Moshe, a re: Rena re a khuduga; re ya kua go boletšwego ke Morena a re: Ke tlo le nea felo fao. Sepela le rena; re tlo go dira gabotse, ka gobane Baisiraele Morena o ba baletše tše botse.

³⁰ Hobaba a re: Nka se ke ka ya. Nna ke tlo boela nageng ya gešo go metswalo ya ka.

³¹ Moshe a re: A nke o se re tlogele, ka gobane ke wena o tlogo re tsebela makutšo lešokeng; o tlo ba mahlo a rena.

³² Ge o sepela le rena, mme ra tlelwa ke tše botse tše Morena a tlogo re direla, le wena re tlo go dira gabotse.

³³ Gomme ba tlogile thabeng ya Morena ba sepela matšatši a mararo; polokelo ya kgwerano ya Morena ya ba eta pele leetong le la matšatši a mararo, ya ba nyakela makhutšo.

³⁴ Mosegare ba be ba aparetšwe ke leru la Morena mola ba tlogile mešašeng.

³⁵ Ge polokelo e tsoga Moshe o be a bolela a re: Nanoga, Morena, manaba, a gago a rakwe, Bahloi ba gago ba tšhabe!

³⁶ Ge polokelo e etla mešašeng, Moshe a re: Morena, boela go mašaba a diketekete tša Isiraele!