Mateu 20 - BIBELE

Badiri tšhemong; barwa ba Tsebedeo; difofu tša Jeriko

¹ Mmušo wa magodimo o swana le motho e lego mong wa ngwako, e a tšwilego e sa le bosasa go yo thwalela tšhemo ya gagwe badiri.

² A kwana le badiri gore ka tšatši e tlo ba šeleng, a ba roma ba ya tšhemong ya gagwe.

³ A tšwa gape ka nako ya boraro, a hwetša ba bangwe ba eme lepatlelong ba se na modiro.

⁴ A bolela le bona a re: Le lena yang tšhemong ya ka; ke tlo le nea se se swanetšego. -- Le bona ba ya.

⁵ A tšwa gape ka nako ya go selela, le ka ya senyane, a dira ka mokgwa woo.

⁶ Ge a etšwa ka nako ya lesome le motšo o tee, a bona ba bangwe ba eme ba se na modiro; a bolela le bona a re: Le reng le ehlwa le eme fela letšatši ka moka?

⁷ Ba fetola ba re: Ke ka gobane ga ra thwalwa ke motho. Yena a re: Le lena yang tšhemong ya ka; le tlo tšea se se le swanetšego.

⁸ E šetše e le mantšiboa, mong wa tšhemo a botša molaki wa gagwe a re: Bitša badiri, o ba nee moputso wa bona; o thome ka ba morago, o fetše ka ba pele.

⁹ Gwa tla ba go thwalwa ka nako ya lesome le motšo o tee, ka moka ba newa šeleng-šeleng.

¹⁰ Ge go fihla ba pele, ba re re tlo tšea se se fetišago; fela, le bona ba tšea šeleng-šeleng.

¹¹ Ge ba fiwa yona, ba galalela mong wa ngwako ba re:

¹² Bao ba morago ba dirile nako e tee fela, mme o ba lekantše le rena ba re rwelego boima bja letšatši ka moka le go fiša ga lona.

¹³ Mong wa ngwako a fetola a bolela le e mongwe wa bona a re: Wena mogweraka! Ga ke go pate. A ga wa ka wa kwana le nna ka šeleng?

¹⁴ Tšea se e lego sa gago o sepele; ge e le nna, yo wa morago ke rata go mo nea se se lekanago le sa gago.

¹⁵ Afa ga go a ntshwanela ge ka tše e lego tša ka ke dira ka mo ke ratago? O nkgatholela mahlo ka gobane ke le yo botho?

¹⁶ Go tlo ba bjalo: Ba morago e tlo ba ba pele; mme ba pele e tlo ba ba morago. Gobane ba ba biditšwego ke ba bantši; fela ba ba kgethilwego ga ba nene.

¹⁷ Mohla a le tseleng a rotogela Jerusalema, a bitša barutiwa ba gagwe ba lesome le metšo e mebedi, a ya thoko mo go sego batho, a bolela le bona a re:

¹⁸ Bjale re rotogela Jerusalema; mme Morwamotho o tlo gafelwa baperisita ba bagolo le bamangwalo, mme ba tlo mo ahlolela polao.

¹⁹ Ba tlo mo gafela diatleng tša bantle, gore a kwerwe, a otliwe, a bapolwe sefapanong; fela, ka tšatši la boraro o tlo tsoga.

²⁰ Ka lebaka leo go kile gwa tla mmago barwa ba Tsebedeo, a na le barwa ba gagwe, a mo khunamela a na le se a ratago go se kgopela.

²¹ Jesu a re: O ratang? Yena a re: A nke o re barwa ba ka ba babedi ba mmušong wa gago e mongwe a dule ka go le letona la gago, e mongwe a dule go la ntšogošo.

²² Jesu a fetola a re: Ga le tsebe se le se kgopelago. A le ka kgona go nwa senwelo se ke yago go se nwa, le ge e ka ba go kolobetšwa ka kolobetšo ye ke kolobetšwago ka yona? Bona ba re: Re ka kgona.

²³ Jesu a re: Senwelo sa ka le tlo se nwa; le kolobetšo ye ke kolobetšwago ka yona, le tlo kolobetšwa ka yona; ge e le go dula ka mo letsogong la ka le letona le go la ntsogošo, ga se mo motho a kago newa ke nna; go tlo newa bao ba go lokišeditšwego ke Tate.

²⁴ Ya re ge ba lesome ba di kwa, ba ba hlonamela ka kudu, banna bao le mosadi yoo.

²⁵ Jesu a ba bitša bohle a re: Le a tseba; marena a ditšhaba sa bona ke go buša, mme sa ba bagolo ke go dira batho ka maatla.

²⁶ Go lena go se ke kwa ba bjalo. E a ratago go ba e mogolo mo go lena, a a be modiredi wa lena.

²⁷ Le e a ratago go ba wa pele mo go lena, a a be mohlanka wa lena;

²⁸ A etše Morwamotho e a sa kago a tlela go direlwa, a tlile go direla, le go neela bophelo bja gagwe gore e be topollo ya ba bantši.

²⁹ Ya re ge a etšwa motseng wa Jeriko, a latelwa ke lešaba le lentši.

³⁰ Ba bona batho ba babedi ba difofu ba dutše hleng ga tsela. Bona bao ge ba ekwa gore ke Jesu e a fetago, ba goeletša ba re: Re gaogele, Morena Morwa wa Dafida!

³¹ Lešaba la ba kgalema la re ba homole; bona gomme ya ba gona ba hlabošago mantšu ba re: Re gaogele, Morena Morwa wa Dafida!

³² Jesu a ema, a ba bitša, a re: Le rata ge nka le direlang?

³³ Bona ba re: Morena, a mahlo a rena a budollwe!

³⁴ Jesu a ba šokelwa, a kgwatha mahlo a bona, ba napa ba bona e sa le semeetseng; mme ba mo latela.