Mateu 19 - BIBELE

Tša tlhalo. Bana ba tlišwa go Jesu, tša lehumo

¹ Eitše ge Jesu a feditše dipolelo tšeo, a tloga Galilea, a tla dinageng tša Judea mošola wa Jorodane.

² A latelwa ke mašaba a mantši a batho; mme a ba fodiša bohle.

³ Le bafarisei ba tla go yena; bona ba mo leka ba re: A monna o dumeletšwe go hlala mosadi wa gagwe ge a na le taba ye a e bonago?

⁴ Jesu a fetola a re: A ga la ka la bala gore, E a ba dirilego mathomong, o ba dirile monna le mosadi?

⁵ A re: Ka baka leo monna o tlo tlogela tatagwe le mmagwe a gomarela mosadi wa gagwe; mme ba babedi bao a re ba tlo ba nama e tee.

⁶ Ke gonagee, e ka se hlwe e eba ba babedi, ba tlo ba nama e tee. Bjale, se Modimo a se tlemagantšego, motho a se ke a se aroganya.

⁷ Bona ba re: Moshe o beetšeng molao wa go ntšha lengwalo la tlhalo le go hunolla?

⁸ Jesu a fetola a re: Moshe ge a le dumelela go hlala basadi, o dirišitšwe ke bothata bja dipelo tša lena. Fela, go tloga mathomong go be go se bjalo.

⁹ Ge e le nna ke le botša ke re: Motho e a hlalago mosadi wa gagwe, ge e se ka baka la bootswa, mme a tšea e mongwe, o dira bootswa; le e a tšeago mohlalwa o dira bootswa.

¹⁰ Barutiwa ba gagwe ba re: Ge taba ya monna le mosadi e dutše bjalo, gona go kaone ge motho a sa tšee.

¹¹ Jesu a re: Taba še, ye e sa hlaloganywego ke bohle, ge e se ba ba filwego:

¹² Go na le dikgope tše di tswetšwego e le dikgope; le gona go na le dikgope tše di dirilwego dikgope ke batho; le tše dingwe di gona tše di itirilego dikgope ka baka la mmušo wa magodimo. -- E a kgonago go kwešeša a a kwešeše.

¹³ Ke mo ba tlišitšego bana go yena, gore a ba bee diatla a rapele; mme barutiwa ba ba kgalema.

¹⁴ Jesu a re: Lesang bana bao; le se ke la ba thibela ge ba tla go nna, gobane mmušo wa magodimo ke wa ba ba bjalo.

¹⁵ A ba bea diatla, a tsebo tloga felo fao.

¹⁶ Ba bona motho e mongwe a etla go yena; a re: Moruti yo botse! Se se botse se nkago se dira ke eng, gore ke be le bophelo bjo bo sa felego?

¹⁷ Jesu a re: O reng o ntira yo botse. Yo botse ke yena o tee fela. Fela, ge o rata go tsena bophelong, dira tše molao o di bolelago.

¹⁸ Monna yoo a re: Ke di fe? Jesu a re: Ke melao ye e rego: o se ke wa bolaya; o se ke wa otswa; o se ke wa utswa; o se ke wa bolela bohlatse bja maaka.

¹⁹ Godiša tatago le mmago; mme wa geno o mo rate ka mokgwa wo o ithatago ka wona.

²⁰ Lesogana leo la re: Tšeo ka moka ke di lotile go tloga bjaneng bja ka; ke sa hlaelelwa ke eng!

²¹ Jesu a re: Ge o rata go ba yobolo ka tlalo, gona yaa o rekiše tše o nago natšo, o di abele bahloki, mme o tle o ntatele.

²² Ge lesogana leo le ekwa phetolo ye, la tloga le nyamile, ka gobane le be le na le mahumo a mantši.

²³ Jesu a bolela le barutiwa ba gagwe a re: Ruri, ke a le botša, go tsena mmušong wa magodimo go thatafalela mohumi.

²⁴ Le gona ke a le botša, mohumi go tsena mmušong wa magodimo, go kaone ge kgomo e re e tsena ka lešobana la tšhwana.

²⁵ Barutiwa ba re go kwa a realo ba tlabega gagolo, ba re: Gona go ka phologa mang?

²⁶ Jesu a ba lebelela, a re: Mo go batho seo ga se kgonege; go Modimo ke mo go kgonegago tšohle.

²⁷ Ke mo Petro a fetotšego a re: Šedi; rena re tlogetše tšohle; se re tlogo se hwetša ke eng?

²⁸ Jesu a re: Ruri, ke a le botša, mohla go tlogo mpshafala tšohle, mohla Morwamotho a tlogo dula sedulong sa letago la gagwe, lena ba le ntatetšego le tlo dula ditulong tše lesome le metšo e mebedi, la ahlolela meloko e lesome le metšo e mebedi ya Isiraele.

²⁹ Mang le mang a tlogetšego lapa labo, goba bana babo, goba dikgaetšedi, goba tatagwe le mmagwe, goba bana, goba mašemo e le ka baka la leina la ka, o tlo hwetša tše di fetišago tšeo kgolekgole, le bjona bophelo bjo bo sa felego e tlo ba kabelo ya gagwe.

³⁰ Ba bantši e lego ba pele, e tlo ba ba morago; mme ba morago, e tlo ba ba pele.