Mateu 17 - BIBELE

Tagafalo ya Jesu, segafa sa ngwedi, šeleng ya lekgetho

¹ Ge go fetile matšatši a selelago, Jesu a tloga a na le Petro, le Jakobo, le Johane monnagwe; mme ba ya thabeng e telele ba nnoši.

² A fetoga lebopo ba mo lebeletše, sefahlogo sa gagwe sa phadima bjalo ka letšatši, diaparo tša gagwe tša šweufala wa seetša.

³ Ba bona go tšwelela Moše le Eliya, ba tla ba bolela le yena.

⁴ Petro a bolela a re: Morena ke mo go botse ge re le fa; ge o rata re ka hloma mekutwana e meraro fa, o mongwe e be wa gago, o mongwe e be wa Moše, o mongwe e be wa Eliya.

⁵ A re a sa bolela, gwa tla leru le le editšego la ba apeša ka moriti; ba kwa lentšu le etšwa lerung, le re; yo ke yena Morwamoratwa wa ka, yo ke kgahlwago ke yena; le mo kwe.

⁶ Barutiwa ge ba ekwa lentšu leo, ba wa ka difahlogo, ba boifa ka kudu.

⁷ Jesu a tla go bona a ba kgwatha a re: Tsogang, le se boife.

⁸ Ge ba taditetša mahlo, ba se ke ba bona motho, ge e se Jesu a nnoši.

⁹ Ge ba fologa thabeng, Jesu a ba laela a re: Le se ke la botša motho pono ye, Morwamotho a be a tsoge bahung.

¹⁰ Barutiwa ba gagwe ba mmotšiša ba re: Bamangwalo ba rang ge ba re: Go swanetše go thoma go tla Eliya?

¹¹ Jesu a fetola a re: Eliya ke wa go tla pele, le go lokiša tšohle.

¹² Gomme ke a le botša: Eliya o be a tlile, mme ga ba ka ba mo tseba. Ba mo dirile ka mo ba ratilego. Le Morwamotho ba tlo mo dira ka mokgwa woo; ba tlo mo tlaiša.

¹³ Barutiwa gomme ba lemoga gobane o ba botša tša Johane Mokolobetši.

¹⁴ Ya re ge ba boela bathong, gwa tla motho e mongwe, a mo khunamela ka matolo,

¹⁵ A re: Morena, gaugela morwa wa ka. O na le bogafa bja ngwedi, mme o tlaišega o mobe; gobane ke gantši a wela mollong; ke gantši a wela le meetseng.

¹⁶ Ke be ke mo tlišitše go barutiwa ba gago; bona ba palelwa go mo fodiša.

¹⁷ Jesu a fetola a re: Aowii! Moloko o sa dumelego, o sa tsebalegego! Ke tlo ba le lena go le gokae? Ke tlo le kgotlelela go le gokae? Mo tlišeng fa go nna.

¹⁸ Jesu a napa a kgalema moya woo, mme wa tšwa; mošemanyana a fola ka yona nako yeo.

¹⁹ Barutiwa ba tla go Jesu ba bolela le yena thopeng, ba re: Ke ka baka lang ge rena re paletšwe go o leleka?

²⁰ Jesu a re: Le šitišitšwe ke go hlaela tumelo; gobane ke le botša therešo ge ke re: Ge le ka ba le tumelo e kakago thorwane ya lehloko, le ka bolela le thaba ye la re: Tloga mo, o ye kua; ya tlo tloga ya ya. Go ka se ke gwa ba le se se le palelago.

²¹ Fela, mohuta wo wa meoya e mebe ga o tšwe ge e se ka thapelo le ka go ikona.

²² Ge ba sepela le naga ya Galilea, Jesu a bolela le bona a re: Morwamotho o tlo gafelwa diatleng tša batho.

²³ Ba tlo mmolaya, mme ka tšatši la boraro o tlo tsoga, Ge a realo ba nyama gagolo.

²⁴ Ge ba tsena Kaperenaume, ba lekgetho la phuthego ba tla go Petro ba re: A moruti wa lena ga a ntšhe lekgetho?

²⁵ Petro a re: O a ntšha. Ya re ge a tsena ngwakong, Jesu a mo rakapele a re: Simone, go bjang ge o bona; dikgoši tša lefase di tšea lekgetho le dibego go bomang? A di tšhediša bakgomana goba batho ba bangwe?

²⁶ Petro a re: Ba tšhediša batho ba bangwe. Jesu a re: Anthe bakgomana ga ba tšhele!

²⁷ Fela, re se ba kgopiše. Yaa lewatleng, o lahlele kgwega o sware hlapi ye e tlo go rotoga pele. E tlo re ge o e ahlamološa molomo, o tlo hwetša e hupile tšhelete ya lekgetho. Tšea yona, o ba fe, e be go ntšhetša nna le wena.