Mateu 15 - BIBELE

Melao ya batho, mosadi wa Mokanana, Jesu o horiša ba 4 000

¹ Mehleng yeo bamangwalo le bafarisei ba ba tšwago Jerusalema, ba tla go Jesu ba re:

² Barutiwa ba gago ba selelang molao le metlwae ya ba bagolo ba sa hlape diatla ge ba eja bogobe?

³ Jesu a fetola a re: Le lena le selelang molao wa Modimo le eya ka metlwae ya lena?

⁴ Gobane Modimo o laile a re: Godiša tatago le mmago; a buša a re: E a rogago tatagwe le mmagwe o tlo hwa lehu.

⁵ Lena la tla la re: E a botšago tatagwe le mmagwe a re: Tše ke bego ke swanetše go le hola ka tšona ke di dirile sedimo, -- le re a ka lesa go godiša tatagwe le mmagwe.

⁶ Le lahla molao wa Modimo, le eya ka metlwae ya lena.

⁷ Baikaketšitenang! Jesaya o porofetile gabotse a era boena, ge a re:

⁸ Setšhaba se se mpatamela ka legano, se ntheta ka melomo; mola dipelo tša bona di le kgole le nna.

⁹ Gomme ge ba mpoifa, e fo ba lefela, ke thuto ya malayabatho.

¹⁰ A bitša lešaba la mo kgobokanela, a bolela a re: Theetšang le kwišiše!

¹¹ Motho ga a tšhilafale ka se se tsenago ka ganong; o tšhilafala ka se se tšwago ka molomo.

¹² Barutiwa ba gagwe ba tla ba re: A o tseba gore bafarisei, ge ba ekwa se o se boletšego, ba kgopilwe?

¹³ Jesu a fetola a re: Dibjalo ka moka tše di sa kago tša bjalwa ke Tate wa legodimong, di tlo tomolwa.

¹⁴ Ba leseng. Ke difofu dihlahladifofu; gomme ge sefofu se hlahla sefofu, di tlo wela moleteng ka dipedi.

¹⁵ Petro a fetola a re: O nke o re hlathollele šwantšho seo.

¹⁶ Jesu a re: A le lena le sa fela le hloka tlhaologanyo?

¹⁷ A ga lešo la lemoga gore tšohle tše di tsenago ka ganong di ya mpeng, mme tša tlo lahlwa ka tsela ya tšona?

¹⁸ Ge e le tše di tšwago ka molomo di botoga pelong; mme ke tšona di tšhilafatšago motho.

¹⁹ Gobane mo pelong ke mo go tšwago dikgopolo tše mpe, le dipolao, le ditlhalo, le maotswa, le bohodu, le bohlatse bja maaka, le maroga.

²⁰ Ke tšona tšeo di tšhilafatšago motho. Go ja ka diatla tše di sa hlapiwago ga go tšhilafatše motho.

²¹ Jesu a tloga moo, a širogela dinageng tša Tiro le Sidone.

²² Gwa tšwelela mosadi wa Mokanana wa mathoko ao, a goeletša a re: Nkgaugele, Morena Morwa-Dafida; ngwanenyana waka o hlakišwa mo gobe ke moya o mobe.

²³ Yena a se mo arabe le ka lentšu le tee. Barutiwa ba gagwe ba tla ba mo rapela ba re: O nke mo hunolle, gobane o re šetše nthago ka lešata!

²⁴ Jesu a fetola a re: Ga ka rongwa gošele ge e se go dinku tše di lahlegilego tša moloko wa Isiraele.

²⁵ Mosadi yola a fihla, a mo khunamela a re: Morena, nthuše!

²⁶ Jesu a fetola, a re: Ga go botse ge motho a tšea bogobe bja bana, a bo lahlela dimpjanyana.

²⁷ Mosadi a re: Go bjalo, Morena, gomme dimpjanyana di e di je marathana a waga majelong a beng ba tšona.

²⁸ Ke mo Jesu a fetotšego a re: Mosadi! Tumelo ya gago ke e kgolo; o nke direlwe tše o di ratilego. Gomme ngwananyana wa gagwe a fola go tloga ka yona nako yeo.

²⁹ Jesu a tloga felo fao a tla lewatleng la Galilea, a namela thaba a dula.

³⁰ Mašaba a mantši a batho a tla go yena; ba tla ba na le dihlotša, le difofu, le dimuma, le digole, le ba bangwe ba bantši; ba ba bea fase maotong a gagwe, yena a ba fodiša.

³¹ Mašaba a tlabega ge e bona dimuma di bolela, digole di fodile, dihlotša di sepela, difofu di bona; mme ba reta Modimo wa Isiraele.

³² Jesu a bitša barutiwa ba gagwe a re: Batho ba ke ba kwela bohloko gobane e šetše e le matšatši a mararo, ba ehlwa le nna ba se na se ba se llego. Gomme ga ke rate go ba laela ba sa na le tlala, ba se tlo lapa tseleng.

³³ Barutiwa ba gagwe ba fetola ba re: Magobe a go ka horiša lešaba le lekaakaa re tlo a bona kae mona lešokeng?

³⁴ A ba botšiša a re: Le na le dinkgwa tše kae? Bona ba re: Ke tše di šupago, le dihlapi tše di sego nene.

³⁵ Ke mo Jesu a laetšego a re mašaba a bokane fase.

³⁶ A tšea dinkgwa tšeo tše šupago, le dihlapi tšeo, a leboga, a ngwatha a nea barutiwa, barutiwa ba nea mašaba.

³⁷ Ka moka ba ja ba hora; ba topa marathana a šetšego, a tlala diroto tše di šupago.

³⁸ Gomme ba ba llego e be e le banna ba dikete tše nne, go sa balwa basadi le bana.

³⁹ A laelana le mašaba, a namela le selwatle, a tla mathokong a Magdala.