Markose 5 - BIBELE

Segafa sa Gadara; morwedi wa Jairo

¹ Ba fihla mošola wa lewatle nageng ya ba Gadara.

² Ge ba sa fologa leselawatle, ba napa ba gahlana le motho e a nago le moya wa ditšhila a etšwa mabitleng,

³ Yo bodulo bja gagwe bo bego bo le mabitleng. Gomme go be go se motho e a kgonnego go mo tlema, le ge e le ka ditshipi.

⁴ Gobane o be a šetše a tlemilwe ka marala le ka ditshipi; mme ditshipi a di konoganya, a kgaola marala go se motho e a kgonago go mo thapiša.

⁵ O be a dula mabitleng bošego le mosegare, a fela a goa a ithuma ka mabje.

⁶ Ya re ge a bona Jesu a sa le kgole, a kitima a tla a mo khunamela, a hlaboša lentšu a re:

⁷ Ke na le taba mang le wena Jesu Morwa wa Modimo yo godimodimo? Ke go phegelela ka Modimo ke re o se ke wa ntlaiša.

⁸ A realo ka gobane Jesu o be a itše: Tšwa go motho yoo, wena moya wa ditšhila!

⁹ A mmotšiša a re: Leina la gago o mang? A fetola a re: Ke nna Madira, gobane re ba bantši.

¹⁰ A mo phegelela a re Jesu a se ke a mo leleka nageng yeo.

¹¹ Bjale, go be go na le mohlape o mogolo wa dikolobe, di fula modutameng wa thaba.

¹² Meoya e mebe yeo ka moka ya mo kgopela ya re: Re romele dikolobeng tšeo, re yo tsena go tšona.

¹³ Jesu a dumela. Meoya ya ditšhila ya tšwa, ya tsena dikolobeng; mme mohlape ka moka wa iphekemetša ka legaga wa kodumela lewatleng; dikolobe tše e ka bago tše dikete tše pedi tša hwela lewatleng.

¹⁴ Badiši ba tšona ba tšhaba, ba yo bolela motseng le mašemong; batho ba tla go bona se se diregilego.

¹⁵ Ba fihla go Jesu, ba bona motho yola wa meoya e mebe a dutše, a apere, a bego a na le “madira”; mme ba tšhoga.

¹⁶ Ba ba di bonego ba ba anegela se se diregetšego motho yoo wa meoya e mebe, le tša dikolobe.

¹⁷ Bjale ba thoma go kgopela Jesu, ba re a tloge mellwaneng ya bona.

¹⁸ Ge Jesu a sa re ke namela leselawatle, motho yola a bego a na le meoya e mebe, a mo kgopela go ka ya le yena.

¹⁹ Jesu a se mo dumelele, a mo laela a re: Boela gae go ba geno, o ba botše tše kgolo tše Morena a go dirilego tšona, ka mo a go gaugetšego.

²⁰ Motho yoo a tloga a ya le naga ya Dekapoli, a kwalakwatša tše kgolo tše Jesu a mo dirilego tšona; bohle ba tlabega.

²¹ Eitše ge Jesu a seletše mošono ka leselawatle, a phuthegelwa ke lešaba le lentši, yena a sa le lešing la lewatle.

²² Ke ge go fihla e mongwe wa ba bagolo ba phuthego, yo leina la gagwe e lego Jairo; a re go bona Jesu, a wela fase maotong a Jesu.

²³ A mo rapela a re: Morwedi wa ka o a felela. A nke o tle o mmee diatla a phologe a phele.

²⁴ Jesu a ya nae; lešaba le lentši la mo latela, la ba la mo pitlaganya.

²⁵ Gomme go be go na le mosadi e a bego a feditše nywaga e lesome le metšo e mebedi a babja ke bolwetši bja ngope.

²⁶ O be a tlaišegile ka tše ntši ka dingaka tše ntši, a feditše dilo tša gagwe ka moka ka go alafsa a sa fole, bolwetši bja gagwe bo fela bo befa.

²⁷ A ba a botšwa tše Jesu a di dirago; a tla a le gare ga lešaba, a kgwatha kobo ya Jesu ka morago.

²⁸ Gobane o be a re: Ge nka fo kgwatha kobo ya gagwe fela, ke tla fola.

²⁹ Ka kgonthe mothopo wa madi a gagwe wa gopa, a kwa mo mmeleng wa gagwe a fodile bohloko bjoowe.

³⁰ Jesu ge a ekwa ge mo go yena go tšwele maatla, a napa a retologa a le gare ga lešaba, a re: Ke mang a kgwathilego kobo ya ka?

³¹ Barutiwa ba gagwe ba re: Ge o bona lešaba le go pitlaganya, a o sa re: Ke kgwathilwe ke mang?

³² Jesu a ba dikološa mahlo gore a bone yoo a di dirilego.

³³ Ke mo mosadi yoo a tšhogilego a roromela, gobane a tseba se a se dirilwego; a tla a mo khunamela a mmotša tšohle a se ute selo.

³⁴ Jesu a re: Ngwanaka! Tumelo ya gago e go phološitše; sepela o rotše pelo, o fodile bohloko bja gago.

³⁵ A re a sa bolela, gwa fihla ba ga mogolo wa phuthego, ba re: Morwedi wa gago o hwile. Moruti yoo o sa mo lapišetšang?

³⁶ Jesu ge a ekwa ba realo, a bolela le mogolo wa phuthego a re: Se tšhoge! Sa gago a e be go dumela.

³⁷ A ya a na le Petro le Jakobo le Johane ngwanabo Jakobo, a se dumele ge go latela ba bangwe.

³⁸ A fihla ngwakong wa mogolo wa phuthego, a bona lešata, ge ba lla ba golola ka gogolo.

³⁹ A tsena a ba sola a re: Le tlaletšang lešata? Le reng le lla? Ngwanenyana yo ga a ka a hwa; o robetše.

⁴⁰ Bona ba mo sega. Yena a ba lelekela ntle bohle, a bitša tatago ngwanenyana le mmagwe, le bao a bego a tlile nabo a tsena nabo moo ngwanenyana a letšego gona.

⁴¹ A mo swara ka seatla, a re: Thalitha kumi! Ke go re: Mosetsanyana, ke re: Tsoga!

⁴² A sa realo ke ge mosetsanyana a tsoga, a sepela. E be e le wa nywaga e lesome le metšo e mebedi. Batho ba swarwa ke tlalelo e kgolo.

⁴³ Jesu a ba laela ka maatla, a re taba ye e se tsebje ke motho; a re ngwanenyana a fiwe dijo.