Markose 16 - BIBELE

O tsoga bahung. O roma barutiwa. O boela legodimong

¹ Ya re ge Sabatha e fetile, Maria Magdalena, le Maria mmago Jakobo, le Salome, ba reka ditlolo gore ba ye ba mo tlotše.

² Ka letšatši le le hlatlamago la Sabatha e sa le ka meso, ba tla lebitleng letšatši le sa hlaba.

³ Ba botšana ba re: Ke mang e a tlo go re phsikološetša lefsika, a le tloša mojako wa lebitla?

⁴ Ge ba iša mahlo, ba bona lefsika le pshikološitšwe; gomme lona e be e le le legolo ka kudu.

⁵ Ya re ge ba tsena lebitleng, ba bona lesogana le dutše ka letsogong le letona, le apere seaparo se setelele se sešweu; mme ba tšhoga.

⁶ Lesogana la bolela le bona la re: Le se ke la tšhoga. Le nyaka Jesu wa Natsaretha e a bego a bapotšwe. O tsogile, ga a gona mo. Bonang felo mo ba bego ba mmeile gona.

⁷ Fela, yang le botše barutiwa ba gagwe, le Petro, le re o le etapele o ya Galilea. Le tlo mmona gona kua bjalo ka ge a le boditše.

⁸ Basadi bao ba tšwa ka pele, ba tšhaba lebitleng, gobane ba be ba swerwe ke go roromela le go tšhoga; fela, ba se botše motho selo, gobane ba be ba boifa.

⁹ Ya re ge a tsogile ka lona tšatši leo la go hlatlama Sabatha, a thoma ka go iponatša go Maria Magdalena, yo a kilego a leleka meoya e mebe e šupago go yena.

¹⁰ Maria a ya a botša bao ba go ba le Jesu, a ba hwetša ba nyamile, ba lla.

¹¹ Mme bona ge ba botšwa gore o a phela, le gore O bonwe ke yena Maria, ba se dumele.

¹² Ka morago a iponatša go ba babedi ba bona, ba le tseleng ba eya mašemong, a tla lebopo le a lego ka lona e le le šele.

¹³ Le bona ba tla ba tsebiša ba ba bego ba šetše; mme le bona ba se ba dumele.

¹⁴ A ba a iponatša go ba lesome le motšo o tee ge ba dutše dijong; a kgala go se dumele ga bona le bothata bja dipelo tša bona, ge ba sa ka ba dumela bao ba mmonego a tsogile.

¹⁵ A bolela le bona a re: Yang lefaseng ka moka, le kwatše Ebangedi go babopja ka moka.

¹⁶ E a dumelago me a kolobetšwa, o tlo phološwa; e a sa dumelego o tlo lahlwa.

¹⁷ Mehlolo ye e tlo go felegetša ba ba dumetšego še: Ba tlo leleka meoya e mebe ka leina laka; ba tlo bolela ka maleme a mafsa;

¹⁸ Ba tlo swara dinoga ka diatla; le ge ba nwele se se bolayago, se ka se ke sa ba dira selo; ba tlo bea balwetši diatla, ba fola.

¹⁹ Yena Morena bjale, ge a feditše go bolela le bona, a rotošetšwa legodimong, a yo dula ka letsogong le letona la Modimo.

²⁰ Ge e le bona, ba tšwa ba goelela gohle, Morena a fela a na le bona ka matla a gagwe, a tiiša lentšu ka mehlolo ye e bapetšego nalo.