Lukase 9 - BIBELE

Baapostola ba a rongwa. Herode o rata go bona Jesu. Go horišwa ba 5 000. Tumelo ya Petro. Tagafalo. Segafa sa ngwedi. Jesu o ruta barutiwa ba gagwe

¹ Gomme a bitša ba lesome le metšo e mebedi, ba tla, a ba fa matla a go buša meoya e mebe ka moka le go e leleka, le a go fodiša malwetši.

² A ba roma a re ba yo goelela tša mmušo wa Modimo, ba yo fodiša balwetši.

³ A ba laela a re: Le se ye le rwele morwalo, le se sware lehlotlo le ge e le mokotla, le ge e le mefago, le ge e le tšhelete; le se ke la ba le dikobo tše pedi.

⁴ Lapa leo le tsenago go lona le dule go lona, le be le wele tsela.

⁵ Ba ba sa le amogelego, motseng, wa bona le tloge le hlohlora le lerole la dinaong tša lena, gore e be bohlatse go bona.

⁶ Barutiwa ba tšwa ba ya le metse, ba iša ditaba tše botse, ba fodiša balwetši mo gohle.

⁷ Herode Teterareka a kwa tšohle tše di dirwago ke yena, a phorophora ge ba bangwe ba mmolela ba re: Johane o tsogile bahung.

⁸ Ba bangwe ba re: Go tšweletše Eliya. Ba bangwe ba re: Go tsogile e mongwe wa baporofeta ba kgale.

⁹ Herode a re: Johane ke mo kgaotše hlogo; bjale ke mang yo ke kwago ba mmolela ka tše kaakaa? Mme a kganyoga go mmona.

¹⁰ Baapostola bao, ba anegela Jesu tše kgolo tše ba di dirilego. Yena a tloga le bona, a ya nageng ya lešoka la kgaufsi le motse wa Betsaida.

¹¹ Mašaba a batho, ge ba lemogile fao, ba mo latela. Yena a ba gahlanetša, a ba botša tša mmušo wa Modimo, a fodiša ba ba tletšego go fodišwa.

¹² Ke ge letšatši le rapama. Ba lesome le metšo e mebedi ba tla go yena ba re: Gomiša lešaba le, gore ba phatlalale ba ye metsaneng le merakeng, ba inyakele tša go ja; gobane fa re dutše lešokeng.

¹³ Jesu a fetola a re: A ba fiwe dijo ke bolena. Bona ba re: Ga re na selo ge e se dinkgwa tše tlhano le dihlapi tše pedi, ge o sa re re ye re rekele lešaba le lekaakaa le dijo.

¹⁴ Gomme banna ba ba bego ba le moo e nyakile go ba ba dikete tše tlhano. Jesu a laela barutiwa ba gagwe a re: Ba dudišeng ka dihlopha tša ba masome a mahlano.

¹⁵ Gomme ba dira bjalo; ba ba dudiša ka moka.

¹⁶ Yena a tšea dinkgwa tše tlhano tšeo, le dihlapi tše pedi, a lelalela legodimong, a di šegofatša, a ngwatha a nea barutiwa, bona ba di bea pele wa lešaba.

¹⁷ Bohle ba ja ba hora; gwa tšewa tše ba di šadišitšego, gwa tlala diroto tše lesome le metšo e mebedi ka maratha ao.

¹⁸ Mohla a le thapelong, a na le barutiwa ba gagwe ba nnoši, a ba botšiša a re: Mašaba a re ke nna mang?

¹⁹ Ba fetola ba re: Ba re o Johane Mokolobetši. Ba bangwe ba re o Eliya. Ba bangwe ba re o Moporofeta; ba re go tsogile e mongwe wa baporofeta ba kgale.

²⁰ A ba botšiša a re: Gomme lena le re ke mang? Gwa fetola Petro a re: O Kriste wa Modimo.

²¹ Jesu a ba phegelela a ba iletša a re taba yeo ba se ke ba e botsa motho.

²² A re: Morwa motho o swanetše go tlaišwa ka tše ntši, le go lahlwa ke ba bagolo le baperisita ba bagolo le ba mangwalo, le go bolawa le go tsošwa ka tšatši la boraro.

²³ A ba botša bohle a re: Ge motho a rata go ntšhala morago, a ikgafe, a rwale sefapano sa gagwe ka mehla, mme a ntatele.

²⁴ E a ratago go phološa bophelo bja gagwe o tlo bo lahla; gomme e a lahlago bophelo bja gagwe ka baka laka, yena o tlo bo phološa.

²⁵ Gomme motho go ka mo holang ge a ka rua lefase ka moka, mola a itahla a itshenya?

²⁶ Wa maseme ka nna le ka dipolelo tšaka, le Morwamotho o tlo mo gerula mohla a tlago ka letago la gagwe le la Tatagwe le la barongwa ba bakgethwa.

²⁷ Gomme ke a le botša ka go rereša, mo go ba ba emego fa go na le ba ka se kego ba kwa lehu ba sešo ba bona mmušo wa Modimo.

²⁸ Ge go fetile matšatši a e ka bago a seswai a boletše ditaba tše, a tloga a na la Petro le Johane le Jakobo, a rotogela thabeng a yo rapela.

²⁹ Ya re ge a sa rapela, sefahlago sa gagwe sa fetoga, le diaparo tša gagwe tša šweufala tša phadima.

³⁰ Ba bona banna ba babedi ba bolela le yena; e be e le Moshe le Eliya.

³¹ Ba bonala ba le letagong; ba bolela tša pheletšo ya modiro wa gagwe wo a yago go o phetha Jerusalema.

³² Petro le bao ba bego ba na nae ba be ba imetšwe ke boroko; ba re go phafoga, ba bona letago la gagwe, le banna bao ba babedi ba ba emego le yena.

³³ Ge bao ba tloga, Petro a bolela le Jesu a re: Morena, ke mo go botse re le fa; a re hlomeng mekutu e meraro; o mongwe e be wa gago; o mongwe e be wa Moše; o mongwe e be wa Eliya. A realo a sa tsebe se a se bolelago.

³⁴ A sa realo gwa tla leru, la ba apeša ka thiti; ba boifa ge banna ba babedi bao ba širogela lerung.

³⁵ Gwa kwala Lentšu le etšwa lerung le re: Yo ke yena Morwamoratwa waka; le mo kwe.

³⁶ Ge Lentšu le le kwala, ba hwetša Jesu a le nnoši. Bona ba homola; tše ba di bonego ba se di botše motho mehleng yeo.

³⁷ Ka la ka moswana ge ba fologa thabeng, ba gahlanetšwa ke lešaba le lentši.

³⁸ Ba bona monna e mongwe a le gare ga lešaba, a goa a re: Moruti, ke a Go rapela, a nke o lebelele morwa waka, gobane ke a lego nnoši go nna.

³⁹ Šo o a swarwe ke moya a nape a goeletše, ge o mo utlautla a ntšha mahulo; gomme o mo tlogela ka gothata ge o šetše o mo onne.

⁴⁰ Ke kgopetše, barutiwa ba gago gore ba o leleke; mme o ba paletše.

⁴¹ Jesu a fetola a re: Aowii! Moloko wa ba ba sa dumelego wa ba kgopo! Ke tlo ba le lena go le gokae ke le kgotlelela? Morwa wa gago mo tliše fa.

⁴² Ya re a sa tlišwa, moyamobe wa mo akgaakga o mo utlautla Jesu a kgalema moya woo wa ditšhila a fodiša mošemanyana eo, a mo gafela tatagwe.

⁴³ Ka moka ba tlabega ka bogolo bja Modimo. Ge batho ba sa kgotsa tšohle tše Jesu a bego a di dira, yena a bolela le barutiwa ba gagwe a re:

⁴⁴ Lentšu le a le tsene ditsebeng tša lena, ge ke re: Morwamotho o tloga a gafelwa matsogong a batho.

⁴⁵ Fela, lentsu leo bona ga ba ka ba le kweša, le be le ba utagetše ba se le lemoge; mme ba šia go mmotšiša taba yeo.

⁴⁶ Le gona ba be ba na le kgang ya bona, ya go re e mogolo mo go bona ke mang.

⁴⁷ Jesu ge a bona kgopolo ya dipelo tša bona, a tšea ngwana e mongwe a mo emiša hleng ga gagwe.

⁴⁸ A bolela le bona a re: Mang le mang e a amogelago ngwana yo leineng laka, o amogela nna; gomme e a amogelago nna, o amogela e a nthimilego. Gomme e a lego e monyenyane mo go lena bohle, ke yena a tlo go ba e mogolo.

⁴⁹ Johane a bolela a re: Morena, re bone motho e mongwe a leleka meoya e mebe ka Leina la gago, ra mo iletša ka gobane a sa go latele le rena.

⁵⁰ Jesu a re: Le se mo iletše; gobane e a sa lwego le rena o a re lwela.

⁵¹ Ge go šetše go fihla mehla ya ge a tlo tlošwa, a wela tsela a lebile motse wa Jerusalema.

⁵² A roma dimatlane kua pele ga gagwe. Ba ya ba tsena motseng o mongwe wa Basamaria, ba mo kgopelela bolao.

⁵³ Batho bao ba gana go mo amogela, ka gobane a lebišitše sefahlogo Jerusalema.

⁵⁴ Barutiwa ba gagwe, Jakobo le Johane, ge ba di bona, ba re: Morena, a o rata ge re ka re mollo o tšwago legodimong o ba fediše, re dire tše di dirilwego ke Eliya?

⁵⁵ Jesu a retologa a ba kgalema a re: Moya wo le lego ba wona, a ga le o tsebe?

⁵⁶ Morwamotho ga atla go senya meoya ya batho; o tlile go e phološa. -- Gomme ba ya motseng o mongwe.

⁵⁷ Ba le tseleng ba sepela, motho e mongwe a tla a re: Ke tlo go latela mo o kago ya!

⁵⁸ Jesu a re: Diphukubje di na le melete; le dinonyana tša sebakeng di na le dihlaga; ge e le Morwamotho ga a na mo a kago samiša hlogo.

⁵⁹ A bitša e mongwe a re: Ntatele! Eo a re: Morena, ntumelele ke thome go yo boloka tate.

⁶⁰ Jesu a re: Lesa bahu ba boloke bahu ba bona; mme wena o ye o kwalakwatše mmušo wa Modimo.

⁶¹ E mongwe a tla a re: Ke tlo go latela, Morena; fela, o k'o ntumelelele ke thome go laela bešo.

⁶² Jesu a re: E a išitšego seatla mogomeng, mme a retologela tša kwa nthago, ga a lokela mmušo wa Modimo.