Kutollo 5 - BIBELE

Lengwalo la mahuto a šupago

¹ Ka bona seatleng se setona sa eo a dutšego sedulong sa bogoši go le lengwalo le le ngwadilwego ka teng le ka ntle, le le tlemilwego ka mahuto a šupago.

² Ka bona Morongwa wa maatla a goelela ka lentšu le legolo a re: Ke mang a loketšwego ke go bula lengwalo le, le go kgaola mahuto a lona?

³ Mme legodimong, le mo lefaseng, le tlase ga lefase, go be go se e a kgonago go bula lengwalo leo le go le bona.

⁴ Nna ka lla gagolo, ge go hlokwa e a swanetšwego ke go bula lengwalo leo le go le bona.

⁵ E mongwe wa bagolo a bolela le nna a re: Se lle. Tseba gore go fentše Tau ya loko la Juda, Lehlogedi la modu wa Dafida, gore a bule lengwalo leo, a kgaole mahuto a lona a šupago.

⁶ Ka bona mo gare ga sedulo sa bogoši, le gare ga diphedi tše nne le magare a bagolo go eme Kwana ye e kego e hlabilwe, e na le dinaka tše šupago le mahlo a šupago, e lego Meoya e šupago ya Modimo, ye e rometšwego lefaseng ka moka.

⁷ Yona Kwana ya tla ya tšea lengwalo seatleng sa eo a dutšego sedulong sa bogoši.

⁸ Kwana ge e tšea lengwalo leo, diphedi tše nne le bagolo ba masome a mabedi le metšo e mene, ba lotšha Kwana, e mongwe le e mongwe a swere seletšo le moruswi wa gauta o tletšego diorelo; ke dithapelo tša bakgethwa.

⁹ Ba opela sefela se sefsa, ba re: Di go swanetše, ge o tšea lengwalo wa kgaola mahuto a lona; gobane o hlabilwe mme go ba meloko yohle le maleme ohle le ditšhaba tšohle le go Bantle bohle, o na le ba o ba reketšego Modimo ka madi a gago,

¹⁰ wa ba dira magoši le baperisita ba Modimo wa rena; mme ba tlo buša mo lefaseng.

¹¹ Ka lebelela, ka kwa mogoo wa Barongwa ba bantši ba ba dikaneditšego sedulo sa bogoši le diphedi tšeo le bagolo bao; palo ya bona e le kgoloborethe le diketekete.

¹² Ba hlaboša mantšu ba re: Kwana ye e hlabilwego e loketše go tšea maatla le lehumo le bohlale le go kgona le go godišwa le go retwa le go lebogwa.

¹³ Ka kwa dibopša tšohle tša legodimong le lefaseng, le tša tlase ga lefase le lewatleng, tšohle tše di lego madulong ao, ka di kwa di re: Go eo a dutšego sedulong sa bogoši, le go Kwana a go išwe tebogo le kgodišo, le theto le maatla go iša mehleng ya neng le neng.

¹⁴ Diphedi tše nne tšela tša re: Amene! Bagolo bala ba masome a mabedi a metšo e mene ba lotšha ba khunamela eo wa go phela go iša mehleng ya neng le neng.