Kutollo 22 - BIBELE

Noka ya meetse a bophelo. Dikeletšo le malaeledi

¹ A ntšhupetša noka ye e sekilego ya meetse a bophelo, e phadimago boka legakabje le le bonatšago, e tšwa go sedulong sa bogoši sa Modimo le sa Kwana.

² Mo mekgotheng ya gona, ka mošono le mošola wa noka, go sehlare sa bophelo sa go enywa dienywa tše lesome la metšo e mebedi; se enywa dienywa ka kgwedi e nngwe le e nngwe. Mme matlakala a sehlare seo ke a go fodiša ditšhaba.

³ Go ka se ke gwa ba le sehlolakotsi sefe le sefe. Sedulo sa bogoši sa Modimo le sa Kwana se tlo ba moo; mme bahlanka ba gagwe ba tlo mo hlankela.

⁴ Ba tlo bona sefahlogo sa gagwe, mme leina la gagwe le tlo ba le le diphatleng tša bona.

⁵ Go ka se ke gwa ba le bošego, go ka se hlokwe lebone le seetša sa letšatši, gobane Morena Modimo o tlo ba ediša, mme ba tlo buša go iša mehleng ya neng le neng.

⁶ A bolela le nna a re: Ditaba tše di a botega, ke tša go rereša. Morena Modimo wa meoya ya Baporofeta o romile morongwa wa gagwe, a bontšha bahlanka ba gagwe tša go tlo direga ka bjako.

⁷ Gomme o tsebe, ke tlo tloga ke etla. Wa lehlogonolo ke eo a gomarelago ditaba tša porofeta ya puku ye.

⁸ Mokwi le mmoni wa ditaba tše ke nna Johane. Ka re go di kwa le go di bona, ka khunamela fase naong tša morongwa wa go mpontšha dilo tšeo.

⁹ Yena a re: Hle lesa go realo; nna ke mohlanka boka wena, ke etša wene le bana beno ba baporofeta le ba ba gomarelago ditaba tša puku ye. Khunamela Modimo.

¹⁰ A iša pele a re: Ditaba tša porofeto ya puku ye o se ke wa di boloka wa di tlemelela ka mahuto; gobane lebaka le kgauswi.

¹¹ E a senyago, a a iše pele a senye, wa ditšhila a a iše pele go itšhilafatša. Moloki a iše pele go loka; mokgethwa a iše pele go kgethega.

¹² Tseba gore ke etla ka pela; mme moputso wa ka o tla le nna, moputso wa go tlo bušetša e mongwe le e mongwe ka mo modiro wa gagwe o tlo go ba ka gona.

¹³ Ke nna a le o, nna mathomo le pheletšo, ke nna wa pele le wa bofelo.

¹⁴ Ba lehlogonolo ke bao ba hlatswago diaparo tša bona, ba ya ka melao ya Gagwe gore e be ba go tlo dumelelwa sehlare sa bophelo, ba tsene motseng woo ka dikgoro.

¹⁵ Ba go tlo šala ntle ke dimpša, le baloi, le diotswa, le babolai, le ba medimo e šele, le bohle ba go rata maaka le go a dira.

¹⁶ Nna Jesu ke romile morongwa wa ka, gore a le tsebiše ditaba tše, gore di tsebje diphuthegong. Ke nna modu wa Dafida le moloko wa gagwe; ke nna naledi e phadimago ya meso.

¹⁷ Gomme Moya le mmeeletšwa ba re: Tlaa! Le e a kwago a ke a re: Tlaa! Le e a nyorilwego a a tle a tšee meetse a bophelo a fo fiwa fela.

¹⁸ Mang le mang e a kwago mantšu a porofeto ya puku ye ke mo tiišetša ke re: Ge motho a ka ekeletša taba tše, Modimo o tlo mo ekeletša dikotlo tše di ngwadilwego fa pukung ye.

¹⁹ Ge motho a ka tloša mantšu a puku ya porofeto ye, Modimo o tlo mo amoga kabelo ya gagwe ya sehlare sa bophelo, le ya motseng o mokgethwa, le ya tše di ngwadilwego fa pukung ye.

²⁰ Yena mohlatsedi wa ditaba tše o re: Go bjalo! Ke tla tloga ke etla! -- Amene! Tlaa Morena Jesu!

²¹ Kgaugelo ya Jesu Kriste Mong wa rena a e tlele bakgethwa bohle. Amene.