Kutollo 21 - BIBELE

Legodimo le lefsa. Lefase le lefsa. Jerusalema o mofsa

¹ Ka bona legodimo le lefsa, le lefase le lefsa. Gobane legodimo la pele le be le tlogile le lona lefase la pele. Le lewatle ga le sa le gona.

² Nna Johane ka bona Motsemokgethwa wa Jerusalema o mofsa, ka o bona o fologa o etšwa go Modimo legodimong, o thakgilwe wa monyalwa e a hlophišeditšwego monna wa gagwe.

³ Ka kwa lentšu le legolo le etšwa legodimong le re: Soo ngwako wa Modimo mo gare ga batho; o tlo aga le bona, ya ba setšhaba sa gagwe. Mme yena mong Modimo o tlo ba le bona e le Modimo wa bona.

⁴ Mme yena Modimo o tlo phomola megokgo ka moka mahlong a bona; le lehu le ka se hlwe le eba gona; le ge e le manyami le dillo le bohloko, di ka se hlwe di eba gona; gobane tša pele di fetile.

⁵ E a dutšego sedulong sa bogoši a re: Šidio; dilo tšohle ke di dira tše mphsa. -- Nna a ntaela a re: Ngwala, gobane taba tše ke tša go rereša le go botega.

⁶ A buša a re: Di tšweletše! Ke nna a le o; ke nna mathomo le pheletšo! E a nyorilwego ke tlo mo fa a nwa sediba sa meetse a bophelo; ke tlo mo fa fela.

⁷ Mofenyi, bohwa bja gagwe e tlo ba tšona tšeo; mme ke tlo ba Modimo wa gagwe, yena a ba morwa wa ka.

⁸ Ge e le ba boi, le ba go se dumele, le ba ditšhila, le babolai, le diotswa, le baloi, le ba medimo e šele, le bohle ba maaka, ya bona kabelo e kua bodibeng bja mollo le tshebela. Ke lona lehu la bobedi.

⁹ E mongwe wa Barongwa bala ba šupago, ba bego ba swere meruswi e šupago le kotlo tše šupago, a tla go nna a bolela le nna a re: Tlaa ke go bontšhe monyalwa, mosadi wa Kwana.

¹⁰ A nkiša thabeng e kgolo e telele, a mpontšha motse o mogolo wa Jerusalema o mokgethwa, wo o fologago o etšwa legodimong go Modimo.

¹¹ O na le letago la Modimo. Seetša sa wona se swana le sa lebje le le bohlokwahlokwa la talama ye e phadimago.

¹² O na le morako o mogolo; o na le dikgoro tše lesome la metšo e mebedi, tše di ukametšwego ke barongwa ba lesome la metšo e mebedi. Dikgoro tšeo di ngwadilwe maina a meloko e lesome la metšo e mebedi ya bana ba Isiraele.

¹³ Ka thoko ya bohlabela dikgoro ke tše tharo; ka thoko ya leboa ke tše tharo; ka thoko ya borwa ke tše tharo; ka thoko ya bokdikela ke tše tharo.

¹⁴ Merako ya motse e na le maswika a lesome la metšo mebedi a a thekgilego; mo go ona go tlokilwe maina a Baapostola ba Kwana ba lesome la metšo e mebedi.

¹⁵ Morongwa e a bego a bolela le nna o be a swere lehlaka la gauta la go ela, e le gore a ele motse woo le dikgoro tša wona le merako ya wona.

¹⁶ Gomme motse woo o agilwe o na le dikhutlo tše nne; botelele bja wona bo lekana le bophara. A ela motse ka lehlaka leo, gwa hwetšwa e le botelele bja tsela ya mašemo a dikete tše lesome la metšo e mebedi; botelele bja wona bo lekana le bophara le bogodimo.

¹⁷ A ela morako wa motse, wa hwetšwa o na le meelo e lekgolo le le nago le masome a mane a metšo a mene, ka moelo wa motho e lego o tee le wa morongwa.

¹⁸ Moago wa morako e be e le wa mabje a bohlokwa, wa motse e be e le wa gauta e se nago selabi e le wa magakabje a a bonatšago.

¹⁹ Metheo ya morako e thakgilwe ka mabje a bohlokwa a mehutahuta. Motheo wa pele o na le mabje a talama e khubedu; wa bobedi o le mabjanamatala; wa boraro o na le a mmala wa leratadima; wa bone o na le mabje a botala bja mabjang;

²⁰ Motheo wa bohlano o na le mabje a maswana a mereto; wa go selela o na le a bohubedu bja mollo; wa go šupa o na le a mmalabala wa kgabo ya mollo; wa seswai o na le mabje a botala bja lewatle; wa senyane o na le a mmala wa bosehla le botalana; wa lesome o na le a botala le bosehlana; wa lesome la motšo o tee o na le mabje a botalaboswana, motheo wa lesome la metšo e mebedi o na le mabje a botala bjo bo nago le bohubetšwana.

²¹ Dikgoro tše lesome la metšo e mebedi e be e le dipheta tše lesome la metšo e mebedi; kgoro e nngwe le e nngwe e dirilwe ka pheta e tee. Mekgotha ya motse e be e le lebato la gauta e se nago selabi, eke ke legakabje le le bonatšago.

²² Ge e le Ntlokgethwa ga nka ka e bona; gobane Ntlokgethwa ya gona ke Morena Modimo Ramaatlaohle le Kwana.

²³ Motse woo ga se wa go bonegelwa ke letšatši le kgwedi, o edišwa ke letago la Modimo; lebone la wona ke Kwana.

²⁴ Gomme ditšhaba di sepela seetšeng sa wona; dikgoši tša lefase di tlo o tlišetša letago le tšona.

²⁵ Dikgoro tša wona di ka se tswalelwe mosegare; le gona go ka se ke gwa ba le bošego felo fao.

²⁶ Mme ba tlo o tlišetša letago la ditšhaba le bothakga bja tšona.

²⁷ Go ka se ke gwa tsena se se nyatšegago le e a dirago tša bohlola le maaka. Go tlo tsena ba ba ngwadilwego mo Pukung ya Bophelo ya Kwana.