Kutollo 18 - BIBELE

Tšhwalalanyo ya Babele. Sello lefaseng

¹ Ya ba gona ke bonago morongwa e mongwe a fologa legodimong, a na le maatla a magolo; lefase la edišwa ke letago la gagwe.

² A hlaboša lentšu a hlaba mokgoši o mogolo, a re: O wile! O wile! Motse o mogolo wa Babele. O fetogile bodulo bja diriti, le segola sa meoya yohle ya ditšhila, le segola sa manong a ditšhila a ilwago.

³ Gobane ditšhaba ka moka di nwele sebela se bogale sa bootswa bja wona; mme dikgoši tša lefase di otswitše le wona; babapatši ba lefase ba humile ka boati bja maipshino a wona.

⁴ Ka kwa lentšu le lengwe le etšwa legodimong le re: Khudugang, lena ba setšhaba sa ka, gore le se tlo gwerana le dibe tša motse woo, la tlo welwa ke kotlo tša wona.

⁵ Gobane dibe tša wona di fihla godimong, mme Modimo o gopola makgopo a wona.

⁶ O direng se o le dirilego sona; mediro ya wona le e lefetše gabedi; mokgopu woo a bego a o tšhela dihlare, le o tšhelele gabedi.

⁷ Ka mo o bego o ikgantšha o ipshina, le o lekanyetše thlokofatšo le tlaišo; gobane mo pelong ya wona o re: Ke ituletše ke le kgoši ga ke mohlologadi; nka se ke ka bona tlhokofalo.

⁸ Molato ke wona woo ge kotlo di o tlela ka tšatši le tee, e le dinkhu le tlhokofalo le tlala, ge o tšhungwa ka mollo; gobane Modimo e a o sekišago ke yo maatla.

⁹ Ge e le dikgoši tšela tša go otswa le wona, tša go ipshina le wona, di tlo o llela tša itshetla ge di bona mokubego o tšhumilwe.

¹⁰ Di tlo o ema kgole di boifa go hlokofatšwa ga wona. Di tlo re: Joo! Joo! Motse o mogolo wa Babele! Motse wo o tiilego! O wetšwe ke kotlo ka nako e tee!

¹¹ Le babapatši ba lefase ba a o llela, ba o hlokofalela ka ge dithoto tša bona di sa hlwe di rekwa ke motho.

¹² Še merwalo ya gauta le ya silifera, le ditalama le dipheta, le mašela a leokodi le a moretele, le a mmala o mohubedu, le diphata tšohle tša monko o bose, le dibjana tšohle tša naka la tlou, le dibja tšohle tša kwata tše bohlokwa, le tša mphiri, le tša tshipi, le tša mabje a go setwa,

¹³ le dinoko, le diorelo, le ditlolo le moti wa dihlare, le sebela, le makhura, le maupi, le mabele, le dikgomo, le dihuswa, le dipitsi, le dikoloi, le mebele ya mathopša, le meoya ya batho.

¹⁴ Le dienywa tša lehlabula tše pelo ya gago e di kganyogago, di go tlogile; le tša maipshino, le tša boitšhepi, di go timeletše. O ka se hlwe o di hwetša.

¹⁵ Babapatši ba dilo tšeo, ba ba bego ba huma ka motse woo, ba tlo o emela kgole ba boifa tlhokofatšo ya wona, ba lla ba itshetla,

¹⁶ Ba re: Joo! Joo! Motse o mogolo wola, wo o bego o apara leokodi la bohlokwa, le purapura le moretele, wo o bego o tšhepha ka gauta, o bego o apara ditalama le dipheta! Mahumo a makaakao a fedišitšwe ka nako e tee!

¹⁷ Basepediši bohle ba maselawatle, le lešaba la baeti ba ona, le ba go a hlankela, le ba go šika le mawatle, ba o emela kgole,

¹⁸ ba hlaboša mantšu ge ba bona muši wa ge o e swa, ba re: Ke ofe motse o kakago motse o mogolo woo!

¹⁹ Ba itšhela pilo dihlogong, ba golola ba lla ba hlokofetše ba re: Joo! Joo! Motse wola o mogolo, wo bohle ba ba nago le maselawatle ba bego ba huma ka wona, o phušotšwe ka nako e tee!

²⁰ Wena legodimo le lena bakgethwa, hlalalang, le lena baapostola le lena baporofeta, hlalalang, gobane Modimo o le ahloletše tshekong ya lena, a lahla motse woo.

²¹ Morongwa e mongwe wa maatla a topa leswika le e kego ke la tšhilo a le lahlela lewatleng, a re: So mokgwa wo motse o mogolo wa Babele o tlogo lahlwa ka wona wa kodumela fase, wa se hlwe o hwetšwa,

²² go se hlwe go kwala lentšu la baopedi le baletši ba diletšo le ba dinaka le ba diphalafala; go se hlwe go hwetšwa makgone wa modiro ofe le ofe; le tšhilo e šilago e ka se hlwe e kowa mo go wena.

²³ Le seetša sa lebone se ka se hlwe se bonega mo go wena; go ka se hlwe go kowa lentšu la monyalwa le la monyadi; gobane babapatši ba gago e be e le bona ba bagolo ba lefase, mme wena wa timetša batho ka malea a gago.

²⁴ Motseng woo ke mo go hweditšwego madi a baporofeta le a bakgethwa e le a mantši, le a bohle ba ba bolailwego mo lefaseng.