Kutollo 15 - BIBELE

Barongwa ba meruswi e šupago

¹ Ka bona mohlolo o mongwe legodimong, mohlolo o mogolo o tlabago, ge go tšwelela barongwa ba šupago ba swere dikotlo tše šupago gobane ke tšona pheletšo ya bogale bja Modimo.

² Ka bona se e kego ke bodiba bjo bo bonatšago boka dikgapetla, go hlakahlakane le mollo. Bodibeng bjoo go be go eme bao ba fentšego sebata le seswantšho sa sona; ba eme ba swere diletšo tša Modimo.

³ Ba opela sefela sa Moshe mohlanka wa Modimo, le sefela sa Kwana, ba re: Ke e megolo, ke e tlabago, mediro ya gago Morena Modimo Ramaatlaohle. Tsela tša gago ke tša go loka, tša go rereša, wena Kgoši ya ditšhaba.

⁴ Wa go se šie wena Morena e ka ba mang? Mokgethwa a nnoši ke wena. Ditšhaba ka moka di tlo tla, tša khunama pela gago; gobane go loka ga gago go bonagetše kahlolong.

⁵ Ka bona pono e nngwe ya go latela yeo. Ka bona Ntlokgethwa ya Kgwerano e bulwa kua legodimong.

⁶ Moo Ntlongkgethwa gwa tšwa barongwa bala ba ba swerego dikotlo tše šupago; ba apere mašela a leokodi le le tagilego, ba itlemile ka meketwana ya gauta e gomago ka dikgopo.

⁷ Se sengwe sa diphedi tšela tše nne sa nea barongwa bao ba šupago meruswi e šupago ya gauta, meruswi ye e tletšego bogale bja Modimo wa go phela go iša mehleng ya neng le neng.

⁸ Ntlokgethwa ya tlala muši o tšwago letagong la Modimo le maatleng a gagwe; gwa se be le e a kgonago go tsena Ntlongkgethwa mehleng yeo go sa phethega dikotlo tše šupago tša barongwa bao ba šupago.