Kutollo 12 - BIBELE

Pono ya Mosadi le Ngwana wa gagwe

¹ Gwa bonala matete a magolo kua legodimong: Mosadi e a aperego letšatši, kgwedi e le bogato bja nao tša gagwe, hlogong ya gagwe a rwele mphapahlogo wa naledi tše lesome la metšo e mebedi.

² E be e le moima, a goa a šokwa, a le tlalelong ya go belega.

³ Gwa bonala matete a mangwe legodimong: Gwa tšwelela noga e kgolo e khubedu, ya dihlogo tše šupago le dinaka tše lesome, e rwele mefapahlogo e šupago dihlogong tša yona.

⁴ Mosela wa yona wa goga karolo ya boraro ya dinaledi tša legodimong, ya di lahlela lefaseng. Noga e kgolo yeo ya tla ya ema pele ga mosadi, gore e tle e je ngwana wa gagwe ge a belege.

⁵ A belega ngwana wa mošimanyana, wa go tlo buša ditšhaba tšohle ka molamo wa tshipi; gomme ngwana wa gagwe a tšewa a rotošetšwa go Modimo sedulong sa gagwe sa bogoši.

⁶ Mosadi a tšhabela lešokeng mo a nago le madulo, a Modimo a mo lokišeditšego ona, gore a babalelwe gona go be go fete matšatši a sekete se nago le makgolo a mabedi le masome a selelago.

⁷ Kua legodimong gwa tsoga ntwa ya ge Mikaele le barongwa ba gagwe ba elwa le noga, mme noga e elwa e na le barongwa ba yona.

⁸ Noga ya se ke ya fenya; kua legodimong gwa se ke gwa hlwa go eba le madulo a yona.

⁹ Noga e kgolo yeo ya rakwa; yona ye ba rego ke Diabolo le Sathane, motimetši wa lefase ka moka la batho. Ya lahlelwa lefaseng; le barongwa ba yona ba lahlwa le yona.

¹⁰ Kua legodimong ka kwa lentšu le legolo le re: Phološo bjale e tšweletše, le maatla, le bogoši bja Modimo wa rena, le go kgona ga Motlotšwa wa gagwe, gobane mmegi wa bana ba borena e a bego a ba bega pele ga Modimo mosegare le bošego, o rakilwe.

¹¹ Mme bona ba mo fentše ka madi a Kwana, le ka lentšu la bohlatse bja bona, ba se rate bophelo bja bona ba ba ba išwa lehung.

¹² Thabang gee, lena magodimo, le ba ba agilego gona. Ba madimabe ke lena ba le agilego lefaseng le lewatleng, gobane diabolo o theogetše go lena a tuka bogale ka kudu; o tseba ge a sa šaletšwe ke lebakanyana fela.

¹³ Nogakgolo ge e bona e lahletšwe lefaseng, ya ya ya tlaiša mosadi eo wa go belega ngwana wa mošimanyana.

¹⁴ Mosadi a newa diphego tša lenong a fofa, a tšhabela lešokeng bodulong bja gagwe, mo a babaletšwego gona gwa fela lebaka, le mabaka, le seripa sa lebaka, a tšhabile moo noga e bego e lebana nae.

¹⁵ Noga ya hlatša meetse a kakago noka, ya a gaša e hlomaretše mosadi eo e re a tšewe ke ona.

¹⁶ Fela, lefase la lwela mosadi eo, la ahlama molomo la metša noka yeo e hlatšitšwego ke noga.

¹⁷ Noga ya galefela mosadi eo, ya ba ya tloga ya yo tsoša ntwa le bao ba bego ba šaletše, e le ba peu ya gagwe, ba ba gomaretšego melao ya Modimo, ba ba nago lebohlatse bja Jesu Kriste.