Jobo 4 - BIBELE

Elifase o re: Modimo o otla mosenyi

¹ Gwa fetola Elifase wa Themana, a re:

² Ge motho a leka lefoko le wena, a o ka se selekege? Fela, go bušetša moya teng go ka kgona mang?

³ Hleng ke wene wa go ruta ba bantši, wa tiiša atla tše di rephilego;

⁴ ba ba wago wa ba thekga ka go bua nabo, wa tiiša ba matolo a go lapa.

⁵ Bjale gomme, ge wena di go wela, o a swaba; ge di swere wene, o a gakanega.

⁶ Naa ga o sa bota borapedi bjago naa? Ga o sa holofela thakga bja ditsela tšago?

⁷ Eleletša hle; o kae molobaasenamolato? Ke kae go kilego gwa fedišwa ba dithakga?

⁸ Tše nna ke di bonego šedi: Balemabošula, babjalabokgopo -- ba buna tšona tšeo.

⁹ Ba loba ka mohemo wa Modimo; ba felela ka ledimo la ge a galefile;

¹⁰ gwa felela le go duma ga ditau, le go rora ga tawana; meno a tautshadi a robega.

¹¹ Tautšhofadi e hwa e hloka bogodi, bana ba tautshadi ba tšitlanywa.

¹² Ge e le nna, ke tletšwe ke taba ya thopa; ya go sebasebja ka e tšea ka ditsebe.

¹³ Ke tša diakanyo tša dipono tša bošego, tša ge batho ba robetše bja matlogadibešong.

¹⁴ Ka tšhoga o mogolo, mme ka thothomela; mašapo a ka ohle a hwa digegerwane;

¹⁵ gwa feta mothomoya, nna ke lebeletše; meriri ya mmele wa ka ya titimologa;

¹⁶ a ema, ke se hlathe sebopego sagwe; ka re e fo ba sebonwa fela, go le “tuu”, -- ka kwa go thwe:

¹⁷ A motho a ka loka pele ga Modimo? A monna e ka ba mosekegi pela Mmopi wagwe?

¹⁸ Hleng le bahlanka ba gagwe o šitwa go ba bota! Le go barongwa ba gagwe o hwetša go le bosodi.

¹⁹ Bjale, ba go ikagela ka seretse? Ba go thea metheo mmung? Bona ba pitleletšwa bokatshwele.

²⁰ Le hlaba ba le gona; le dikela ba thosantšwe; ba senyega go ya go ile, ba sa šetšwe selo.

²¹ Go bjalo; lešika la bona ge le kgaoga go bona, ba hwa ba sešo ba hlalefa.