Jobo 3 - BIBELE

Go lla ga Jobo

¹ Ya ba gona Jobo a thomilego go bolela, a roga letšatši le a tswetšwego ka lona,

² A napa a bolela a re:

³ Ke roga tšatši lela la go tswalwa ga ka, le bošego bjola bja ge go thwe: Re filwe ngwana wa mošimanyana!

⁴ Tšatši lela, a e be la leswiswi; Modimo a a se ke a le šetša godimong; le se hlwe le phadimelwa ke seedi.

⁵ A le bušwe ke leswiswi le thiti ya lehu; a le apešwe ke maru a maso, le boifiše ka phifalo ya mosegare.

⁶ Bošego bjola a bo thopše ke leswiswi, bo se ke bja batagana le matšatši a mengwaga, bo se ke bja tsena ge go balwa a dikgwedi.

⁷ Bošego bjola a e be bja boopa, bo se hlwe bo tlelwa ke mekgolokwane.

⁸ A bo hlolelwe dikotsi ke baloi, bona bao ba go hlohloletša Mamokebe.

⁹ Dinaledi tša moso wa bošego bjola a di time, bo letele seetša mme se hlokwe, bo se ke bja bona dintšhi tša mahuba.

¹⁰ E be ka gobane bo sa ka bja ntswalelela teng, bo sa ka bja utela mahlo a ka ditapišo.

¹¹ Ke go reng ke sa ka ka hwa mola ke belegwa, ka felela ke sa tšwa tswaleng?

¹² Ba diretšeng ge ba mphara difarong, ge ba nkiša matsweleng ba re ke anywe?

¹³ Ke ge bjale nka be ke ithobaletše ke homotše, ke ile le boroko ke khutšitše.

¹⁴ Nka be ke le mo go lego ba magoši le balai ba dinaga, bona baikagedi ba marope.

¹⁵ Goba nka be ke na le bagolo ba bahumi ba gauta, ba ba bego ba tladitše nywako silifera.

¹⁶ Goba nka be ke se gona wa lefolotšana la go fihlwa, wa maseanyana a go se bone seedi.

¹⁷ Gona kua dihlola ga di sa na mašata, go khutša ba ba fedilego maatla.

¹⁸ Gona kua bagolegwa ba dula mmogo ba iketla; lentšu la molaki ga ba le kwe.

¹⁹ Gona kua, banyane le bagolo ba a swana, mohlanka o phonyokgile mong wa gagwe.

²⁰ O direlang ge balapi a ba fa seetša? O reng banyami a ba fa bophelo?

²¹ Baletalehu, bona ga ba le bone, le ge ba le nyaka ba phala baepamahumomautwa.

²² Ke bona ba ka bego ba thaba ba hlalala, ba ipshina ge ba bona lebitla.

²³ Bophelo o reng a bo fa monna wa go timelelwa tsela, yo a thibelwago ke Modimo thoko tšohle?

²⁴ Gobane ke fegelwa ke lebane le bogobe bja ka; ditsetselo tša ka di tšhologa boka meetse.

²⁵ Gobane ke wetšwe ke se ke bego ke se tšhoga; ke fihletšwe ke se ke bego ke se šia.

²⁶ Ga ke role, ga ke lale, ga ke khutše, ka ge go boa mahloko.