Jobo 1 - BIBELE

Borapedi bja Jobo

¹ Go kile gwa ba le motho e mongwe nageng ya Utsi, yo leina la gagwe e bego e le Jobo. E be e le monna e a se nago bosodi, wa go loka le go boifa Modimo, moilabobe.

² O be a belegetšwe barwa ba ba šupago le barwedi ba bararo.

³ O be a ruile dinku tše dikete tše di šupago, le dikamela tše dikete tše tharo, le dipholo tša dijoko tše makgolo a mahlano, a na le bahlanka ba bantšintši. Monna eo e be e le yo mogolo go bohle ba ba bego ba agile thoko yeo ya bohlabela.

⁴ Barwa ba gagwe ba be ba fela ba direlana menyanya mo malapeng a bona ka matšatši a ba ipeetšego ona; ba laletše le dikgaetšedi tša bona tše tharo, gore ba tle ba je ba nwe le bona.

⁵ Gomme ya re ge matšatši a menyanya a fetile, Jobo a fela a iša lentšu go bona a re ba ikgethe; yena a tsoga e sa le bošego, a dira dihlabelo ka go ya ka palo ya bona bohle, gobane o be a re: Mohlomong bana ba ka ba sentše ba fapana le Modimo dipelong tša bona. -- Ke tšona tše Jobo a bego a fela a di dira.

⁶ Ya re ka tšatši le lengwe, ge barwa ba Modimo ba tlile ba ema pele ga Morena, Sathane le yena a tla a le gare ga bona.

⁷ Morena a mo rera a re: O boa kae? Sathane a fetola a re: Ke tšo putlaputla lefase ke itshepelela.

⁸ Morena a mmotšiša a re: Jobo mohlanka wa ka a o mo šeditše? Ka gobane lefaseng ka moka ga go motho e a swanago le yena ka bothakga le go loka, le ka go boifa Modimo, le ka go ila bobe.

⁹ Sathane a fetola a re: A o re Jobo ge a boifa Modimo, o dira fela?

¹⁰ A ga se wene o mo ageleditšego ka legora, yena le ba lapa la gagwe, le tšohle tše e lego tša gagwe thoko tše go fela? Mediro ya diatla tša gagwe o e šegofaditše, diruo tša gagwe tša tlala lefase.

¹¹ Bjale, o ko leke go iša letsogo o kgwathe tšohle tše e lego tša gagwe, o bone ge a tlo go hlala pepeneneng.

¹² Morena a re: Go lokile; tšohle tše a nago natšo di diatleng tša gago; ge e le yena mong o se ke wa mo iša seatla. -- Gomme Sathane a tloga moo pele ga Morena.

¹³ Ya re ka tšatši le lengwe, ge barwa ba Jobo le barwedi ba gagwe ba le dijong ba enwa beine, ba le lapeng la mogolo wa bona,

¹⁴ motseta a fihla go Jobo a re: Dipholo di be di lema; mme dipokolo di be di fula kgauswi;

¹⁵ gwa napa gwa tla ba Seba, ba di thopa, ba bolaya masogana ka marumo. Gomme nna ke phonyokgile ke nnoši gore ke go tsebiše taba yeo.

¹⁶ Yena eo a sa bolela, ke ge go fihla e mongwe, a re: Mollo wa Modimo o wile o etšwa magodimong, wa tšhuma dinku, wa fiša masogana; gomme nna ke phonyokgile ke nnoši gore ke go tsebiše taba yeo.

¹⁷ Yena eo a sa bolela, ke ge go fihla e mongwe, a re: Bakaladea ba tlile e le diphohla tše tharo, ba tšhologela dikamela ba di thopa, ba bolaya masogana ka marumo; gomme nna ke phonyokgile ke nnoši gore ke go tsebiše taba yeo.

¹⁸ Yena eo a sa bolela, ke ge go fihla e mongwe, a re: Barwa ba gago le barwedi ba gago ba be ba le dijong, ba enwa beine lapeng la mogolo wa bona;

¹⁹ ra tšhoga go tsogile ledimo le legolo ka thoko ya lešoka; la šišinya dikhutlo tše nne tša ngwako, wa wela bana bao, ba hwela moo; gomme nna ke phonyokgile ke nnoši gore ke go tsebiše taba yeo.

²⁰ Jobo ya ba gona a tsogago, a gagola diaparo tša gagwe, a kutwa hlogo, a khunama a rapela;

²¹ a re: Mmeleng wa mme ke tšwile ke le fela; ke tlo boela kua ke le fela. Morena o be a neile; Morena o tšere. Leina la Morena a le retwe.

²² Gomme Jobo, le ge dilo tšeo di mo wetše tšohle, ga a ka a senya a tsota Modimo.