Genese 50 - BIBELE

Go bolokwa ga Jakobo. Lehu la Josefa

¹ Mme Josefa a inamela sefahlogo sa tatagwe, a llela moo, a mo atla.

² Gomme Josefa a laela bahlanka ba gagwe ba dingaka gore ba lokiše setoto sa tatagwe. Mme dingaka di lokišitše setoto sa Isiraele.

³ Ba feditše matšatši a masome a mane ba se lokiša, ka gobane matšatši a go lokiša setoto ke a makao. Mme Baegipita ba mo llela ba fetša matšatši a masome a šupago.

⁴ Matšatši ao a go mo llela ge a fetile, Josefa o boletše le banna ba kgoro ya Farao a re: Ge ke hweditše mahlo a lena a ntebeletše ka botho, gona a nke le fihliše kgopelo ya ka go Farao, le re:

⁵ Tate o nkenišitše a re: E re ge ke hwile, o mpoloke lebitleng la ka, le ke ikepetšego lona kua nageng ya Kanana. Bjale a nke ke ye, ke boloke tate, ke tsebo boa.

⁶ Farao a re: Sepela o boloke tatago, o dire se o mo enetšego sona.

⁷ Ke moka Josefa a ya go boloka tatagwe; mme bahlanka ka moka ba Farao, le bagolo ba kgoro ya mošate, le bagolo ba naga ya Egipita ba ya nae.

⁸ Le ba lapa la Josefa, le bana babo, le ba lapa la tatagwe ba ya; nageng ya Gosene gwa šala bana ba bona le dihuswane le dikgomo fela.

⁹ Le ba dikoloi le banamedi ba dipitsi ba sepetše le yena, ya ba makoko a magolo ka kudu.

¹⁰ Ge ba fihla seboeng sa Morokolo mošola wa Jorodane, ba tsoša sello se segologolo. Josefa a direla tatagwe sello sa matšatši a šupago.

¹¹ Bakanana ba ba bego ba agile nageng yeo, ge ba bona sello seo seboeng sa Morokolo, ba re sello se sa Baegipita ke se segolo; mme felo fao ba go reela leina ba re ke Sellong sa Baegipita; ke gona kua mošola wa Jorodane.

¹² Mme barwa ba Jakobo ba dira se tatabo a ba laetšego sona.

¹³ Ba mo rwele ba mo iša nageng ya Kanana, ba mmoloka mphomeng wa tšhemong ya Makapela, wo Aborahama a o rekilego go Efurone Mohethe gotee le tšhemo ya ba felwana ga mabitla, go bataganego le Mamure.

¹⁴ Josefa ge a feditše go boloka tatagwe, o boetše Egipita a na le bana babo le bohle ba ba ilego le yena go boloka tatagwe.

¹⁵ Bana babo Josefa ge ba bona tatabo a hwile, ba re: Bjale ge Josefa a ka re beka a itefetša bobe ka moka bjo re mo dirilego bjona, re tlo reng?

¹⁶ Mme ba laeletša motho a bolela le Josefa a re: Tatago, mola a sešo a hwa, o laetše a re:

¹⁷ Le boleleng le Josefa le re: Hle anke o lebalele bana ba tatago bokgopo bjola le sebe sa bona, gobane ba go dirile tše mpe. Gomme bjalo, a ko re lebalele hle, rena bahlanka ba Modimo wa tatago. Ge ba bolela mantšu a, Josefa o napile a lla.

¹⁸ Bjale ba tla bona ka noši, ba mo lotšha ba re: Ke rena ba! Re bahlanka ba gago.

¹⁹ Josefa a bolela le bona a re: Le se ke la boifa. A nka tsoša taba ye Modimo a e phethilego?

²⁰ Lena mola le rera go ntira bobe, e bile mo Modimo a rerilego go tšweletša tše botse, gore a dire tše tša mehla yeno, a phediše batho ba bantši.

²¹ Bjale le se ke la hlwa le boifa; lena le bana ba lena le tlo babalelwa ke nna. A ba homotša, a bolela tša go ba bea dipelo.

²² Gomme Josefa le ba lapa la tatagwe ba dula nageng ya Egipita. Josefa yena o phetše a fetša nywaga e lekgolo le lesome.

²³ Josefa o bile o bone bana ba Efuraimi le bana ba bona; le barwa ba Magiri morwa wa Manase ba belegwe Josefa a sa le gona.

²⁴ Josefa o boletše le bana babo a re: Nna ke a hwa; fela, Modimo o tlo le hlokomela, a ba a le ntšha nageng ye, a le iša nageng yela ye a e enetšego Aborahama le Isaka le Jakobo.

²⁵ Gomme Josefa a eniša bana ba Isiraele a re: Mohla Modimo a tlogo ba a le hlokometše ka mokgwa wo, le tloge mo le rwele mašapo a ka.

²⁶ Josefa o hwile a le monna wa nywaga e lekgolo le lesome. Ba lokišitše setoto sa gagwe, ba se boloka polokelong gona moo Egipita.