Eksodose 30 - BIBELE

Aletare ya diorelo. Lekgetho. Legopo. Setlolo le diorelo

¹ O dire le aletare ya go thuntšha diorelo; o e dire ka mamati a moduhlare.

² Botelele bja yona e be moelo o tee, le bophara moelo o tee; e be ya dikhutlo tše nne. Boemo e be meelo e mebedi. Dinaka tša yona di gomarelane le yona.

³ O e manege ka gauta e tagilego, sekhurumelo sa yona, le mahlakore a yona, le dinaka tša yona. O e direle morumo ka gauta.

⁴ O e direle mekgoko e mebedi ya gauta e dule ka tlase ga morumo wa yona. O dire bjalo mahlakoreng a mabedi a yona; e be mekgoko ya go lokela diphata tša go e rwala.

⁵ Diphata o betle tša moduhlare, o di manege ka gauta.

⁶ Aletare ye o e bee pele ga lešira le le širago polokelo ya melao, le sekhurumelo sa melao, mo ke tlogo gahlana le wena.

⁷ Mo go yona Arone o tlo thuntšha diorelo tša monko o bose ka mehla e sa le bosasa ge a lokiša mabone.

⁸ Le ka mantšiboa ge a gotetša mabone a thuntšhe diorelo; go thuntšhwe diorelo ka mehla pele ga Morena go iša ditlogolong tša lena.

⁹ Aletareng ye le se ke la thuntšha diorelo tše šele le ge e le sehlabelo, le ge e le sebego; Le se ke la tšholla senwewa mo go yona.

¹⁰ Gatee ka ngwaga Arone a tliše poelanyo dinakeng tša yona. Poelanyo a e dire ka madi a seloba sa poelanyo sa gatee ka ngwaga go iša ditlogolong tša lena. Ke tšona tše kgethwakgethwa tša Morena.

¹¹ Morena o laetše Moshe a re:

¹² Ge o bala Baisiraele, ge o nyaka palo ya bona, gona mang le mang a ntšhetše Morena topollo ya moya wa gagwe mohla ba balwago, gore ba se tlo welwa ke kotlo mohla ba balwago.

¹³ Mang le mang e a kgethelwago go ba ba balwago a ntšhe seripa sa sekele ka sekele ya sekgethwa ye e nago le gera tše masome a mabedi. Seripa sa sekele e be motšhelo wa Morena.

¹⁴ Mang le mang e a kgethelwago go ba ba balwago, e a nago le nywaga e masome a mabedi le e kago feta yeo, a ntšhe motšhelo wa Morena.

¹⁵ Wa mohumi a se ke a fetiša; wa modiitšana a se ke a hlaetša go seripa seo sa sekele. E be go ntšha motšhelo wa Morena, gore meoya ya lena e boelanywe.

¹⁶ Tšhelete ye ya poelanyo o e amogele go Baisiraele, e be ya go ntšhetša mediro ya Ngwakong wa Kgwerano, gore Baisiraele ba gopolwe pele ga Morena, gore meoya ya lena e boelanywe.

¹⁷ Morena o laetše Moshe a re:

¹⁸ Dira le legopo la mphiri, le leoto la lona la mphiri; e be la go hlapela. O le bee mo gare ga Ngwako wa Kgwerano le aletare; O tšhele meetse mo go lona,

¹⁹ gore Arone le barwa ba gagwe ba hlapele diatla le maoto go lona.

²⁰ Ge ba tsena Ngwakong wa Kgwerano ba hlape ka meetse, gore ba se hwe, le ge ba batamela go ntirela aletareng go fiša tša mello ya Morena.

²¹ A ba hlape diatla gore ba se hwe; e be molao wa bona o sa felego, go iša baneng ba bona le ditlogolong tša bona.

²² Morena o laetše Moshe a re:

²³ Bjale wena, tšea dihlare tša monko o bosebose, e lego mira ya sekele tše makgolo a mahlano, le sehlare sa kanele e bose sa sekele tše makgolo a mabedi le masome a mahlano, le sa kalamo e bose sa sekele tše makgolo a mabedi le masome a mahlano.

²⁴ Le sekele tše makgolo a mahlano tša sehlare sa kasia, go ya ka sekele ya sekgethwa. O tšee le moetana o tletšego makhura a mohlware.

²⁵ Ka tšona tše o dire makhura a setlolo se sekgethwa, e be setswako sa ditlolo se se dirwago ka mokgwa wa badiri ba tšona; e be ona makhura a setlolo se sekgethwa.

²⁶ Ngwako wa Kgwerano o o tlotše ka sona, le polokelo ya melao,

²⁷ le sethalana le dibjana tša sona ka moka, le sehlomapone le dibjana tša sona, le aletare ya diorelo,

²⁸ le aletare ya dihlabelo le dibjana tša yona ka moka, le legopo la go hlapela le leoto la lona.

²⁹ O di kgethe, e be tše kgethwakgethwa; bohle ba ba di swarago e be ba bakgethwa.

³⁰ Le Arone le barwa ba gagwe o ba tlotše, o ba kgethe gore e be ba go ntirela.

³¹ Baisiraele o ba botše o re: Ke ona makhura a setlolo sa ka, setlolo sa Morena go iša ditlogolong tša lena.

³² A se ke a tšhelwa mmeleng wa motho; gomme le se ke la dira a a tswakiwago ka mokgwa wa setlolo se; ke se sekgethwa, mme le se dire se sekgethwa.

³³ Mang le mang e a kago dira setlolo ka mokgwa wa se, goba a se fihliša go motho o šele, a a ripiwe mo setšhabeng sa gabo.

³⁴ Morena o laetše Moshe a re: Tšea dihlare tša monko o bose, boroku bja mira, le kgopa ya segelete, le boroku bja helebana, le diorelo tše bose tša lebona, o di tswake di lekane ka tekanyo.

³⁵ O dire seorelo, e be setswako se se dirwago ka mokgwa wa badiri ba tšona; O se noke letswai, e be seorelo sesekegi se sekgethwa.

³⁶ Mo go sona o ntšhe se sengwe o se šile, o se bee mo go bolokwago melao Ngwakong wa Kgwerano, mo ke tlogo gahlana le lena; Le se dire sekgethwakgethwa.

³⁷ Diorelo tše le tlogo itirela tšona, le se ke la itirela se se tswakwago ka mokgwa wa se. Le se dire se se kgethetšwego Morena.

³⁸ Motho e a kago dira se se swanago le sona, a orela, a a kgaolwe setšhabeng sa gabo.