Eksodose 24 - BIBELE

Baperisita ba bagolo ba bona Morena. Moshe o boela thabeng

¹ A bolela le Moshe a re: Rotogela go Morena, wena le Arone, le Nadaba, le Abihu, le ba bagolo ba Isiraele ba masome a šupago, mme le khuname le le kgole.

² Moshe a batamele Morena a nnoši; ba bangwe ba se batamele; le setšhaba se se ke sa rotoga le yena.

³ Moshe a tla a tsebiša setšhaba tšohle tše Morena a di boletšego; setšhaba ka moka sa fetola ka lentšu letee sa re: Tšohle tše Morena a di boletšego re tlo di dira.

⁴ Ka moka tše Morena a di boletšego, Moshe o di ngwadile pukung. Ka la ka moswana a tsoga a aga aletare ka tlase ga thaba, a tsema dikokwane tše lesome le metšo e mebedi tša meloko e lesome le metšo e mebedi ya Isiraele.

⁵ A roma masogana a Baisiraele ba tliša dihlabelo, ba tlišetša Morena didimo tša tebogo tša dipowana.

⁶ Moshe a tšea madi a mangwe, a a tšhela megopong; a mangwe a fokela aletare ka ona.

⁷ A tšea puku ya kgwerano, a e bala setšhaba se theeditše; ba fetola ba re: Ka moka tše Morena a di boletšego re tlo di dira, re tlo fela re laiwa ke tšona.

⁸ Bjale Moshe a tšea madi, a fokela setšhaba ka ona a re: Seao madi a kgwerano ye Morena a e dirilego le lena ka yona melao ye ka moka.

⁹ Ya ba gona Moshe le Arone, le Nadaba le Abihu, le ba masome a šupago a ba bagolo ba Isiraele ba rotogilego.

¹⁰ Ba bona Modimo wa Isiraele; bogato bja maoto a gagwe bo be bo etša lebato la mabje a matala, bo tagile bjalo ka legodimo lé.

¹¹ Gomme ga a ka a ba dira selo, bahlaolwa bao ba Isiraele; ba bone Modimo mme ba ja ba nwa.

¹² Morena a bitša Moshe a re: Rotogela go nna thabeng; o dule ntshe ke go neele diphaphathi tša maswika, le melao le ditaelo, tše ke di ngwadilego gore ba rutwe tšona.

¹³ Moshe a tsoga a na le Joshua mohlanka wa gagwe; Moshe a rotogela thabeng ya Modimo.

¹⁴ Ba bagolo o be a ba boditše a re: Le re letele mo, re be re boele go lena. Arone le Huri šeba, le na nabo; e a nago le taba, a a tle go bona.

¹⁵ Ya re ge Moshe a namela thaba, thaba ya apešwa ke leru.

¹⁶ Letago la Morena la dula mo thabeng ya Sinai; gwa fela matšatši a selelago e apešitšwe ke leru. Ka la go šupa Moshe a bitšwa ke e a bego a le mo lerung.

¹⁷ Letago la Morena, le Baisiraele ba le bonego, le be le etša mollo o tukago mo ntlheng ya thaba.

¹⁸ Gomme Moshe o tsene mo gare ga leru, a namela thaba, a fetša matšatši a masome a mane le mašego a ona a le mo thabeng.