Eksodose 21 - BIBELE

Melao ya bahlanka, ya babolai

¹ Ditaelo tše o tlogo ba anegela tšona šedi:

² Ge o reka molata wa Mohebere, a fetše nywaga e selelago a le mohlanka; ka wa go šupa a tloge a hunologile a sa lefe selo.

³ Ge a tlile a nnoši, a tloge a nnoši; ge a tlile le mosadi, a tloge le mosadi wa gagwe.

⁴ Ge mong wa gagwe a mo file mosadi, mme a mmelegela barwa le barwedi, mosadi eo le bana ba gagwe ke ba mong wa gagwe; yena o tloga a nnoši.

⁵ Ge mohlanka yo a ka bolela a re: Mong wa ka ke a mo rata, le mosadi wa ka le bana ba ka ke a ba rata, ga ke rate go hunologa ka tloga,

⁶ e mobjalo mong wa gagwe a mo lebanye le Modimo, a mo emiše mojakong le ge e le sejakwaneng, mme mong wa gagwe a mo thule tsebe ka tšhwana, mme a be mohlanka wa gagwe wa ka mehla.

⁷ Ge monna a ka rekiša morwedi wa gagwe gore a be molata, gona a se ke a tloga sehlanka.

⁸ Ge a sa kgahle mong wa gagwe e a mmeeleditšego, gona a mo lopolle; ga a na maatla a go mo rekiša setšhabeng se šele, ka gobane a mo hlanogetše.

⁹ Gomme ge a be a mmeeleleditše morwa wa gagwe, gona a mo dire ka mokgwa wa barwedi.

¹⁰ Le ge a ka tšea mosadi e mongwe, a se ke a fokotša dijo tša gagwe, le diaparo tša gagwe, le ditshwanelo tša gagwe.

¹¹ Ge a sa mo dumelele dilo tše tharo tšeo, o tlo tloga fela a sa lefe.

¹² E a itiago motho a hwa, a hwe lehu.

¹³ Ge a sa ka a dira ka boomo, ya ba Modimo e a lesitšego seatla sa gagwe, yena eo ke sa tlogo beela felo mo a kago tšhabela ntshe.

¹⁴ Ge motho a ka tsogela wa gabo, a mmolaya ka sehlogo, yena yoo le aletareng ya ka o mo sware, mme a hwe.

¹⁵ E a itiago tatagwe goba mmagwe, a hwe.

¹⁶ E a utswago motho a mo rekiša, goba a hwetšwa ga gagwe, a hwe lehu.

¹⁷ E a rogago tatagwe goba mmagwe, a hwe lehu.

¹⁸ Ge banna ba elwa mme e mongwe a itia wa gabo ka leswika goba ka letswele, a se ke a mmolaya, a fo mo latša dilaong,

¹⁹ a ba a tsoga a totobela ka ntle ka kotelo, gona e a mo itiilego a se ke a otlwa, a a mo lefe go dula le dikalafo.

²⁰ Ge motho a itia molata wa gagwe wa monna goba wa mosadi ka molamo, a mo hwela diatleng, a lefetšwe.

²¹ Fela moitiwa a ka phela a fetša letšatši le ge e le a mabedi, gona go se ke gwa lefetšwa; ka gobane motho yo ke leruo la gagwe.

²² Ge banna ba elwa, mme ba kgorometša mosadi wa moima a senyegelwa, mme gwa se tšwelele bohloko bjo bongwe, gona a go lefišwe ka mo monna wa mosadi eo a tlogo lefiša ka gona; go lefše baahlodi ba le gona.

²³ Fela ge go ka tšwelela bohloko bjo bongwe, gona bophelo bo lefše ka bophelo,

²⁴ leihlo le lefše ka leihlo, leino le lefše ka leino, seatla se lefše ka seatla, leoto le lefše ka leoto,

²⁵ lebadi le lefše ka lebadi, ntho e lefše ka ntho, mogogoma o lefše ka mogogoma.

²⁶ Ge monna a ka itia leihlo la molata wa gagwe wa monna goba wa mosadi, a le senya, a mo lopolle a mo fe tsela ka baka la leihlo la gagwe.

²⁷ Ge a ka itia molata wa gagwe wa monna goba wa mosadi a mo kgola leino, a mo lopolle a mo fe tsela ka baka la leino la gagwe.

²⁸ Ge kgomo e ka hlaba monna goba mosadi, a hwa, gona kgomo yeo a e thungwe ka maswika; nama ya yona e se ke ya lewa. Ge e le mong wa kgomo yeo, yena ga a na molato.

²⁹ Fela, ge e le kgomo e hlabago la bomaabane le bomaloba, mong wa yona a ba a tsebišitšwe mme a se e sote, ge yona e ka bolaya monna goba mosadi, gona kgomo yeo a e thungwe ka maswika, gomme le mong wa yona a bolawe.

³⁰ Ge a ka lefišwa, gona a lopolle bophelo bja gagwe ka tše a tlogo lefišwa ka tšona.

³¹ Ge e ka hlaba mošimanyana le ge e le ngwananyana, go ahlolwe ka mokgwa woo.

³² Ge kgomo e ka hlaba molata wa monna goba wa mosadi, gona mong wa yona a ntšhetše mong wa molata eo disekele tše masome a mararo; kgomo yona e thungwe ka maswika.

³³ Ge motho a ka khurumola molete, le ge a ka ba a epile molete a lesa go o khurumela, mme kgomo goba pokolo ya wela moleteng woo,

³⁴ mong wa molete a lefe seruiwa ka tšhelete, setoto e ba sa gagwe.

³⁵ Ge kgomo ya motho e ka hlaba kgomo ya wa gabo, ya hwa, gona a ba rekiše kgomo yeo e phelago, ba arolelane tšhelete ya yona, ba arolelane le setoto.

³⁶ Fela, ge kgomo yeo e be e tsebja la bomaabane le la bomaloba gobane e a hlaba, mong wa yona a se e lote, gona a a lefe kgomo yeo ka kgomo e nngwe, gomme setoto e be sa gagwe.

³⁷ Ge motho a ka utswa kgomo le ge e le nku, a hlaba goba a rekiša, gona a lefe kgomo ka kgomo tše tlhano, nku a e lefe ka dihuswane tše nne.