Eksodose 20 - BIBELE

Melao ya Modimo

¹ Mantšu a a boletšwego ke Morena ka moka šea; o itše:

² Ke nna Morena Modimo wa gago. Ke nna ke go ntšhitšego nageng ya Egipita ngwakong wa bohlanka.

³ Ke se ke ka bona o na le medimo e šele.

⁴ O se ke wa itirela modimo wa go betlwa, le ge e le seswantšho se sengwe sa tše di lego kua legodimong, le ge e le sa tše di lego mono lefaseng, le sa tše di lego meetseng ka tlase ga lefase.

⁵ O se ke wa di khunamela; o se ke wa di direla; ka gobane nna Morena Modimo wa gago ke Modimo yo bogale, e a latago bokgopo bja botatagobana go bana ba bona go fihla molokong wa boraro le wa bone mo go ba ba ntlhoilego.

⁶ Gomme ge e le ba ba nthatago, ba ba hlokomelago melao ya ka ke ba dira ka botho go iša melokong e sekete.

⁷ O se ke wa bolela leina la Morena Modimo wa gago ka lefela; ka gobane e a bolelago leina la gagwe ka lefela Morena a ka se ke a mo lesa a sa otlwe.

⁸ Gopola letšatši la go khutša, o le kgethe.

⁹ O sware mediro ka matšatši a a selelago, o phethe mešomo ya gago ka moka.

¹⁰ Ge e le letšatši la go šupa ke la go khutša, ke la Morena Modimo wa gago. Ka lona o se ke wa swara modiro le o tee, le ge e le wena, le morwa wa gago, le morwedi wa gago, le molata wa gago wa monna le wa mosadi, le seruiwa sa gago, le modiiledi e a lego dikgorong tša geno.

¹¹ Ka gobane Morena, legodimo le lefase le lewatle, le tšohle tše di lego gona, o di dirile ka matšatši a selelago, mme a khutša ka tšatši la go šupa. Ke ka baka leo Morena a le šegofaditšego, a le dira le lekgethwa.

¹² Godiša tatago le mmago, gore o phele galelele nageng ye Morena Modimo wa gago a go fago yona.

¹³ O se ke wa bolaya.

¹⁴ O se ke wa otswa.

¹⁵ O se ke wa utswa.

¹⁶ O se ke wa bolela bohlatse bja maaka go wa geno.

¹⁷ O se ke wa duma ntlo ya wa geno. O se ke wa duma mosadi wa wa geno, le molata wa gagwe wa monna le wa mosadi, le kgomo ya gagwe, le pokolo ya gagwe, le tšohle tše e lego tša wa geno.

¹⁸ Gomme setšhaba ka moka se be se lebane le medumo yeo, le magadima, le moletšo wa naka, le thaba e thuntšhago muši; ge se bona tšeo sa roromela sa ema kgole.

¹⁹ Sa kgopela Moshe sa re: Wa go bolela le rena a e be wena, mme re tlo kwa; a Modimo a se ke a bolela le rena, gore re se hwe.

²⁰ Moshe a bolela le setšhaba a re: Le se ke la boifa. Modimo o tlile gore a le leke, gore le bone go boifiša ga gagwe, mme le ile sebe.

²¹ Gomme setšhaba sa ema kgole; Moshe yena a batamela leswiswi leo Modimo a bego a le mo go lona.

²² Gomme Morena a laela Moshe a re: Bolela le Baisiraele o re: Le di bone ge ke bolela le lena ke le legodimong.

²³ Le se ke la itirela medimo hleng gaka; Le se ke la itirela medimo ya silifera, le medimo ya gauta.

²⁴ Nna o ntirele aletare ka mmu; mo go yona o ntlišetše dihlabelo tša gago, le ditebogo tša gago, le dihuswane tša gago, le dikgomo tša gago. Felo mo ke tlogo kwa leina la ka le bolelwa gona, e ka ba kae le kae, ke tlo tla ka go šegofatša.

²⁵ Ge o ntirela aletare ka maswika, o se ke wa e aga ka maswika a a betliwego. Ge o ka akga themo ya gago mo go yona, o e gobošitše.

²⁶ Le gona aletareng ya ka o se ke wa namela ka manamelo, gore aparo tša gago di se phaege pele ga yona.