Eksodose 19 - BIBELE

Ba fihla thabeng ya Sinai

¹ Ka kgwedi ya boraro ya leeto Baisiraele ba tsene lešokeng la Sinai; ba fihlile ka lona letšatši le ba faletšego Egipita ka lona.

² Batlile lešokeng la Sinai ba etšwa Rafidima. Gona moo Baisiraele ba bokana lešokeng, ba hloma mešaša mo ba lebanego le thaba.

³ Mošhe a namela a ya go Modimo; Morena a mmitša a le thabeng a re: Bolela le ba leloko la Jakobo, o botše Baisiraele o re:

⁴ Le di bone ka noši tše ke di dirilego Baegipita; mme lena ka le kuka ka phego tša nong, ka le tliša go nna.

⁵ Gomme bjale, ge le tlo theetša ruri se ke se bolelago, la hlokomela kgwerano ya ka, ke mo le tlogo ba baruiwa ba ka mo ditšhabeng ka moka; ka gobane lefase ka moka ke la ka.

⁶ Gomme lena le tlo ba setšhaba sa ka sa bomphamodimo, setšhaba se sekgethwa. Ke ona mantšu a o tlogo botša Baisiraele.

⁷ Moshe a tla a bitša ba bagolo ba setšhaba, a ba anegela mantšu ao ka moka a Morena a mo laetšego ona.

⁸ Setšhaba ka moka sa dumela gammogo, sa re: Tšohle tše Morena a di boletšego re tlo di dira. Phetolo yeo ya setšhaba Moshe a e fihliša go Morena.

⁹ Morena a botša Moshe a re: Ge e le nna ke tlo tla go wena ke le lerung le leso, gore setšhaba se kwe ge ke bolela le wena; ke mo se tlogo go dumela ka mehla. Mme Moshe a tsebiša setšhaba tše Modimo a di boletšego.

¹⁰ Bjale Morena a bolela le Moshe a re: Yaa go setšhaba o re: Ba ikgethe lehono le bosasa, ba hlatswe diaparo tša bona.

¹¹ Gomme ka la moso ba be ba itokišitše; ka gobane ka la moso setšhaba ka moka se tlo bona ge Morena a fologela thabeng ya Sinai.

¹² Bjale beela setšhaba mollwane thoko tšohle tša yona, o se botše o re: le itote gore le se namele thaba ye, le se gate mo e fihlago. Mang le mang e a kago gata thaba ye o tlo hwa lehu.

¹³ A a se ke a swarwa ka seatla; a a thungwe ka maswika, goba a betšwe ka lerumo; ga go se se kago leswa sa phela, le ge e le motho, le ge e le seruiwa. Thaba ye ba tlo e namela ge go tlo kwala phalafala.

¹⁴ Gomme Moshe a fologa thabeng a tla go setšhaba a se laela sa ikgetha sa hlatswa diaparo;

¹⁵ a botša setšhaba a re: Le fele le itokišetše la ka moso; se batameleng mosadi.

¹⁶ Ka tšatši la boraro ge go esa gwa ba le medumo, le magadima, le leru le lesoleso mo thabeng; gwa kwala moletšo o mogolo ka maatla wa naka. Setšhaba ka moka sa roromela se le mo mešašeng.

¹⁷ Gomme Moshe a ntšha setšhaba mo mešašeng a se iša sa yo lebana le Modimo, sa ema tlase ga thaba.

¹⁸ Gomme thaba ka moka ya Sinai e be e thuntšha muši, ka gobane Morena o be a fologetše go yona ka mollo; gomme muši wa yona o be o hlatloga bjalo ka mokubelo; thaba ka moka ya šišinyega gagolo.

¹⁹ Moletšo wa naka wa fela o gola o eya; mme go be go bolela Moshe, Modimo a fetola ka lentšu le legolo.

²⁰ Morena o be a fologetše thabeng ya Sinai, mo ntlheng ya thaba. A bitša Moshe gore a tle ntlheng ya thaba; mme Moshe a namela.

²¹ Morena a mmotša a re: Fologa o laele setšhaba, gore se se ke sa šwahlela go Morena go bona, gore se se tlo fela ka bontši.

²² Le baperisita ba ba batamelago Morena, ba ikgethe, gore Morena a se tlo ba galefela.

²³ Moshe a fetola a re: Setšhaba se ka se ke sa kgona go namela thaba ya Sinai, ka gobane o re laetše wa re re beele thaba mollwane, e be e kgethwa.

²⁴ Morena a re: Napa o fologe, o kgone go rotoga o na le Arone. Ge e le baperisita le ba setšhaba ba se ke ba šwahla ba re re namele re ye go Morena, gore Morena a sa tlo ba galefela.

²⁵ Gomme Moshe a fologa a tla go setšhaba, a ba botša.