Eksodose 14 - BIBELE

Ba sela Lewatle; Baegipita ba hwela moo

¹ Gomme Morena a laela Moshe a re:

² Botša Baisiraele o re: Ba fapoge tsela; ba bakane ba fetile Pihagirothe, mo gare ga Migidolo le lewatle, ba lebane le Balatsefone le bokane lebotong la lewatle.

³ Ke mo Farao a tlogo re: Baisiraele ba timetše nageng; lešoka le ba thibetše.

⁴ Mme nna ke tlo thatafatša pelo ya gagwe, a ba hlomarela. E tlo ba mo nna ke tlogo ithetiša ka tše ke tlogo di dira Farao le dira tša gagwe ka moka. Ke mo Baegipita ba tlogo lemoga ge Morena e le nna. Gomme Baisiraele ba dira bjalo.

⁵ Ge kgoši ya Egipita e botšwa gore setšhaba se faletše, pelo ya Farao ya hlanoga, le dipelo tša bahlanka ba gagwe tša hlanogela setšhaba, ba re: Re dirileng ge re lesa Baisiraele ba sepela, ba tlogela mediro ya rena?

⁶ Mme Farao a bofa dikoloi tša gagwe, a rapa setšhaba sa gagwe.

⁷ A ntšha dikoloi tše di hlaotšwego tše makgolo a selelago, le dikoloi ka moka tša Egipita; ka moka tša namelwa ke bagale.

⁸ A dira bjalo ka gobane Morena o be a thatafaditše pelo ya gagwe, gore a hlomarele Isiraele. Mme Baisiraele ba be ba tšwile ka kgang.

⁹ Baegipita ba ba hlomarela ka dipitsi le ka dikoloi tša Farao, di na le banamedi ba tšona, dira ka moka tša Farao. Ba ba hwetša ba sa bokana lewatleng, ba fihlile Pihagirothe, ba lebane le Balatsefone.

¹⁰ Farao a batamela. Baisiraele ge ba lebelela ba bona Baegipita ba le morago. Gomme Baisiraele ba tsenwa ke poifo e kgolo, ba goa ba bitša Morena;

¹¹ ba bolela le Moshe ba re: Naa kua Egipita go be go se mabitla naa, ge o re khudušeditše go hwela mo gare ga naga? Dilo tše o di dirile ka baka lang wa re ntšha Egipita?

¹² Naa ga se tšona tše re go boditšego tšona re sa le Egipita ra re: Re lese re hlankele Baegipita? Ka gobane, go hwela lešokeng, aowaa! Go ka be go le kaone re le bahlanka ba Baegipita.

¹³ Moshe a fetola a botša setšhaba a re: Le se boife! Emang! Lehono ke mo le tlogo bona phološo ye Morena a tlogo le direla lehono, ka gobane Baegipita ba le ba bonago lehono, le ka se ke la hlwa le ba bona gape neng le neng.

¹⁴ Morena o tlo le hlabanela, lena le ikhomoletše.

¹⁵ Gomme Morena a bolela le Moshe a re: O reng o ntlhabela mokgoši? Botša Baisiraele o re ba wele tsela.

¹⁶ Mme wena o emiše lepara la gago, ka letsogo o šupe lewatle, o le fatole, gore Baisiraele ba tšwe ka gare ga lewatle ka mo go omilego.

¹⁷ Tše nna ke tlogo di dira šedi: Ke tlo thatafatša dipelo tša Baegipita, ba le latela; gomme ke tlo ithetiša ka tše ke tlogo di dira Farao le dira tša gagwe ka moka, le dikoloi tša gagwe ka moka, le banamedi ba gagwe.

¹⁸ Ke mo Baegipita ba tlogo lemoga ge Morena e le nna ge ke ithetiša ka tše ke tlogo di dira Farao, le dikoloi tša gagwe, le banamedi ba gagwe.

¹⁹ Gomme Morongwa wa Modimo wa go eta makoko a Isiraele pele, a tsoga a ya a ema ka morago ga bona; le leru lela la thololo la tsoga la ya la ema ka morago ga bona;

²⁰ la tsena ka gare ga madira a Baegipita le madira a Baisiraele. Ba ka kua ba le bona e le leru le leswiswi; ba ka mono ba le bona le bonega bošego; ba šitwa go batamelana bošego ka moka.

²¹ Gomme Moshe a emiša letsogo la gagwe a šupa lewatle. Morena a šuthiša lewatle ka phefo e maatla ya Bohlabela bošego ka moka; lewatle ya ba mmu o omilego, meetse a kgaogana.

²² Ke mo Baisiraele ba tsenego ka gare ga lewatle, ba gata mo go omilego; ba hwetša meetse ka thoko ya le letona le ka thoko ya le letshadi a eme bjalo ka merako.

²³ Baegipita ba latela, ba ba šala morago ka dipitsi tša Farao ka moka, le dikoloi tša gagwe, le banamedi ba gagwe; ba tsena mo gare ga mawatle.

²⁴ Ka mahuba a meso Morena, a le mollong wa thololo le lerung, a bona dira tša Baegipita mme a di raranya.

²⁵ A thedimoša maotwana a dikoloi, a di sepediša ka bothata; Baegipita ba ba ba re: A re tšhabeng Baisiraele, ka gobane ba hlabanelwa ke Morena; o lwa le Baegipita.

²⁶ Ke mo Morena a boditšego Moshe a re: Emiša letsogo la gago o šupe lewatle, gore meetse a boele godimo ga Baegipita le dikoloi tša bona le banamedi ba bona.

²⁷ Moshe a emiša letsogo la gagwe a šupa lewatle. Lewatle la boela bodulong bja lona ka matlagosa. Baegipita ge ba tšhaba ba gahlana nalo; Morena a ba goromeletša lewatleng.

²⁸ Meetse a boa, mme a tšea dikoloi le banamedi, dira ka moka tša Farao tše di bego di ba šetše morago tša tsena lewatleng; gwa se ke gwa šala le o tee wa bona.

²⁹ Ge e le Baisiraele ba be ba sepetše mo go omilego mo gare ga mawatle, ba hwetša ka thoko ya le letona le ka thoko ya le letshadi meetse a le bjalo ka merako.

³⁰ Ke lona tšatši le Morena a namoletšego Baisiraele diatleng tša Baegipita; gomme Baisiraele ba bona ditoto tša Baegipita lešing la lewatle.

³¹ Ke mo Baisiraele ba bonego tše seatla se segolo sa Modimo se di dirilego Baegipita; gomme setšhaba sa boifa Morena, sa dumela Morena le Moshe mohlanka wa gagwe.