Ditiro 3 - BIBELE

Petro le Johane ba fodiša segole

¹ Petro le Johane ba kile ba rotogela Ntlongkgethwa, e le nako ya senyane, ya thapelo.

² Gomme go be go na le monna e a belegwego e le segole, yo ba bego ba mo rwala ba mmea mojako wa Ntlokgethwa, wo ba rego ke mojako o botse, gore a lope dineo tša kgaugelo go ba ba tsenago Ntlongkgethwa.

³ Yena eo a re go bona Petro le Johane ge ba tsena Ntlongkgethwa, a ba kgopela neo.

⁴ Petro a mo iša mahlo, a bolela a re: Re gadime!

⁵ Motho eo a ba lebelela a holofetše gore ba tlo mo nea selo.

⁶ Petro a re: Silifera le gauta ga ke na natšo. Se ke nago le sona ke a go nea: Ka leina la Jesu Kriste wa Natsaretha tsoga o sepele!

⁷ A mo swara ka seatla se setona, a mo emiša; mme maoto a gagwe le dikokoilane tša gagwe tša napa tša tia,

⁸ a nanoga a ema, a sepela, a tsena Ntlongkgethwa le bona, a tšama a sela, a reta Modimo.

⁹ Batho ka moka ba mmona a sepela a reta Modimo.

¹⁰ Le gona ba be ba mo tseba ge e le yena a bego a duletše dineo mojakong o botse, wa Ntlokgethwa; ba golelwa ke go tšhoga le go tlabega ka tše di diregetšego motho eo.

¹¹ Bjale, ka gobane segole seo se fodišitšwego se gomarela Petro le Johane, batho ka moka ba tla go bona, ba kgobokana mo mathuding a ba rego ke mathudi a Salomo, ba tla ba tlabegile ruri.

¹² Petro ge a di bona, a bolela le batho bao a re: Lena banna ba Isiraele, le kgotsetšang taba ye? Le reng le lebelela rena, eke go dirile rena ka maatla a rena, goba ka borapedi bja rena ge motho e a sepela?

¹³ Modimo wa Aborahama le Isaka le Jakobo, yena Modimo wa botatawešo, o neile Jesu mohlanka wa gagwe letago, yena eo le mo gafetšego Pilato, la mo lahla pele ga gagwe, mola Pilato a ahlola a re a a lokollwe.

¹⁴ Le lahlile yena Mothomokgethwa Moloki, la kgopela go setšwa ka senokwane sela,

¹⁵ la bolaya yena mong wa bophelo. Yena eo Modimo o mo tsošitše bahung; mme rena re dihlatse tša taba yeo.

¹⁶ Gomme motho yo le mmonago le mo tseba, ke leina la Jesu le mo tiišitšego ka tumelo. Ke tumelo ka lona leina la gagwe e mo neilego go fola sa ruri, ka mo le di bonego bohle.

¹⁷ Gomme bjale, bana bešo! Ke tseba gore tše le di dirilego, le di dirišitšwe ke go se tsebe, le bagolo ba lena le bona.

¹⁸ Modimo yena a phetha ka mokgwa woo tše a bego a di boletše pele ka melomo ya baporofeta ba gagwe bohle, a re: Kriste o tlo tlaišega.

¹⁹ Ke gona itsholeng gee, le sokologe, gore le phumolwe dibe tša lena.

²⁰ Gore go tle mabaka a tapologo e tšwago go Morena, ge a tlo roma Jesu Kriste, yo a mmeetšego bolena.

²¹ Gomme yena, legodimo le swanetše go ba le mo gorošitše, go be go tle mabaka a go tsoša tšohle, a Modimo a a boletšego ka melomo ya baporofeta ba bakgethwa ba gagwe bohle.

²² Gobane Moše o boletše le botatawešo, a re: Morena Modimo wa lena o tlo le tsošetša Moporofeta e a swanago le nna e a tšwago mo gare ga lena le go bana beno; yena eo le mo theetšeng ditabeng ka moka tše a tlogo le botša tšona.

²³ Gomme motho e a sa kwego Moporofeta eo, o tlo kgaolwa setšhabeng.

²⁴ Baporofeta bohle, go tla ka Samuele, le ba ba mo hlatlamilego ba bolela, ba šupile tša ona matšatši a.

²⁵ Mme lena le bana ba baporofeta bao, le ba kgwerano ye Modimo a e tlemilego le botatawešo ge a bolela le Aborahama, a re: Meloko ka moka ya lefase e tlo šegofatšwa ka peu ya gago.

²⁶ Bjale ge Modimo a tsošitše ngwana wa gagwe, o diretše bolena; o thomile ka bolena, a mo roma gore a le šegofatše, gore a sokolle bohle, mang le mang a fularele bokgopo bja gagwe.