Ditiro 28 - BIBELE

Tša Melite. Paulo o fihla Roma

¹ Ge re šetše re phologile, ya ba gona re kwago ge ba re sehlakehlake seo ke sa Melite.

² Batho ba gona, ba mohuta o šele, ba re dira ka botho bjo bo fetišago; ba re kgitleletše mollo o mogolo, ba re iša malapeng a bona, gobane go be go ena pula go le maruru.

³ Paulo ge a re ke ola mathokgwa, gore a a akgele mollong, noga ya tšwa ka go kwa mollo, ya mo loma seatla ya gomarela.

⁴ Batho ba gona, ge ba bona selo seo se lekeletše seatleng sa gagwe, ba bolela seng sa bona ba re: Motho e, se a lego sona, ke mmolai; ge a sa tšo phologa lewatleng, bogale bja medimo bo se mo gomele.

⁵ Paulo, noga yeo a e hlohlorela mollong, a se ne bohloko bjo a bo kwago.

⁶ Bona ba be ba lebeletše, gore o tlo tloga a ruruga a wela fase a hwa. Bjale, e šetše e le lebaka ba mo lebeletše, ba bona go se bošula bjo bo mo tlelago, ba phekgoga ba re ke modimo.

⁷ Kgauswi le felo fao go be go le mašemo a mokgoma wa sehlakehlake seo; leina la gagwe e be e le Pubulio. Yena a re dira baeng ba gagwe matšatši a mararo.

⁸ Ra hwetša tatago Pubulio a le dilaong a babja ke letadi le teng e khubedu. Paulo a ya go yena, a rapela a mmea diatla, a mo fodiša.

⁹ Gwa napa gwa tla le ba bangwe ba sehlakehlake seo; ba tla ba swerwe ke malwetši; Paulo a ba fodiša.

¹⁰ Ba tloga ba re godiša ka mekgwa e mentši. Mohla re sepelago ba re thothela mefago.

¹¹ Ge go fetile dikgwedi tše tharo, ra namela leselawatle la Alesandria, le le bego le dutše marega sehlakehlakeng seo. Sefoka sa lona e be e le Barwa ba Jupitere.

¹² Ra tla motseng wa Sirakusa; ra dula matšatši a mararo.

¹³ Ra tloga moo ra šika le naga, ra tla motseng wa Regio. Ka la ka moswana gwa tsoga phefo ya borwa, ra sepela matšatši a mabedi ra fihla Puteoli.

¹⁴ Moo ra hwetša badumedi; ba re kgopela ra dula le bona matšatši a šupago; ya ba gona re yago Roma.

¹⁵ Badumedi ba gona ge ba re kwa, ba tšwa ba re gahlanetša re sa tla Apiforo le Teretaberene. Paulo ge a ba bona, a leboga Modimo a tia kholofelo.

¹⁶ Ge re fihlile Roma, tona ya iša bagolegwa go molaodi e mogolo wa madira. Ge e le Paulo a dumelelwa go dula ga gagwe, a na le mohlapetši wa gagwe wa mohlabani.

¹⁷ Ge go fetile matšatši a mararo, Paulo a bitša bagolo ba Bajuda. Ba phuthega, a bolela le bona a re: Banna ba gešo! Ga ke na mo ke senyetšego setšhaba sa gešo le Molao wa botatawešo; le ge go le bjalo ke tšwa Jerusalema ke le mogolegwa ke gafetšwe matsogong a Baroma.

¹⁸ Bona ba ntshekišitše, ba rata go nkhunolla ka gore ga ke na molato o swanelago polao.

¹⁹ Bajuda ba ganetša; ya ba go nkgapeletša go re: Nna ke sekišwa ke Kesara, e se go re ke na le taba ya go bega setšhaba sa gešo.

²⁰ Taba ke yona yeo ye ke le biditšego ka baka la yona, gore ke le bone, ke bolele le lena; ka gobane se se mpofišitšego ke yona kholofelo ya Isiraele.

²¹ Bona ba fetola ba re: Rena ga re ešo ra amogela mangwalo a tšwago Juda a go bolela tša gago; le gona ga go ešo gwa tla e mongwe wa ba gešo a re tsebiša, a go bolela ka taba e mpe.

²² Go rata gore re kwe se wena o se bolelago; gobane thuto yeo re tseba gore e ganetšwa mo go fela.

²³ Ba mmeela letšatši; ba tla ntlong ya baeng e le ba bantšinyana. Paulo a bea bohlatse, a ba hlathollela tša mmušo wa Modimo, a rata go ba kgodiša ka ditaba tša Jesu, a di ntšha Molaong wa Moshe le go Baporofeta; a thoma e sa le bosasa, la ba le dikela.

²⁴ Ba bangwe ba bona ba dumela tše a di boletšego; ba bangwe ba se dumele.

²⁵ Ge ba šetše ba tšere kgang seng sa bona, ba tloga Paulo a ba boditše a re: Moyamokgethwa o boletše ka Jesaya moporofeta a era botatawešo a re:

²⁶ Sepela, o bolele le setšhaba se, o re: Go kwa le tlo kwa, mme le ka se hlaologanye; go bona le tlo bona, mme le ka se lemoge.

²⁷ Gobane pelo tša setšhaba se di retetše; tsebe tša bona di thibetše; ba pontše mahlo gore ba se bone ka mahlo a bona, ba se kwe ka ditsebe, ba se hlaologanye ka dipelo, ba se sokologe; mme nna ke sa ba fodiše.

²⁸ Tsebang gee, gobane taba ye ya go phološwa ke Modimo e rometšwe bantle. Bona ba tlo kwa.

²⁹ Ge a itšalo, Bajuda ba tloga ba na le kgang e kgolo seng sa bona.

³⁰ Paulo a fetša nywaga e mebedi a dutše ngwakong wa gagwe wo a o adimilego, a amogela bohle ba ba tlago go yena.

³¹ A kwatša tša mmušo wa Modimo, a ruta tša Morena Jesu Kriste ka mafolofolo a magolo, a sa iletšwe ke motho.