Ditiro 18 - BIBELE

Paulo o tla Korinthe le Efeso. Tša Apollo

¹ Ka moso Paulo a tloga Athene a ya Korinthe.

² Motseng woo a hwetša Mojuda yo leina la gagwe e lego Akwila, e a tswaletšwego nageng ya Ponto, a sa tšo boa Italia, a na le Perisila mosadi wa gagwe. Ka gobane Kesara Kelaudio o be a ntšhitše molao wa go re Bajuda ka moka ba tloge Roma.

³ Ke bona Paulo a tlilego go bona, a dula ga gabo a ba diriša; ka gobane e be le balogi ba magogwa; mme Paulo modiro woo o be a o kgona.

⁴ Ka disabatha o be a ruta diphuthegong, a kgodiša Bajuda le Bagerika.

⁵ Ge Silase le Timotheo ba fihla ba etšwa Matsedonia, ke ge Paulo a fišegetšwe go hlatsela Bajuda a re Jesu ke yena Kriste.

⁶ Bajuda ba ganyetša, ba rogaka. Paulo a ba a hlohlora diaparo tša gagwe, a bolela a re: Madi a lena a a boele dihlogong tša lena; nna ke tloga ke se na molato. Ke ya go bantle.

⁷ A tloga fao a yo dula ngwakong wa monna e mongwe leina la gagwe e lego Justo, e a boifago Modimo, eo ngwako wa gagwe o bataganego le wa phuthego ya Bajuda.

⁸ Krispo mogolo wa phuthego yeo a dumela Morena, le ba lapa la gabo ka moka. Bakorinthe ba bantši ba ba kwelego lentšu ba dumela ba kolobetšwa.

⁹ Morena a bolela le Paulo ponong a re: Se boife; o fele o bolela; o se homole,

¹⁰ gobane ke na le wena. Ga go e a kago go iša letsogo a go dira bošula; gobane ke na le lešaba le lentši motseng wo.

¹¹ Paulo a fela a sa dula gona a fetša ngwaga le dikgwedi tše di selelago; a ruta lentšu la Modimo a le moo gare ga bona.

¹² Mehleng yeo go buša Gallio nageng ya Akaya, Bajuda ba tsogela Paulo maatla; ba lakana ba mo iša kgorong.

¹³ Ba tla ba re: Monna e o ruta go direla Modimo ka mokgwa o ganwago ke molao.

¹⁴ Paulo a sa re ke a bolela, Gallio a fetola a re: Lena Bajuda, ge e ka be e le bošaedi le ge e le bohwirihwiri bjo bobe, gona nka be ke le emela ka molao.

¹⁵ Fela, ka ge e le phapang ya dithuto, le ya maina, le ya molao wa lena, go tlo bona lena. Nna ga ke rate go ba moahlodi wa ditaba tšeo.

¹⁶ A ba raka mo kgorong.

¹⁷ Ke mo Bagerika ka moka ba swerego Sostene mogolo wa phuthego ya Bajuda ba mo itia gona moo kgorong; Gallio a se ba iletše.

¹⁸ Paulo ge a feditše lebaka leo a dutše moo, a laelana le bana babo ba tumelo, a leba go selela Siria, a tloga a na le Perisila le Akwila. Ba le motseng wa Kenkerea a ikota hlogo, gobane o be a itlemile ka keno.

¹⁹ A fihla Efeso. Moo a šadiša boAkwila. Yena a ya phuthegong a bolela le Bajuda.

²⁰ Ba mo kgopela ba re a dule le bona lebakanyana; yena a se dumele.

²¹ A laelana le bona a re: Ka monyanya o tlago nka se kgone go hlokega kua Jerusalema. Ge Modimo a rata, ke tlo buša ke etla go lena. A tloga moo Efeso ka leselawatle.

²² Ge a fihlile Kesarea, a rotogela Jerusalema, a dumediša phuthego; a tsebo fologela Antiokia.

²³ Ge go fetile lebaka a le moo, a tšwa a phatša naga ya Galatia le ya Firigia, a tšama a tiiša barutiwa bohle.

²⁴ Motseng wa Efeso gwa tla monna e mongwe wa Mojuda. Leina la gagwe e be e le Apollo, e a tswaletšwego Alesandria. E be e le monna wa seboledi, yo maatla mangwalong.

²⁵ O be a rutilwe thuto ya Morena a ruta batho ditaba tša Jesu ka go fišega pelong le ka tlhaologanyo. Gomme o be a tseba kolobetšo ya Johane fela.

²⁶ A tla phuthegong a thoma go ruta ka mafolofolo. Akwila le Perisila ge ba mo kwa, ba mmiletša gagabo, ba mo hlathollela thuto ya Modimo gabotse.

²⁷ Mohla Apollo a rego ke fetela Akaya, bana babo ba tumelo ba mo tutuetša, ba ngwalela barutiwa ba gona, ba ba kgopela gore ba mo amogele. Apollo a fihla gona kua, mme ba ba dumetšego a ba tšweletša pele gagolo ka neo ya gagwe.

²⁸ A phegelela go kgodiša Bajuda ka go šupetša ka mangwalo gore Jesu ke yena Kriste.