Baefeso 2 - BIBELE

Bajuda le bantle ba phela ka Kriste; ba ba Ntlokgethwa ya Modimo

¹ Le lena ba le bego le hwetše dikarogong le dibeng, o le phedišitše,

² le be le ile le tšona ka mokgwa wa lefase leno, le bušwa ke mmuši wa mmušo wa sebakeng, ke moya wo mehleng yeno o dirago ka maatla mo baneng ba go se kwe.

³ Le rena ka moka re be re ile le bona ka dikganyogo tša nama ya rena, re sa dira se se bego se ratwa ke nama le maikwelo a rena, re sa le bana ba ba swanago le ba bangwe bao ba ba tswaletšwego go tlo galefelwa.

⁴ Gomme Modimo, yena mohumi wa dikgaugelo, o re ratile ka lerato le legolo la gagwe.

⁵ Le rena ba re bego re hwetše dikarogong, o re phedišitše gammogo le Kriste. Le baphološwa ka kgaugelo.

⁶ Le rena o re tsošitše a re dudiša mo go tša magodimong ka Jesu Kriste.

⁷ E be e le gore mehleng e tlogo tla a bonagatše lehumo le legologolo la kgaugelo ka botho bja go re tlela ka yena Kriste Jesu.

⁸ Le baphološwa ka kgaugelo ka tumelo; ga la ka la iphološa; e fo ba mpho ya Modimo.

⁹ Ga la ka la e bona ka mediro, gore go se be le e a kago itumiša.

¹⁰ Re babopša ba gagwe bao ka Kriste ba bopetšwego mediro e botse, ye Modimo a e buletšego tsela gore e be ye re tlogo ya ka yona.

¹¹ Bjale le se ke la lebala gore ka nama le be le le bantle kgale; ba lebollo la go dirwa ka diatla nameng, ba re le ba go se bolle.

¹² Le se lebale gore lebakeng leo le be le se na Kriste; le be le se ba mmušo wa Isiraele; Le be le se ba dikgwerano tša dikholofedišo; le be le phela lefaseng le se na kholofelo, le se na Modimo.

¹³ Bjale lena ba le bego le le kgole, le batameditšwe ka Kriste Jesu, ka madi a Kriste.

¹⁴ Ke yena mokhutšiši wa lena; ba e bego e le ba babedi, o ba dirile batee, a phušola leboto le le bego le thibile,

¹⁵ a tloša bonaba, a le nameng a fediša Molao wa ditaelo tša mekgwa, gore ba e bego e le ba babedi a ba dire mmopo o tee, e be motho e mofsa ka yena, ya ba gona go tliša khutšo.

¹⁶ Ya ba gona go boelanya ba e bego e le ba babedi, mme ya ba mmele o tee; a ba boelanya le Modimo ka sefapano, a bolaya bonaba ka sona.

¹⁷ A re go tla, a tsebatša Ebangedi ya khutšišo mo go lena ba kgole; le bao ba kgauswi a ba tsebiša yona khutšišo.

¹⁸ Gobane ka yena re buletšwe tsela bohle bobedi bja rena; ra batamela Tata wešo ka Moya o tee.

¹⁹ Bjale ga le sa le mathoko le badiiledi; le ba selete se tee le bakgethwa, le bana ba gae, le bana ba Modimo.

²⁰ Le agišitšwe godimo ga motheo wa Baapostola le Baporofeta, mo lebje le le thekgilego e lego yena Jesu Kriste.

²¹ Moago ka moka o ema ka yena, o katologa ka yena ya ba Ntlokgethwa Moreneng.

²² Ka yena le kgotlagantšwe le ba bangwe, la ba boago bja Modimo Moyeng.