Numeri 5 - BIBELE Taba yea Botse

Batho ba ba tšhilafetšego

¹ Morena a re go Moshe:

² “Laela Baisraele gore yo mongwe le yo mongwe yo a nago le bolwetši bja letlalo bja go mo tšhilafatša, goba yo a tšwago seela mmeleng, goba yo a tšhilafetšego ka gobane a kgwathile setopo, a ntšhwe mešašeng.

³ E ka ba monna goba mosadi yo a tšhilafetšego, ba ntšhwe gore ba tle ba se ke ba kgotlela mešaša moo ke dulago ntshe gare ga setšhaba sa ka.”

⁴ Baisraele ba ile ba phetha taelo ye, gomme ba ba ntšha ka moka mešašeng.

Tefo ya yo a phošeditšego motho

⁵ Morena o file Moshe

⁶ melawana ye e latelago ya Baisraele. Ge motho a ka se botegele Morena a phošetša yo mongwe,

⁷ a ipolele sebe sa gagwe, a be a lefe motho yo a mo phošeditšego, a tlaleletše ka karolo ya bohlano ya tefo yeo.

⁸ Eupša ge motho yoo a hwile gomme a se na moloko wa kgauswi yoo tefo e ka fiwago yena, e fiwe Morena e be ya baprista. Tefo ye e tlaleletša kgapa ya sehlabelo sa go mmoelanya le Morena se se dirilwego ka yona.

⁹ Gape kabelo ye nngwe le ye nngwe yeo Baisraele ba e fago Morena ka tsela ye e itšeng ke ya moprista yoo e neelwago go yena.

¹⁰ Moprista yo mongwe le yo mongwe a ipolokele dikabelo tše a neelwago tšona.

Tša basadi ba ba belaetšago banna ba bona

¹¹ Morena o laetše Moshe

¹² gore a fe Baisraele melawana ye e latelago. Ge monna a ka belaela gore mosadi wa gagwe ga a mmotegele,

¹³ o ikgotletše ka go robala le monna yo mongwe, fela a se be le therešo ya taba yeo ka ge mosadi a e dirile sephiri – go se na hlatse, a bile a se a swarwa –

¹⁴ goba ge monna a ka belaela mosadi wa gagwe, le ge e le gore mosadi ga a na molato,

¹⁵ gona monna yoo a iše mosadi wa gagwe go moprista. A ye le kabelo ye e nyakegago, e lego bupi bja kilokramo e tee bja garase, eupša a se ke a e tšhela makhura a mohlware goba seorelo, ka gobane ke kabelo ya bupi ye e tšwago go monna wa pelaelo ye e direlwago go utolla therešo.

¹⁶ Moprista a batametše mosadi yoo aletareng pele ga Morena.

¹⁷ A tšhele meetse a makgethwa ka moruswing, a tšee lerole lebatong la Tente ya bodulo bja Morena, mme a le tšhele ka moo meetseng.

¹⁸ Ke moka a hlahlamolle moriri wa mosadi, gomme a bee kabelo ya bupi ka diatleng tša gagwe. Ka diatla moprista a sware moruswi wola wa meetse a go galaka a go tliša thogako.

¹⁹ A eniše mosadi yoo ka go re go yena: “Ge o se wa otswa, meetse a a thogako a ka se go dire selo.

²⁰ Eupša ge o otswitše,

²¹ gona a Morena a go dire morogakwa le molahlwa bathong beno. A go dire moopa, a go kokomoše le dimpa.

²² A meetse a a thogako a tsene ka mpeng ya gago a e kokomoše, a be a go dire moopa.” Mosadi a fetole a re: “Ke a dumela; a Morena a dire bjalo.”

²³ Moprista a ngwale thogako yeo, ebe o hlatswa mangwalo ao ka meetseng ale a go galaka.

²⁴ Pele ga ge a noša mosadi yoo meetse ao a kago mo hlolela bohloko bjo bogolo,

²⁵ moprista a tšee kabelo ya bupi diatleng tša gagwe, a e abele Morena ka tsela ye e itšeng, mme a e tliše aletareng.

²⁶ A ntšhe legoswi la yona go laetša gore yohle e abetšwe Morena, mme a le tšhume aletareng, a kgone a noša mosadi yoo meetse ao.

²⁷ Ge a otswitše, meetse ao a tla mo hlolela bohloko bjo bogolo, gomme o tla kokomoga dimpa, a ba a ba moopa. E tla ba morogakwa bathong babo.

²⁸ Eupša ge a se ne molato a ka se mo dire selo, mme o tla kgona go ba le bana.

^29-30 Wo ke molao wa ge monna a na le lehufa mme a belaela mosadi wa gagwe gore o otswitše. Mosadi yoo a emišwe pele ga Morena, mme moprista a phethe tiro ye.

³¹ Monna a ka se be le molato, eupša mosadi yoo, ge eba o na le molato, o tla otlwa.