Numeri 28 - BIBELE Taba yea Botse

Dihlabelo le dikabelo tša dinako tše di beilwego

¹ Morena o laetše Moshe

² gore a botše Baisraele ba tlišetše Modimo dihlabelo le dikabelo ka dinako tše di beilwego e le dijo tša gagwe. Monkgo wa tšona o a mo tsefela.

³ Tše ke dihlabelo le dikabelo tše di swanetšego go tlišwa go Morena: sehlabelo sa go tšhungwa ka moka sa letšatši ka letšatši, sa dikgapana tše pedi tše di nago le ngwaga o tee tše di se nago bosodi.

⁴ Le dire sehlabelo ka kgapana ya mathomo mosong, mme mantšiboa le dire se sengwe ka ya bobedi,

⁵ se sengwe le se sengwe se dirwe le kabelo ya bupi ya kilokramo e tee ya bupi bjo bo hlakantšwego le litara e tee ya makhura a mohlware a a hlwekilego.

⁶ Se ke sehlabelo sa letšatši ka letšatši se se tšhungwago ka moka, se se dirilwego la mathomo thabeng ya Sinai e le monkgo wo o tsefelago Morena.

⁷ Le tšheleng litara e tee ya beine aletareng e le kabelo ya seno ya go sepela le kgapana ya mathomo.

⁸ Mantšiboa le dire sehlabelo ka kgapana ya bobedi ka yona tsela yela le dirilego sehlabelo sa mosong le kabelo ya sona ya seno. Monkgo wa sehlabelo se le wona o tsefela Morena.

Sehlabelo sa Sabatha

⁹ Ka letšatši la Sabatha le dire sehlabelo ka dikgapana tše pedi tše di nago le ngwaga o tee tše di se nago bosodi; le abe le bupi bja dikilokramo tše pedi bjo bo hlakantšwego le makhura a mohlware e le kabelo ya bupi le kabelo ya seno.

¹⁰ Sehlabelo se sa go tšhungwa ka moka se dirwe Sabatha se sengwe le se sengwe go tlaleletša sehlabelo sa letšatši ka letšatši le kabelo ya sona ya seno.

Sehlabelo ka letšatši la mathomo la kgwedi

¹¹ Le direleng Morena sehlabelo sa go tšhungwa ka moka mathomong a kgwedi ye nngwe le ye nngwe ka diruiwa tše di latelago: dipowana tše pedi le kgapa e tee le dikgapana tše di šupago tše di nago le ngwaga o tee, ka moka e be tše di se nago bosodi.

¹² Go dira kabelo ya bupi le abe bupi bjo bo hlakantšwego le makhura a mohlware: gotee le poo ye nngwe le ye nngwe le abe bupi bja dikilokramo tše tharo; gotee le kgapa le abe bja dikilokramo tše pedi,

¹³ gomme gotee le kgapana ye nngwe le ye nngwe le abe bja kilokramo e tee. Dihlabelo tše tša go tšhungwa ka moka ke tša monkgo wo o tsefelago Morena.

¹⁴ Kabelo ya seno ya dihlabelo tše ke beine ya dilitara tše pedi gotee le poo ye nngwe le ye nngwe, le litara le seripa gotee le kgapa, le litara e tee le kgapana ye nngwe le ye nngwe. Wo ke molawana wa sehlabelo sa go tšhungwa ka moka sa letšatši la mathomo la kgwedi ye nngwe le ye nngwe ngwaga ka moka.

¹⁵ Gomme go tlaleletša sehlabelo sa go tšhungwa ka moka sa letšatši ka letšatši le kabelo ya seno ye e sepelago le sona le dire sehlabelo sa tshwarelo ya dibe ka phooko e tee.

Dihlabelo Monyanyeng wa Dinkgwa tše di se nago komelo

¹⁶ Monyanya wa Paseka wa go hlompha Morena o ketekwa ka letšatši la lesome le metšo ye mene la kgwedi ya mathomo.

¹⁷ Ka letšatši la lesome le metšo ye mehlano go thoma monyanya wo o tšeago matšatši a a šupago, woo ka wona go swanetšego go lewa fela dinkgwa tše di dirilwego ntle le komelo.

¹⁸ Ka letšatši la pele la monyanya wo le phuthegeleng tirelo, gomme le se ke la dira mediro ya lena ya mehleng.

¹⁹ Le direleng Morena sehlabelo sa go tšhungwa ka moka ka diruiwa tše di latelago: dipowana tše pedi le kgapa e tee le dikgapana tše di šupago tše di nago le ngwaga o tee, ka moka e be tše di se nago bosodi.

²⁰ Gotee le sehlabelo se le abe bupi bjo bo hlakantšwego le makhura a mohlware e le kabelo ya bupi: gotee le poo ye nngwe le ye nngwe le abe bupi bja dikilokramo tše tharo; gotee le kgapa le abe bja dikilokramo tše pedi,

²¹ mme gotee le kgapana ye nngwe le abe bja kilokramo e tee.

²² Le dire le sehlabelo sa tshwarelo ya dibe ka phooko e tee, mme ka tsela ye setšhaba se boelanywe le Morena.

²³ Le abeng tšeo go tlaleletša sehlabelo sa go tšhungwa ka moka sa mosong wa letšatši le lengwe le le lengwe.

²⁴ Ka yona tsela yeo le abeleng Morena kabelo ya bupi matšatši a a šupago e le ya monkgo wo o mo tsefelago. Le abeng seo go tlaleletša sehlabelo sa letšatši ka letšatši sa go tšhungwa ka moka le kabelo ya seno ye e sepelago le sona.

²⁵ Le phuthegeleng tirelo ka letšatši la bošupa, gomme le se ke la dira mediro ya lena ya mehleng.

Dihlabelo Monyanyeng wa Puno

²⁶ Ka letšatši la pele la Monyanya wa Puno, ge le tliša kabelo ya mabele a mafsa go Morena, le phuthegeleng tirelo, gomme le se ke la dira mediro ya lena ya mehleng.

²⁷ Le dire sehlabelo sa go tšhungwa ka moka e le sa monkgo wo o tsefelago Morena ka diruiwa tše di latelago: dipowana tše pedi le kgapa e tee le dikgapana tše di šupago tše di nago le ngwaga o tee, ka moka e be tše di se nago bosodi.

²⁸ Gotee le sehlabelo se le abe bupi bjo bo hlakantšwego le makhura a mohlware e le kabelo ya bupi: gotee le poo ye nngwe le ye nngwe le abe bupi bja dikilokramo tše tharo; gotee le kgapa le abe bja dikilokramo tše pedi,

²⁹ gomme gotee le kgapana ye nngwe le ye nngwe le abe bja kilokramo e tee.

³⁰ Le direng le sehlabelo sa tshwarelo ya dibe ka phooko e tee, mme ka tsela ye setšhaba se boelanywe le Morena.

³¹ Le abeng tšeo le kabelo ya seno go tlaleletša sehlabelo sa go tšhungwa ka moka sa letšatši ka letšatši le kabelo ya bupi.