Numeri 27 - BIBELE Taba yea Botse

Barwedi ba Tselofohade

¹ Magla, Noa, Hogla, Milka le Tirtsa e be e le barwedi ba Tselofohade, morwa wa Hefere, Hefere morwa wa Gileade, Gileade morwa wa Makire, Makire wa kgoro ya Manase, Manase morwa wa Josefa.

² Ba ile ba ya ba ema pele ga Moshe le moprista Eleasara le baetapele le setšhaba ka moka mojakong wa Tente ya bodulo bja Morena, gomme ba re:

³ “Tatagorena o hlokafaletše lešokeng a se ne morwa. O be a se lekokong la Korage lela la go tsogela Morena maatla; o hwile ka lebaka la sa gagwe sebe.

⁴ Ke go reng ge leina la tatagorena le timelela kgorwaneng ya gabo e le fela ka gore a se a ka a ba le barwa? Re feng naga gare ga meloko ya botatagorena.”

⁵ Moshe a ala taba ya bona pele ga Morena,

⁶ gomme Morena a re go yena:

⁷ “Se barwedi ba Tselofohade ba se kgopelago se lokile; ba fe naga gare ga meloko ya botatagobona. Bohwa bja gagwe a bo fetele go bona.

⁸ Botša setšhaba sa Israele gore ge monna a ka hwa a se ne morwa, morwedi wa gagwe a tšee bohwa bja gagwe.

⁹ Ge a se ne morwedi, bomorwarragwe ba swanetše go tšea bohwa bjoo.

¹⁰ Ge a se na le bomorwarragwe, boramogolwagwe goba borangwanagwe ba swanetše go tšea bohwa bjoo.

¹¹ Ge a se ne boramogolwagwe goba borangwanagwe, gona moloko wabo wa kgauswikgauswi ka madi a tšee bohwa bjoo e be bja gagwe. Setšhaba sa Israele se phethe taelo ye e le molao, bjalo ka ge nna, Morena, ke go laetše.”

Joshua o kgethwa go tlo tšea legato la Moshe

¹² Morena a re go Moshe: “Namela thaba ya Abarime, o lebeledišiše naga ye ke e fago Baisraele.

¹³ Ka morago ga ge o e bone, o tla hwa bjalo ka ge Arone, morwarrago, a hwile,

¹⁴ ka gobane bobedi bja lena le tshetše taelo ya ka lešokeng la Tsine. Ge setšhaba ka moka se nngongoregela kua Meriba, le ganne go ntumelela go laetša maatla a ka a makgethwa pele ga bona.” Meriba ke felo mola ga meetse kua Kadeshe, lešokeng la Tsine.

¹⁵ Moshe a rapela a re:

¹⁶ “Morena Modimo, wena Mothopo wa bophelo ka moka, ke a go rapela, beela setšhaba se monna

¹⁷ yo a tlago kgona go se eta pele mme a se laola ntweng, gore setšhaba se sa gago se se ke sa tla sa swana le dinku tše di se nago modiši.”

¹⁸ Morena a re go Moshe: “Tšea Joshua, morwa wa Nunu, monna wa bokgoni, mme o mmee diatla hlogong.

¹⁹ O mo emiše pele ga moprista Eleasara le setšhaba ka moka, gomme moo pele ga bona o bege gore ke yo a tlago tšea legato la gago.

²⁰ O mo arolele bogolo bja gago, gore setšhaba ka moka sa Israele se tle se mo theeletše.

²¹ A bote moprista Eleasara, yo a tlago tseba thato ya ka ka go šomiša Urime le Tumime. Ka tsela ye Eleasara o tla hlahla Joshua le setšhaba ka moka sa Israele ditabeng tša bona ka moka.”

²² Moshe a dira ka moo Morena a mo laetšego ka gona. A emiša Joshua pele ga moprista Eleasara le setšhaba ka moka.

²³ Gomme bjalo ka ge Morena a be a laetše, a bea Joshua diatla hlogong, mme a bega gore ke yo a tlago tšea legato la gagwe.