Numeri 23 - BIBELE Taba yea Botse

¹ A re go Balaka: “Nkagele dialetare tše di šupago mo, mme o hlabe dipoo tše di šupago le dikgapa tše di šupago.”

² Balaka a dira ka moo a boditšwego ka gona, gomme yena le Bileamo ba dira sehlabelo ka poo le kgapa aletareng ye nngwe le ye nngwe.

³ Ke gona Bileamo a itšego go Balaka: “Šala o eme mo kgauswi le sehlabelo sa gago sa go tšhungwa ka moka, ge nna ke sa ile go bona ge eba Morena a ka nkgahlanetša. Ke tla boa ke go botša se sengwe le se sengwe se a ka nkutollelago sona.” Ka gona a namelela godimo mo go sego mehlare,

⁴ mme Modimo a mo gahlanetša. Bileamo a re go yena: “Ke agile dialetare tše di šupago mme ka dira sehlabelo ka poo le kgapa go ye nngwe le ye nngwe ya tšona.”

⁵ Morena a botša Bileamo molaetša wa gagwe, gomme a re a boele morago a yo o botša Balaka.

⁶ Ka gona a boela morago mme a hwetša Balaka a sa eme kgauswi le sehlabelo sa gagwe sa go tšhungwa ka moka a na le baetapele ka moka ba Moaba.

⁷ Bileamo a hlaba sereto a re: “Balaka, kgoši ya Moaba, o ntšere Siria, dithabeng tša ka bohlabela. A re: ‘Tlaa o nthogakele ditlogolo tša Jakobo, o rogake setšhaba sa Israele.’

⁸ A nka rogaka bjang se Modimo a sego a se rogaka, goba ka se hlolela madimabe mola Modimo a se a se hlolela?

⁹ Ke ba bona ke le matlapeng a godimo; ke ba lebeletše ke le mebotong. Ke setšhaba se se phelago se nnoši; ga ba ipale le ditšhaba tše dingwe.

¹⁰ Ditlogolo tša Israele ke sekalerole – ke mašabašaba, mapalelammadi. Anke ke fetše matšatši a ka bjalo ka yo mongwe wa setšhaba sa Modimo, ke hwe ka khutšo go swana le baloki.”

¹¹ Ke moo Balaka a itšego go Bileamo: “A o ntirile eng? Ke go tlišitše mo gore o tle o rogake manaba a ka, bjale wena o ba šegofaditše.”

¹² Bileamo a mo fetola a re: “Gape ke swanetše go bolela fela se Morena a mpotšago gore ke se bolele.”

Sereto sa bobedi sa Bileamo

¹³ Ke moo Balaka a itšego go Bileamo: “A re ye felo mo gongwe moo o tlago bona fela karolo ya Baisraele. O nthogakele bona o le moo.”

¹⁴ A mo iša felo ga bahlodi godimodimo ga thaba ya Pisga. Moo le gona a aga dialetare tše di šupago, mme a dira sehlabelo ka poo le kgapa aletareng ye nngwe le ye nngwe ya tšona.

¹⁵ Bileamo a re go Balaka: “Šala o eme mo kgauswi le sehlabelo sa gago sa go tšhungwa ka moka, ge nna ke sa ile go gahlanetša Modimo mola.”

¹⁶ Morena a gahlanetša Bileamo, a mmotša se a swanetšego go se bolela, gomme a re a gomele go Balaka go yo bolela molaetša woo.

¹⁷ Ka gona Bileamo a boela morago mme a hwetša Balaka a sa eme kgauswi le sehlabelo sa gagwe sa go tšhungwa ka moka a na le baetapele ba Moaba. Balaka a mmotšiša gore Morena o boletše eng,

¹⁸ gomme Bileamo a hlaba sereto a re: “Tlaa, Balaka, morwa wa Tsiporo, o kwe se ke go botšago sona.

¹⁹ Modimo ga se motho a kago bolela maaka; ga se motho, yo a kago itshola. Se a se holofetšago o a se dira; o a bolela, mme gwa phethega.

²⁰ Ke laetšwe gore ke šegofatše, gomme ge Modimo a šegofatša, nna nka se fetoše.

²¹ Ga ke bone madimabe goba bothata bjo bo tlago tlela Israele. Morena Modimo wa bona o na le bona; ba mo gobela megobo ba re ke kgoši ya bona.

²² Modimo yo a ba ntšhitšego Egepeta o ba lwela bjalo ka nare.

²³ Ditlogolo tša Jakobo ga di kgonwe ka boloi; setšhaba sa Israele ga se phekolwe ka bodupe. Bjale go tla bolelwa ka Baisraele gwa thwe: ‘Bonang tše Modimo a di dirilego!’

²⁴ Setšhaba sa Israele ke se maatla bjalo ka tau; ke se bogale bjalo ka taugadi. Tau ga e patlame e se ya ja nama, e se ya nwa madi a se e se bolailego.”

²⁵ Ke moo Balaka a itšego go Bileamo: “Ge o gana go rogaka setšhaba sa Israele, o lese le go se šegofatša!”

²⁶ Bileamo a mo fetola a re: “A ga se ka go botša gore ke swanetše go dira tšohle tše Morena a mpoditšego tšona?”

Sereto sa boraro sa Bileamo

²⁷ Balaka a re: “Hle, tlaa ke go iše lefelong le lengwe. Mohlomongwe fao Modimo o tla go dumelela wa nthogakela bona.”

²⁸ Ka gona a iša Bileamo godimodimo ga thaba ya Peore ye e okametšego lešoka.

²⁹ Bileamo a re go yena: “Nkagele dialetare tše di šupago mo, mme o hlabe dipoo tše di šupago le dikgapa tše di šupago.”

³⁰ Balaka a dira ka moo a botšwago ka gona, a dira sehlabelo ka poo le kgapa aletareng ye nngwe le ye nngwe.