Numeri 21 - BIBELE Taba yea Botse

Go fenywa ga Bakanana

¹ Ge kgoši ya Bakanana ya Arade ka karolong ya borwa ya Kanana a ekwa gore Baisraele ba etla ba tšere ka tsela ya Atharime, o ile a ba hlasela mme a thopa ba bangwe ba bona.

² Ke moo Baisraele ba ennego pele ga Morena ba re: “Ge o ka gafela setšhaba se diatleng tša rena, re tla go fela sona sa ruri le metse ya bona, mme ra ba fediša.”

³ Morena a ba kwa gomme a ba thuša go fenya Bakanana. Ka gona Baisraele ba ba bolaya, le metse ya bona ba e fediša taa, gomme ba rea felo fao leina la Horma.

Noga ya mphiri

⁴ Baisraele ba tloga thabeng ya Hore ka tsela ye e yago kgogometšaneng ya Akaba, gore ba tle ba potologe naga ya Edomo. Eupša mo tseleng setšhaba sa fela pelo

⁵ mme ba ngongoregela Modimo le Moshe ba re: “Ke ka lebaka lang o re ntšhitše Egepeta gore re tle re hwele mo lešokeng le, mo go sego dijo goba meetse? Re tennwe ke dijo tše mpe tše!”

⁶ Ke moo Morena a rometšego dinoga tša mpholo gare ga setšhaba, gomme Baisraele ba bantši ba longwa, ba hwa.

⁷ Setšhaba sa tla go Moshe sa re: “Re dirile sebe ge re ngongoregela Morena le wena. Bjale rapela Morena gore a tloše dinoga tše.” Ka gona Moshe a rapelela setšhaba.

⁸ Ke moo Morena a boditšego Moshe gore a dire noga ya mphiri a e fege koteng, gore yo mongwe le yo mongwe yo a longwago a kgone go e lebelela mme a fodišwe.

⁹ Ka gona Moshe a dira noga ya mphiri, a e fega koteng. Yo a lomilwego o be a lebelela noga yeo ya mphiri, mme a fodišwe.

Go tlogwa thabeng ya Hore go iwa moeding wa Bamoaba

¹⁰ Baisraele ba tšwela pele, gomme ba hloma mešaša kua Obote.

¹¹ Ge ba tlogile Obote ba hloma mešaša maropeng a Abarime, lešokeng le le lego ka bohlabela bja naga ya Moaba.

¹² Ba tloga moo mme ba hloma mešaša ka moeding wa Serede.

¹³ Go tloga moo ba sepela gape ba yo hloma mešaša ka thoko ya leboa ya nokana ya Arnone, lešokeng le le fihlago ka nageng ya Baamore. Nokana ya Arnone e be e le mollwane wa Bamoaba le Baamore.

¹⁴ Ke ka lebaka leo Puku ya Dintwa tša Morena e bolelago ka ga “... motse wa Vahebe tikologong ya Sufa, le meedi; nokana ya Arnone,

¹⁵ le magologelong a meedi ye e fihlago motseng wa Are le go ya mollwaneng wa Moaba.”

¹⁶ Go tloga moo ba fetela pele felo fa go bitšwago Didiba, moo Morena a ilego a re go Moshe: “Bokanya setšhaba mme ke tla ba fa meetse.”

¹⁷ Ka nako yeo Baisraele ke ge ba opela koša ba re: “Didiba, runyang meetse, mme re tla a dumediša ka koša –

¹⁸ sediba se se epilwego ke baetapele le ke bakgomana ba setšhaba, se se epilwego ka molamo wa bogoši le ka mapara a bona.” Ba tloga lešokeng ba ya Matana

¹⁹ gomme go tloga moo ba ya Nagaliele, mme go tloga Nagaliele ba ya Bamothe,

²⁰ mme go tloga Bamothe ba ya moeding wo o lego ka nageng ya Bamoaba, ka fase ga malekeleke a thaba ya Pisga, go ukamela lešoka.

Go fenywa ga Kgoši Sihone le Kgoši Ogo

²¹ Setšhaba sa Israele sa romile batseta go Sihone, kgoši ya Baamore, ba re:

²² “Re dumelele re putle nageng ya gago. Rena le diruiwa tša rena re ka se tšwe tseleng ra tsena mašemong a gago goba dirapeng tša gago tša merara, le gona re ka se nwe meetse didibeng tša gago, re tla fela re tšere ka tselakgolo ya kgoši go fihlela re etšwa nageng ya gago.”

²³ Eupša Sihone a gana gore setšhaba sa Israele se putle naga ya gagwe. A bokanya madira a gagwe ka moka gomme a ya Jahatse kua lešokeng, mme a hlasela Baisraele.

²⁴ Eupša Baisraele ba bolaya ba bantši ba manaba ao ntweng, gomme ba thopa naga ya bona go tloga nokaneng ya Arnone go ya leboa go fihla go ya Jaboko, ke go re go Baamone, ka gobane mollwane wa Baamone o be o šireleditšwe kudu.

²⁵ Ka fao setšhaba sa Israele sa thopa metse ya Baamore ka moka, gotee le Heshbone le metse ka moka ya tikologo, mme ba dula go yona.

²⁶ Heshbone e be e le mošate wa Sihone, kgoši ya Baamore, yo a bego a lwele le kgoši ya pele ya Bamoaba mme a thopa naga ya gagwe ka moka go fihlela nokaneng ya Arnone.

²⁷ Ke ka fao direti di rego: “Tlang Heshbone, mošate wa Kgoši Sihone! A o agwe lefsa, o boele sekeng

²⁸ ka gobane mo motseng wo wa Heshbone madira a Sihone a kile a tšwa bjalo ka mollo; a ja metse ya Moaba, a metša meboto ya Arnone bjalo ka kgabo ya mollo.

²⁹ Le na le madimabe bjang lena, setšhaba sa Moaba! Lena barapedi ba Kemoshe le a felela! Modimo wa lena o lesitše banna e eba batšhabi, basadi bona ya ba mathopša a Sihone, kgoši ya Baamore.

³⁰ Gomme bjale ditlogolo tša bona di a fedišwa mo gohle go tloga Heshbone go fihla Dibone, go tloga Nashime go fihla Nofage, kgauswi le Medeba.”

³¹ Ka gona setšhaba sa Israele sa dula nageng ya Baamore,

³² gomme Moshe a roma banna go yo hlola ka moo ba kago hlasela motse wa Jasere ka gona. Ka morago ga moo Baisraele ba o thopa le metse ya tikologo ya wona, gomme ba raka Baamore ba ba bego ba dula go yona.

³³ Ke moka Baisraele ba phamoga mme ba tšea tsela ya go ya Bashane, gomme Kgoši Ogo wa Bashane a tla le madira a gagwe ka moka go ba hlasela kua Edrei.

³⁴ Morena a re go Moshe: “O se ke wa mmoifa. Ke tla go dira gore o mo fenye gotee le setšhaba sa gagwe ka moka le naga ya gagwe. O mo dire se o se dirilego Sihone, kgoši ya Baamore, yo a bego a buša kua Heshbone.”

³⁵ Ka gona Baisraele ba bolaya Ogo le barwa ba gagwe le setšhaba sa gagwe ka moka, ba se šadiše motho, gomme ba dula nageng ya gagwe.