Numeri 17 - BIBELE Taba yea Botse

Lepara la Arone

¹ Morena a re go Moshe:

² “Botša setšhaba sa Israele gore ba go fe mapara a lesome le a mabedi; go moetapele wa kgoro ye nngwe le ye nngwe go tšwe le tee. O ngwale leina la moetapele yo mongwe le yo mongwe lepareng la gagwe,

³ mme lepareng le le emelago Lefi o ngwale leina la Arone. Go be le lepara le tee la moetapele wa kgoro ye nngwe le ye nngwe.

⁴ O a bee fase ka Tenteng ya bodulo bja ka, pele ga Polokelo ya Kgwerano, moo ke gahlanago nago.

⁵ Gomme lepara la moetapele yo ke mo kgethilego le tla hloga. Ka tsela ye ke tla fediša dingongorego tše di sa felego tša Baisraele ba ge ba le tsošetša tshele.”

⁶ Ka gona Moshe a bolela le Baisraele, gomme moetapele yo mongwe le yo mongwe a mo fa lepara; gwa tšwa le tee kgorong ye nngwe le ye nngwe, mme ka moka ya ba a lesome le a mabedi. Lepara la Arone le lona le be le le gare ga ao a bona.

⁷ Moshe a bea mapara ao ka moka fase ka Tenteng pele ga Polokelo ya Kgwerano ya Morena.

⁸ Ka letšatši le le latelago, ge Moshe a tsena ka Tenteng, a hwetša lepara la Arone, le le emetšego kgoro ya Lefi, le hlogile. Le be le dirile mabue, le khukhušitše, mme le entšwe dialmone tše di budulego!

⁹ Moshe a tšea mapara ale ka moka a a laetša Baisraele. Ba bona se se diregilego, mme moetapele yo mongwe le yo mongwe a tšea lepara la gagwe.

¹⁰ Morena a re go Moshe: “Boetša lepara la Arone pele ga Polokelo ya Kgwerano. Le bewe moo e be segopotšo sa go gopotša Baisraele ba dinganga gore ba tla hwa ge ba ka se lese go ngongorega.”

¹¹ Moshe a dira ka moo Morena a mo laetšego ka gona.

¹² Baisraele ba re go Moshe: “Bjale gona ke gona ge re fedile! Ka moka ga rena re hwile!

¹³ Ge eba mang le mang yo a nogo batamela Tente o tla hwa, gona ka moka ke setšha re hwile!”