Numeri 13 - BIBELE Taba yea Botse

Dihlodi

¹ Morena a re go Moshe:

² “Kgetha moetapele o tee kgorong ye nngwe le ye nngwe, o ba rome e le dihlodi go yo hlola naga ya Kanana ye ke e fago Baisraele.”

^3-15 Moshe a phetha taelo yeo, a roma baetapele ba ba latelago go tloga lešokeng la Parane: Kgoro Moetapele Rubene Shamua, morwa wa Sakure Simeone Shafate, morwa wa Hori Juda Kalebe, morwa wa Jefune Isakara Jigale, morwa wa Josefa Efraime Hosea, morwa wa Nunu Benjamene Palti, morwa wa Rafu Sebulone Gadiele, morwa wa Sodi Manase Gadi, morwa wa Susi Dane Amiele, morwa wa Gemali Asere Seture, morwa wa Mikaele Naftali Nagbi, morwa wa Bofisi Gade Geuele, morwa wa Maki

Kgoro Moetapele

¹⁶ Bao ke dihlodi tše Moshe a di romilego go yo hlola naga. O ile a fetola leina la Hosea, morwa wa Nunu, a re ke Joshua.

¹⁷ Ge Moshe a ba roma, a re go bona: “Sepelang leboa ka karolong ya ka borwa ya naga, mme ka morago le rotogeleng nageng ya dithaba.

¹⁸ Le boneng gore ke naga ya mohuta mang, ke batho ba bakae ba ba dulago moo, le gore ba tiile bjang.

¹⁹ Le lebeleleng gabotse gore a naga yeo ke ye botse goba ke ye mpe, le gore a batho ba moo ba dula mešašeng goba metseng ye e ageleditšwego ka merako.

²⁰ Le lebeleleng gore na mobu wa ntshe o nonne goba ke wa lehwafa, le ge eba naga yeo e na le dithokgwa. Le beng le sebete le boeng le dikenywa tše dingwe tša naga yeo.” E be e le sehla sa ge diterebe di thoma go butšwa.

²¹ Ka gona banna bao ba ya leboa mme ba bona naga go tloga lešokeng la Tsine ka borwa go ba go fihla Rehobo, kgauswi le sefate sa Hamate ka leboa.

²² Pele ba ile ba ya karolong ya ka borwa ya naga mme ba fihla Hebrone, moo go bego go dula ba kgorwana ya Ahimane, ya Sheshai, le ya Talmai, ditlogolo tša setšhaba sa Baanake. Hebrone e rile go agwa gwa feta mengwaga ye e šupago pele ga ge Tsoane e agwa kua Egepeta.

²³ Ba fihla moeding wa Eshkolo, gomme moo ba rema lekala leo le bego le na le ntšhuhla e tee ya diterebe ye e bego e imela mo e lego gore e ile ya rwalwa ke banna ba babedi ka go e šikara ka kota. Ba ile ba ba ba boa le digarenate le mago.

²⁴ Felo fao go ile gwa rewa leina la moedi wa Eshkolo ka lebaka la ntšhuhla ya diterebe yeo Baisraele ba ilego ba e rema moo.

²⁵ Ka morago ga ge ba hlotše naga matšatši a masome a mane, ba ile ba boela

²⁶ go Moshe le go Arone le go setšhaba ka moka sa Israele kua Kadeshe, lešokeng la Parane. Ba ile ba bega seo ba se bonego, mme ba ba laetša dikenywa tše ba tlilego natšo.

²⁷ Ba botša Moshe ba re: “Re lekotše naga ye o bego o re romile gore re yo e bona; ke naga ya mokhora le monono, gomme dikenywa tša yona šedi.

²⁸ Eupša batho ba ba dulago moo ke batho ba maatla, le metse ya bona ke ye megolo kudu ye e ageleditšwego gabotse ka merako. Godimo ga moo re bone ditlogolo tša ditšitširipa tša Baanake fao.

²⁹ Baamaleke ba dula ka karolong ya ka borwa ya naga; Bahete le Bajebuse le Baamore ba dula kua dinageng tša dithaba; Bakanana ba dula go ipata le Lewatle la Mediteraniene le go ipata le noka ya Jordane.”

³⁰ Kalebe o ile a homotša batho bao ba ilego ba thoma go ngongoregela Moshe a re: “A re napeng re ye re thope naga ya bona, ka gobane e ka se re palele.”

³¹ Eupša banna bale ba go yo hlola naga le yena ba re: “Aowa, re ka se kgone go lwa le ditšhaba tšela, ka gobane di re feta ka maatla.”

³² Ka gona ba napa ba botša Baisraele maaka ka ga naga yeo ba tšogo e lekola ba re: “Naga ya gona ga e robale. Batho ba re ba bonego moo go yona ke ba bateleletelele.

³³ Re bone le ditšitširipa fao, ditlogolo tša Anake. Re ile ra ipona re le ba bannyane bjalo ka ditšie, gomme le bona ba re bona re le bjalo.”